মণিপুরদা চৎনরম্বা ৱায়েন চৈরাকশিং –চোংথাম তোম্বা
মীহাৎ-মীপুন, হুরান-চিন্থি, নুপীদা মীৎয়েং চুমদবা, ফম্বাল লাননচিংবা কয়া থোরকপদা চৈরাপ লোয়শঙ অমসুং গারোৎনা ৱায়েন চত্থদুনা মখল মখা কয়াগী চৈরাক পীদুনা ৱারকখি। চৈরাক পীবসি নিংথৌনসু পীনিংলবদি অদুম পীবদি ঙম্মী। অমরোমদা, দন্ডি অসি মশানা পীজবসু লৈ। মসিবু প্রায়শ্চিত হায়না খঙনৈ। খুদম ওইনা, ইং ১৭৮১ দা রাজর্ষি ভাগ্যচন্দ্রগী সনা হাক্তক্তা মনাই অমনা ব্রহ্মচারী অমবু হাৎলি হায়বগীদমক মহারাজ অসিনা নিংথৌ ফম থাদোক্তুনা মশানা মশাবু দন্ডি তৌজখি।
মহারাজ চন্দ্রকীর্ত্তি সনা হাক্তক্তসু অঙম্বশিংনা থুমগী বিচার তৌবা ঙমদে হায়দুনা মশানা মশাবু দন্ডি তৌজবা ওইনা মহারাজনা থুম হেনখি।
নোংদা লাইরেন পাখংবদগী হৌরগা মণিপুরদা পানখিবা নিংথৌ ৭৬ কী মনুংদা মহারাজ চন্দ্রকীর্তি মতম শাংনা পানখিবা নিংথৌনি। মহাক্না তাঙ্কক অনীরক থোক্না পানখি। অহনাবদা ইঙ ১৮৩৪ গী জানুয়ারি ৯দা মশাগী চহী ২দা ঙাইরিঙৈদা মণিপুরগী ৬৯শুবা নিংথৌ ওইনা ফম্বাল কাখি। নিংথৌ ওইরবসু য়াম্না পীক্লিবনা অমসুং লৈঙাক্লোন করিনো খঙদ্রিবা মরমনা মতোন ইবুংঙো সেনাপতি ওইরম্বা নরসিংহনা যুবরাজ ফম পুরগা অমসুং সনা দেবেন্দ্রনা সেনাপতি ফম পুরগা অঙম-অথৌ কয়াগা তান্নদুনা লৈঙাক থৌরম চহী ১০ রোম পাঙথোক্তুনা লাকখি। অদুবু ফম্বাল লানগী চৎনবী অমা লৈরবা মণিপুর ওইবনা, ইং ১৮৪৪ জানুয়ারি ২৭ দা, অচেংবা তাঞ্জা য়েংদুনা মন্ত্রীময়ুম কুঞ্জরাজ সনাগী মচা শ্রীইবুংসি নবীননা খোঙলোয় ৫০ রোমগা লোয়ননা যুবরাজ নরসিংহবু সন্ধ্যা মতুংদা শ্রীবৃন্দাবন চন্দ্রগী হরি মন্দিরদা শ্রীভগবত তাবগী লাই খুরুম্লিঙৈদা লুমদুনা লান্দাখি।
লাইবক ফবদি যুবরাজ নরসিংহদি য়েৎথংবা পাম্বোমদা খজিক শোকপা নত্তনা অশোই অঙোমমক্তি থোকহৌদ্রে। অরুম্বা লান্দা অদুদি মায়দি পাকখিদ্রে। থৌদোক অদুদা মীপাইরবা নিংথৌগী মমাইবেম্বা মাইস্নাম চনু কুমুদীনিনা পীক্লিবা মচা নিংথেমবু অশোই-অঙাম থোক্তনবা হায়দুনা ময়াং লৈবাক কাছাড়দা মচাবু পুদুনা চেনখ্রবদা মণিপুরগী ফম্বাল হাংহৌখি। ফম্বাল হাংনা থম্বদি য়াদবনিনা লৈবাক্কী অঙম-অথৌ ময়ামা তান্নদুনা যুবরাজ নরসিংহবু নিংথৌ হাপখি।
নরসিংহ মহারাজ Portrait by RKCS
