চহী ১০০ শুবা মপোক কুমওন চহীদা স্নাখ্যা কমলজিৎকী চহী ২১শুবা নোংগা কুমওন
আগরতলা, জুন ২৮ : চৎলিবা চহী আগষ্টতা মশাগী চহী ১০০ শুবদা খোঙদাগদবা স্নাখ্যা রাজকুমার কমলজিৎকী ২১ শুবা নোংগা কুমওন থৌরম পাঙথোকখ্রে। চৎখিবা জুন ২৪, নিংথৌকাবা নুমিৎ, মরূপ পাউচেগী শঙ্গায়দা পাঙথোকখিবা থৌরম অদুদা স্নাখ্যাগা নক্নবা তিন্নজরম্বা অহল ওইরবা কবি নোংশাতাবম নিরঞ্জন দত্তনা থৌরম মপু ওইরগা মণিপুরী সাহিত্য পরিষদকী প্রেসিডেন্ট এল বীরমঙ্গল,আই সি এ লোয়শঙগী হান্নগী এসিঃ ডিরেক্টর নিউ দিল্লী, মণিপুরী ল্যাঙ্গুয়েজ বোর্ড মেম্বর খোইস্নাম বীরলানা মীথুংলেন ওইনা শরুক য়াখি।
থৌরমগী অহানবদা লৈখিদ্রবা স্নাখ্যা রাজকুমার কমলজিৎগী ফটোদা হৈকৎ-লৈকৎ তমদুনা মিনিট অমা তুমিন্না লেপ্তুনা ইকাইখুম্নখি। মথংদা মরূপ পাউচেগী জোয়েন্ট ইডিটর রাজকুমার তরুনজিৎনা ওক্না-ৱারোল পীরবা মতুং থৌরমগী মীথুংলেনশিং অমসুং সাহিত্য পরিষদকী জেনারেল সেক্রেটারী থৌদাম নীলকুমার, সনসম ওংবী উমা, এল মীনা দেবী নচিংবনা স্নাখ্যাগী মরমদা ৱা ঙাংখি।
অরোইবদা স্নাখ্যাবু শৈথারদুনা কবি এন নিরঞ্জন, তোপসুবম যোগেন্দ্র, এস উমা, এল মীনা, সিজা মলিনা, কেএইচ বীরলা, সৈব্যা নচিংবা শৈরেং পাথোকখি। পনবা য়াবদি চৎলিবা চহী ইং ২০২৪ গী আগস্ট ৮ দা স্নাখ্যা কমলজিৎকী চহী চামশুবদা খোঙদারনি। মহাক্কী বার্থ সেন্টিনারী মপোক কুমওন অসি মথং চহী ইং ২০২৫ গী আগস্ট থা ফাওবা ত্রিপুরাতা নত্তনা আসাম, মণিপুরদসু পাঙথোক্কনি হায়রি।
সোর্স: মরূপ
0 কমেন্ট:
কমেন্ট তৌবিয়ু