মণিপুরদা প্রাইম মিনিস্তর লাকপীনবা ৱার্ল্ড মীতৈ কাউন্সিলনা চেরোল পীশিনখ্রে
ইম্ফাল, জুন ২৯ : ইন্দিয়াগী প্রাইম মিনিস্তর নরেন্দ্র মোদিনা মণিপুরদা অমুক্তং লাকপীরগদি শান্তিগী লম্বী অসি মাঙলোম চঙশিনবগী অচৌবা খূদম ওইগনি হায়না ৱার্ল্ড মীতৈ কাউন্সিলগী চেয়ারমেন হৈক্রুজম নবশ্যামনা ঙসি প্রাইম মিনিস্তরদা অইবা চেরোল অমা পীশিনখ্রে।
অইবা চেরোল অসিদা, হৌখিবা চহী ইং ২০২৩ গী মে ৩দগী মাইগ্রেন্ত চিন-কুকি-নার্কো তেরোরিস্তশিংনা চহী অমগা থা অনীরোম অসি লমদমসিগী হিংশাগী থৌদোক থোকহল্লি। লোয়ননা হৌখিবা জুন ১৭ তা য়ুনিয়ন হোম মিনিস্তর মশামক্নাসু মীতৈ অমসুং কুকিগা ৱারী শানদুনা ইথনিক দিভাইদ লৈরিবা অসি লৈহন্দনবা হোৎনগনি হায়না ফোঙদোকখিবা লৈখ্রে।
লাইবক থীবদি, ঈরাং অসি হেক হৌরকপদগী মণিপুরগী চীফ মিনিস্তর অসি মাঙখিবগুম তৌরে। হিংশাগী থৌদোক অসি লেপ্তনা মখা অসুম চত্থরকপা অসিনা লমদম অসিগী ফীবম অসুক্কী মতীক শোকচিল্লক্লে। লমদম অসিদা হৌজিক স্তেত আর্ম পুলিস থারগা আর্মি, আসাম রাইফেলস অমসুং অতোপ্পা পেরা মিলিতরি ফোর্স ৫০,০০০ রোম লৈ হায়বগী রিপোর্ত লৈ। ঈরাংসিদা হিংশা তোইনা থোক্কনবা জগাশিং খঙদোক্লবসু সেন্ত্রেল সেক্যুরিতি ফোর্সশিং অসি করিমত্তা কান্নদ্রে। মসি ইন্দিয়া গবর্নমেন্ত, মণিপুর গবর্নমেন্ত অমসুং মাইগ্রেন্ত চিন-কুকি-নার্কো তেরোরিস্তশিংগা তৌনখিবা সস্পেন্সন ওব ওপরেসন (সু) না ওইরম্বা য়াই। ‘সু’ অসি চহী অসিগী ফেব্রুয়ারীদা ওফিসিয়েল্লি লোইখ্রবসু, মখা তানা হৌজিকসু চৎনদুনা অদুম লৈবগী মওংদা সেন্ত্রেল ফোর্সশিংনা য়েংদুনা লৈরি।
মণিপুর অসি ঙসি আইন লৈতবা লৈবাক অমগা মান্নরে। লোয়ননা হৌজিক কম্যুনিতি অনী অসি উনবা ফাওবা য়ানদ্রে। ইং ২০২৩ গী আগস্ত ৯ দা অমিত শাহনা পার্লিয়ামেন্ততা মণিপুরগী মতাঙদা মিনিত ৩২ ৱা ঙাঙখি। অদুবু লাইবক থীবদি হোম মিনিস্তরনা আর্মি, আসাম রাইফেলসনচিংবশিংনা তুমীন্না য়েংদুনা লৈথোক্লিবা অসিগী মরমদদি করিসু হায়বিরমদে। ঈরাং অসি হেক হৌবদগী আর্মি অমসুং আসাম রাইফেলসনা এক্তিব ওইনা মশাগী তৌফম থোকপা থবক তৌরম্লবদি হিংশা অসি ইরায় লায়না কন্ত্রোল তৌরমদুনা হৌজিক কাংখোং চাইদুনা লৈরিবা অসি লৈরম্লোই। হিংশাগী থৌদোক অসি লেপখিবা তারবদি হৌজিক ওইরিবা ফীবম অসি ফগৎলক্কনি হায়না থাজৈ।
প্রাইম মিনিস্তরনা মণিপুরদা লাক্তুনা ৱাহৈ খরা হায়বদা পূং ২৪ গী মনুং দা শান্তি হঞ্জিল্লক্কনি। ইন্দিয়া গবর্নমেন্তনা ‘সু’ এগ্রীমেন্ত অসি তোকথোক্লগা আর্মি, আসাম রাইফেলসনচিংবশিং অসি মথৌ তৌহল্লু। হিংশা তৌরিবা মাইগ্রেন্ত চিন-কুকি মিলিতেন্তশিং অসি কন্ত্রোল অমুক্তং তৌখ্রবদি মীতৈ নহাশিংনা খূৎলায় পায়দুনা খুন ঙাক্লিবা অসি য়াম থুনা তোকখিগনি। মরম অসিনা ইন্দিয়াগী প্রাইম মিনিস্তরনা মণিপুরদা অমুক্তং লাকপীরবদি শান্তিগী লম্বী অসি মাঙলোমদা চঙশিনবগী অচৌবা খূদম ওইগনি হায়না চেরোলসিদা মখা তারি।
সোর্স: পোক্নফম
0 কমেন্ট:
কমেন্ট তৌবিয়ু