নরসিংহ মহারাজনা ৭০ শুবা নিংথৌ ওইনা পাল্লকপনা মশাগী চহী ৫৮ শুরকপা মতম ইং ১৮৫০ এপ্রিল ১০দা নোঙ্গাখি। মহাক্কী মনাউ যুবরাজ দেবেন্দ্রোনা ময়াম্বুংগী মহুৎ শীন্দুনা মশাগী চহী ৪৭ শুবদা মণিপুরগী ৭১ শুবা নিংথৌ ওইহৌখি। অদুবু মহাকসু কুইনা পাল্লমখিদে। ফম্বাল লান লাকপদগী মহাক সিংহাসন হুন্দোক্লম্লগা ময়াংলমদা চেনখিবদগী মহারাজ চন্দ্রকীর্ত্তিনা অমুক হন্না ৭২ শুবা নিংথৌ ওইনা ইং ১৮৫০ জুলাই ১২ দা ফম্বাল তোংই অমসুং চহী ৩৬ চুপ্না পাল্লম্মী। মহারাজ অসিগী সনা ফম্বাল মিং নাউজিংলেন নোংদ্রেনখোম্বা হায়না ইং ১৮৬৯ জুলাই ৩০ দা হুনখি।
মহারাজ চন্দ্রকীর্ত্তিগী সনা হাক্তক অসি য়াম্না শাংবা মতম ওইবনা থৌদোক ৱাথোক কয়ানা থনখি। লৈঙাক শাসন নিংথিনা লৈবা মতম হায়বদু ওইখি। মীহাৎ-মীপুন, হুরান-চিন্থি, নুপীদা মীৎয়েং চুমদবা, ফম্বাল লাননচিংবা কয়া থোরকপদা চৈরাপ লোয়শঙ অমসুং গারোৎনা ৱায়েন চত্থদুনা মখল মখা কয়াগী চৈরাক পীদুনা ৱারকখি। চৈরাক পীবসি নিংথৌনসু পীনিংলবদি অদুম পীবদি ঙম্মী। অমরোমদা, দন্ডি অসি মশানা পীজবসু লৈ। মসিবু প্রায়শ্চিত হায়না খঙনৈ। খুদম ওইনা, ইং ১৭৮১ দা রাজর্ষি ভাগ্যচন্দ্রগী সনা হাক্তক্তা মনাই অমনা ব্রহ্মচারী অমবু হাৎলি হায়বগীদমক মহারাজ অসিনা নিংথৌ ফম থাদোক্তুনা মশানা মশাবু দন্ডি তৌজখি।
মহারাজ চন্দ্রকীর্ত্তি সনা হাক্তক্তসু অঙম্বশিংনা থুমগী বিচার তৌবা ঙমদে হায়দুনা মশানা মশাবু দন্ডি তৌজবা ওইনা মহারাজনা থুম হেনখি।
চৈরাক পীবা হায়বসি অরানবা থবক অদু অমুক হন্না তৌদনবা পীবা অমা, অমনা চৈরাক অদু কিবনা মরম ওইরগা মীশিংবু অরানবা ফত্তবা থবক তৌহন্নিংদবা ফাওহন্নবনি। অদুনা চৈরাক অসি য়াম্না লুম্বা অমসুং য়াংবা অসি তৌরম্লিবা ফত্তবা থবক অদুগী কৈদা অদু য়েংলগা লেপ্পনি। মমাংঙৈদা মণিপুরদা চৎনরম্বা চৈরাক মখল অসি অসুম্না নৈনবা য়াই।
১) চেকিশিন ৱা পীবা : ইচম চম্বা অরানবা অমা তৌরুরবদি অরানবা তৌবা মী অদু মতুং অমুক তৌদনবা চেকশিন ৱা পীরগা থাদোকই। থোইদোকপা চৈরাক পীদে।
২) ৱাকোংবা / শেনকোংবা :- ৱাকোংবা হায়বা চৈরাক অসিসু য়াম্না লুম্বা মরাল লৈরবদি শেল, সনা অমদি লুপা নচিংবা পীরগা থাদোকপা মখলগী চৈরাকনি। খুদম ওইনা হায়রবদা, মেরাগী কাঙজৈ শান্নবদা অঙম-অথৌশিংনা থেংনা লাকই, নিংথৌগী খৌগোল নংদে হায়দুনা ৱাকোংবা চৈথারোল কুম্বাবদা থেংনৈ। চিন থিবগীসু ৱাকোংই। পীবা মুন্নবগী মতাংদসু ৱাকোংবা লৈ। নিংথৌগী ৱায়েন্দা পেন্দবা ফোঙদোক্লুবগী অমুক হন্না চৈরাপনা ৱায়েনহল্লি, মদুদা নিংথৌনা চুম্বদগী অতোপ্পা কাঙবু অদু সনা লুপা কোংহনবসু য়াওই।
৩) নুংশাদা ফৌবা:- মসিগুম্বা মখলগী দন্ডি অসি হুরান-চিন্থি তৌবশিং, নুপী ঙাংনবা নত্রগা নুপা ঙাংনবশিংদা অয়াম্বা পীগল্লি। মীয়াম তিনবা মফমদা, সনা কৈথেনগুম্বা মফমদা শগাই শারগা নত্রগা উ অমা য়ুংলগা মতোন্দা পুন্দুনা মীদু নুংশাদা ফৌই। করিগুম্বদা লমচৎ চুমদবী, নুপা ঙাংনবীশিংবু হকচাংগী মথক থংবা শরুক মখৈ, খ্বাং ফাওবা মফি থোক্লগা মচু তৈশিন্দুনা মীয়াম মমাংদা খুনগোইনবগা লোয়ননা ফৌই।
৪) য়ৈবা :- মখল অসিগী চৈরাক অসি মরু ওইনা নুপী শেম্মুবগী মরাল লৈবা মী, ষণ হুবা মী, চিন থিবা মী, থবক থাবগা থৈরগা চেনখিবা মী, মথৌ নিংথিনা পাঙথোক্তবা মী অসিনচিংবশিংদা পীবা চৈরাকনি। খূদম ওইনা, থাঙ্গাল জেনারেলনা মেজর ফম পুরিঙৈদা থোংশঙবা সন্ত্রীশিং য়েংশিনবা চৎপদা লাইথোঙ, গারোৎ, লাকথোং অমসুং মনুং চিরাই থোংগী সন্ত্রীশিং লাইরেকপা থেংনদুনা য়ৈখি। ষণ হুবগীদমক লাইশ্রম মচা অমা, নাওরেম মচা অমা, ফমদোম মচা অমা, থারোইজম মচা অমা, থংজম মচা অনী, য়েনখোম মচা অমা, শগোলশেম মচা অমা পুন্না মখোয় ৮ সনা কৈথেন্দা য়ৈরগা থাদোকপা চৈথারোল কুম্বাবাদা ইরি।
অমারোমদা, কৈথেন্দা অমম্বদা নুপী মরক্তা লৈরম্মী হায়দুনা নামৈরাকপা লমজেন য়াঙবানচিংবা মী ৪ য়ৈদুনা ফৌবগী ৱারীসু য়াওরি। য়ৈবগী থবক অসি সনা কৈথেন্দা নত্রগা চৈরাপতা পাঙথোকই।
৫) খুনগোইনবা:- খুনগোইনবা হায়বা চৈরাক অসি মরু ওইনা নুপী নত্রগা নুপা ঙাংনবা, গর্ভ য়ৈথবা, শেল হুরানবা অসিনচিংবা মীশিংদা পীবা চৈরাকনি। করিগুম্বদা মৱা মপুরোইববু হাৎনবা থৌরাংলম্বা নুপীশিংবু সনা কৈথেন্দা পুথোক্তুনা খুনগোইনৈ। খুনগোইনবা অসি মীয়াম তিনবা মফমদা শগাই অমা শারগা মথক্তা পুন্দুনা থম্বনি। করিগুম্বদা, লমচৎ চুমদবী নিপা ঙাংনবী নুপীশিংবু খ্বাংগী মথক মখৈ মফি লৌথোক্তুনা অমসুং মচু তৈশিন্দুনা সনা কৈথেন্দা থম্বা য়াওই।
৬) জাৎ ওলহনবা:- মসিগী চৈরাক মখল অসিনা জাৎ তিন্নদবা মীনা অতোপ্পা জাৎকী নুপী লৌবদা পীবনি। খুদম ওইনা, কোন্থা অহল্লুপতা লৈবা ইরোইবা য়ুমজাওবু পাংঙল নুপী লৌই হায়দুনা পাংঙল ওলহনখি। মহাক্তা নত্তনা য়েলাংবম মাইবী কৌবা অমসু পাংঙল নুপী চনু অমা লান্নৈ হায়দুনা পাংঙল ওলহনখি। লাইশ্রম নিপা অমসুং মমৌ থোকপা অমা লৌই হায়দুনা হাওজোংবম ওলহনখি।
অমারোমদা, ৱাংখৈ ঙৌবীগী মতুবু গুরুময়ুম মোহন্না লান্নৈ হায়দুনা ঙৌবীনা বামনগী ময়াদা শউন ইল্লূবগী ৱাংখৈ ঙৌবীবু লুগুন থোক্তুনা শুগ্গু ওইহনখি। বামোন মহেনবুনা হাওজোংদা লোই থাখি।
৭) ইন্থোকপা:- ইং ১৮৪৯ ফেব্রুয়ারি ৫দা বামোন হঞ্জবা লৱাই থাবা ঠাকুর শিবগী পোৎলোই য়াওরুবা মীশিং ইন্থোক্তুনা চঙহন্দে। ইং ১৮৬৫ নভেম্বর ২৪দা বামোন অমনা ময়াংদগী লাক্তুনা মহারাজদা লুপা নীরবদা মহারাজনা লুপা ১৫০ পীববু য়ামদে লৌরোই হায়ববু চঙহন্দে, ইন্থোকই। ইং ১৮৬৯ জানুয়ারি ১৫ দা মাইস্নামচা পাপু মেজর ইন্থোকই।
৮) ফম থাবা (Suspension):-ফম থাবা হায়বা চৈরাক অসি অঙম্বা চৈরাপ ফম্বশিংনা ৱায়েন চুম্না তৌবা ঙমদ্রবা, থৌদৌবদা থিল্লবা, থবক চেকশিন্দবগীসু ফম থাই। খুদম ওইনা, ইং ১৮৪৭ দা শ্রীগোবিন্দজিগী লুক কৎপদা ঙা মরু য়াওই হায়দুনা ঠাকু লাই শঙলাকপা তেববু মফম থাই। পুজারী, লাইকৈরুংবা, দুহোনসু দন্ডি তৌই। ইং ১৮৪৯ মে ২৫ দা ফৌগৈশঙবা মেজর অমসুং মিয়া সুবিদার অনীনা লান তাল্লুবা মফম য়ৌরুদে হায়দুনা মফম থাই। ইং ১৮৫৫ জুলাই ২১ দা খুজিংখা হাওনা অতাংখুল হাৎলে হায়দুনা মরী থীববু য়ুম্না পোইলানা হাৎপনি হায়দুনা মফম থাই। পাখোন চৎপা হৈতবগী, সনা পুয়া কংলৈরোন ইবদা লানবগী, নুপী ফারুবগীসু মফম থাই।
৯) য়োৎহিং চনবা (Chained) :- নিংথৌ মচানা য়োৎহিং চনফদে হায়বা অমা লৈ। ইং ১৮৪৯ মার্চ ২৯দা মনাউ ইবুংঙো খুঞ্জাওবা (ভদ্রসিং নোংচুপ লমগাইঙম্বা অমসুং মাইস্নাম চনুগী মচা নুপা কমলাকান্ত উরফে খুঞ্জাওবা) শামু হঞ্জবনা মনাইবু য়োৎহিং চল্লুববু নিংথৌ মচানা মদু তৌহৈদে হায়দুনা তৌখিদে।
য়োৎহিং চনবা হায়বা চৈরাক মখল অসি ফম্নাইবশিংনা লান চৎপা হৈত্রবদি মফম থাই। খূদম ওইনা ইং ১৮৩৯ অক্টোবর ২৪ দা অৱাংলম লান চৎলুবা ফম্নাইবশিংবু পাউ হন্দনা লাকই হায়দুনা য়োৎহিং চল্লি। পোৎচৈ হুবগী মী হাৎপগীসু যোৎহিং চল্লি। মী য়ৈরুবগীসু য়োৎহিং চল্লি। য়োৎহিং চনখিবগী থৌদোক ময়াম অমা লৈখ্রে। অম’নিদং থমজরি-ইং ১৮৪৭ মার্চ ২২দা ৱাহেংবা মাইচৌ মসুং মনাই ২না ময়ুমদা হিগী লমন থৌবা লাকপা কৃত্তিবু ঈশিংদা হুন্থদুনা হাৎনবা হোৎনবগী মপুনা লোই থাখ্রগা মনাই অনীবু য়োৎহিং চল্লি। ইং ১৮৪৭ মে ৭তা সনা য়াথং ৱায়েন শঙনা পানাগী মিচেন থিববু শঙলাক কৈরুং শংগোইবা হঞ্জবা দিংনা থাদোকই হায়বদা শঙলাকপা ৪ শংগোইবা হঞ্জবা ৪ য়োৎহিং চল্লি। ইং ১৮৫০ ফেব্রুয়ারি ১০দা শাৎপম খেমা সিংনা ময়াংদগী ইবুংশী ফৈরাবগী মচাবু বামোন মচা শাদুনা পুরকএ হায়দুনা য়োৎহিং চল্লি। ইং ১৮৫০ সেপ্টেম্বর ৩দা চোংথাম মেজর, শোইবমচা মেজর, বামোন জগধাম শরুং পুরেলবু য়োৎহিং চল্লি। ইং ১৮৫১ অক্টোবর ২৩ দা লাম্মীদা থম্বা ইরেংববু চেনখি হায়দুনা লৈশাংথেম্বা হাজারী অমসুং চোংথামচা হাজারী অনীবু য়োৎহিং চল্লি। ইং ১৮৫৩ জুলাই ৩দা খুরাই লৈকাইদা থাংজমচা থোনলাংঙম্বনা লাইরিকয়েংবমচা য়ৈ হায়দুনা য়োৎহিং চল্লি। ইং ১৮৬৬ ডিসেম্বর ২৬ তা লুৱাং নিংথৌগী মচানচিংবা নোকশা শান্নৈ হায়দুনা অয়াওবা মী ২৭ বু মখোং নাম্মা য়োৎহিং চন্দুনা খা-কৈথেন্দা থম্মী। ইং ১৮৭০ আগষ্ট ৩০দা কোঞ্জেংবা মচীল মনাউ খৎনদুনা ময়াম্ববু থাঙনা য়াল্লে হায়দুনা মনাউবু গারোৎতা য়োৎহিং চল্লি। ইং ১৮৮৪ মার্চ ২৯দা কোনোক থিঙেন্দা লৈবা গর্ভ থা ৫ শুরবী কোনোক লৈশাবী (মাইনু পেমচা) উদা য়ান্দুনা শি। মরা তেখাও বামোনগী মশুদি গারোৎতা য়োৎহিং চন্দুনা থম্মী।
১০) লোই ওইহনবা :- ইং ১৮৩৬ জুন ২দা তোংব্রম পেপমনা সনা শঙ্গাইদা লাইরিক হুঞ্জিল্লি হায়দুনা থুমলোই ওইহনখি।
১১) মরন-মথুম মৎপা:- ইং ১৮৩৭ এপ্রিল ১৪ দা ফম্বাল লান হৌবদা চেন্নবশিং খরনা লোই থাখ্রগা চুরা কৈরুংবদি লোই থাবগা লোয়ননা মরন মথুমসু মৎখি।
১২) কৈশুমশঙ :- দরবার হৈতবগী, তান য়ৈবা হৈতবগী, পোৎচৈ অমদি ষন হুবগী, নোকশা শানবগী, লমচৎ লুদবা অসিনচিংবগী কৈশুমদা থম্মী। খুদম, ইং ১৮৬৯ মার্চ ২৮ দা পাংঙন নুপী অমা মনাউ নুপাগা ওংনৈ হায়দুনা নিপাদি ফাদোক্তা থম্মী। পাঞ্জিগী অঙ্ক লানবগী, শন্ত্রী তৌবা শোয়বগী, নিংথৌ শেম্বা য়াওবগী, পোৎশেম যাদু তৌবগী, মী হাৎলুবগী, সনা থৌগল শোইবগী, মী য়ৈবগী, সনা ওলহল্লি হায়রগা ওলহনবা ঙমদবগী, বিচার চুম্না তৌবা হৈতবা, থবক শীবদা য়াদবগীসু কৈশুমদা থম্মী। করিগুম্বা মতমদা পুন্সিগী ওইনা ফাদোক পীবসু য়াওই। খুদম ওইনা, ইং ১৮৮৩ নভেম্বর ২১দা কোন্থৌজম লৌৱায়দা লাই কংবা সোবোকখম্বগা ইংঙুদুম্বা দেৱানগী মনাই হাওবগা হাও মচা ৩গা য়ৈনবদা লাইকংবা সোবোক খনবদি শি। মদুদা য়াওবা হাও মচাশিং পুন্সীগী ফাদোক পী।
১৩) লোই থাবা :- চৈরাক ময়ামগী মনুং খ্বাইদগী য়াম্না তোয়না পীগনবা চৈরাক মখল অসি লোই থাবনি। লোই থাবগী মরু ওইবা মরমদি-ফম্নাইবশিংনা শেল চারুবগী, ফম্বাল লান হৌবা মী নত্রগা মদুদা য়াওবগী, লৈবাক্কী পাউখোন থাবদা থিনবগী, খৎন-চৈনবগী থৌ চেকশিন্দবা অমসুং হৈতবগী, নিংথৌ শেম্বগী অমসুং মদুদা চেন্নরুবগী, ফুঙ্গা মুন্নবগী নত্রগা পিবা মুন্নবগী, মচা থাজবা হৈতবগী, পোৎচৈ হুবগী, পোৎশেম যাদু তৌবগী, মী হাৎপগী, নিংথেম মচাশিংনা লাইনিংথৌ সনামহী অমসুং পাখংবা খুরম্বগী, য়েক লৌনবা/নুপী লৌবা চুমদবগী, মীনম্বা ৱা ঙাংবগী, লান্দা চেনবগী, জুৱার শান্নবগী, য়ুম মৈ থাবগী, লমচৎ লুদবগী অমসুং গর্ভ য়ৈথবা নচিংবগী লোই থাই।
১৪) শিবগী চৈরাক : মী হাৎপগী, ফম্বাল লান হৌবগী অমসুং নিংথৌ শেম্বগী মরালদা শিবগী চৈরাক অসি পী। শিবগী দন্ডি পীবগী মওং তোঙান তোঙল্লি। থৌরী য়ান্দুনা হাৎপসু লৈ। মসিনা মরাল লৈবা মী (শিং) দু হিদা হাপ্লগা তুরেন মারিন্দা শুগ্নু তান্না পুগনি। মফমদু য়ৌরবা মতুংদা মীশিংদু কোম তৌহনগনি। তৌবা লোইরগা মীশিং অদু য়োৎখোক্না থোমদুনা কোমদুদা থাদরগা ফুমগনি। মতাং অসিদা পনবা য়াবদি, শুগ্নু হঞ্জবগী নুপী অসি শক্তি য়াম্না লৈ। মহাক্না শিবগী চৈরাক পীরবা মী অমবু কনবা ঙম্বগী হক লৈ। করিগুম্বা মহাক্না মী অমা কন্নিংলবদি মহাক ফনেক অনি লোন্দুনা লাক্কনি। অদুগা মহাক্না শেৎলিবা মথক থংবা ফনেক অদু লৌথোক্লগা নিপা অদুদা কুপ্লবদি নিপাদু হাৎলরোই। মথৱাই হিংলবনি। অতোপ্পা অমনা, মরাল লৈবা মীদু হাৎলগা নুংশাদা ফৌদুনা থম্বগী চৎনবীসু লৈ। খুদম ওইনা, ইং ১৮৮১ জুনা ২৩দা চন্দ্রখোংদা ফম্বাল লান লাকএ হায়দুনা সৌগাইজম্বা মেজরনা মাইস্নাম মেজরগা অনীনা লুচিংদুনা চৎলি। অন্ড্রোগী চিংঙাখম ১ লৈরোংথেন্দগী য়ুমখাইবমগী মাইবী অমা ফারকই। ইরেংবম ফৌগাকচাও তাববু নিংথৌ শেমগে তৌরম্মী হায়দুনা য়েনখোইবা মখেংবু হাৎতুনা ৱাংথোনবিদা ফৌই।
কর্টেসি: মরূপ
0 কমেন্ট:
কমেন্ট তৌবিয়ু