বুক্স এন্ড কোফি শিংজমৈদা নুমিৎ ১১নিগী চিলদ্রেন বুক ফেস্তিবেল, ২০২২
তশেংবসু হৌজীক মতমগী মনিপুরী খুনাইদা লৈরিবা অৱাৎপা অমা হায়রগদি অঙাংশিংদা অমসুং পুংকক চাওরবা অঙাংশিংনা পাবা য়াবা লাইরিক অসিনি। মসিগী হীরম অসিমদি য়াম্না ৱাৎলগা লৈরে হায়বসিমদি অখঙ অহৈশিংনা তত্তনা হায়নরবা ৱাফমনি।
খুনাই অমদা হিংলিবা মীওইশিংগী তুংগী পুন্সিগী লাইবক অসিমক খুনাইদুদা নৌনা পোক্লকলিবা পীক্লিবা অঙাংশিংগী পুন্সি মহিং, মখোয়গী লাইরিক লাইশু তাকপী তম্বীবা, মখোয়গী মেন্তেল হেল্ট অদুগা ফিজিকেল হেল্ট অমসুং সোসিয়েল কন্সিয়াস্নেস অদুনা অয়াম্বা মতমদা পাদম ওইগনি। লাইরিক হৈবা মীশিংনা অয়াম্বা লৈবাক অমগী মীশিংগী চাদা ৯০ ওইরগসু ত্রেদিসনেল ৱিসদ্ম অমসুং লৌশিং জ্ঞান হায়বদু য়াওদ্রদগি অমসুং মসিগী শরুক অসিনা য়াম্না নেম্না লৈরগদি খুনাই অদু চাওখৎ লম্বেলদা মঙম শানবা ঙমদনা লৈগনি। নৌরিবা অঙাংশিংদা ভেল্যু লৈবা লাইরিক লাইশু তম্বীবদা লৈবাক অদুগী পোলিসি মেক্করশিংগী চাওরবা থৌদাং লৈরি। থায়নগী পোৎ খুদিংমক অরিবনি কান্নদ্রবনি হায়দুনা মদু থৌওইদবসু করিগুম্বা মতমদা মদুনা হেন্না অমাংবা লাকপা কয়া থেংনদবা নত্তে। চহী চা কয়া হৌখ্রবা মীওইবগী হৌরক্লোন অদু নৌহৌনা য়েংদবা য়াদে। অরিবা লৈরম্বনা অনৌবসু পোক্লক্লিবনি। মালেমসিদা লৈরিবা খুনাই পুম্নমক্কি ফুঙ্গা ৱারী কয়া লৈরি। ফুঙ্গা ৱারীশিং অসিদা মান্নবা মশক কয়াসু থেংনরি। নহা অহল খাক্তনা ফুঙ্গা ৱারীদি তানিংই। লাইরিক ওইনসু ফোংনদুনা মরু ওইনা অঙাংশিংনা পাম্না পানৈ। হায়রিবা ফুঙ্গা ৱারীশিং অসি খুৎই লাইরিক ওইনা লৈত্রিঙৈদা অমদি প্রিন্তিং মেছিন লাকত্রিঙৈদদি চিনবুং সাহিত্য ওইনা মীরোল অমদগী মীরোল অমদা পাথাং পুথাং নাইনা লীদুনা তমদুনা লাক্লি ঙসিসু। তৌইগুম্বসুং মালেমগী হোংলক্লিবা তেকনোলোজিগী অহোংবা ময়াম মরক্তা হায়রিবা চিনবুংদা লৈরম্বা ফুঙ্গা ৱারীশিং দিজিতেল ফোর্মেটতা এনিমেসন ফিল্ম ওইনা তোঙানবা শক্লোন অমদা লাক্লি। মসিসু ঐখোয়না লোয়নমক থেংনরবা উনরবা ঙাক্তনি। ফুঙ্গা ৱারী লীবিনবা ইমুংগী অহল লমণশিং মপু মবেল লৈজদবা ইমুং কয়াসু লৈরক্লি। হৌজীক মতমগী পুন্সি মহিং অসি করিনোমাদা লাক্লি। মী খুদিং থবক য়াম্না চিনবদৌনা তৌনরক্লি। অঙাংশিংদা মচাশিংদা মতম য়াম্না পীবা ঙম্নদবা ইমুং কয়াসু লৈরি। অদুনা নৌরিবা অঙাংশিংনা খঙনিংবা তম্নিংবা হায়নিংবা পুম্নমক ফংদবগী অৱাবসু লৈতবা নত্তে। পাউরৌ পাউতাক পাউজেল কয়া য়াওবা ৱারী লিবীনবা লৈশিল্লক্তবা অদুগা লাইরিক ওইনসু পাবা ফংদবগী অৱাবা অমদি মনিপুরদা ঙসি হৌরক্লিবা অঙাংশিংনা থেংনরিবা চাওরবা খুদোংচাদবা অমনি। মসিনা মখোয়গী মরক্তা জেনরেসন গেপ অমদি লৈবগুম্বা অমসু তৌরক্লি। মনিপুরগী কলচরগী, ত্রেদিসনগী পুৱারীগী মরমদা হংলুবদা অয়াম্বদি কয়া খঙদবনা অয়াম্বা ওইনা তৌশিল্লক্লি। মীগী মরোলদা লাইরিক তম্বীবা অতোপ্পা লমগী পুৱারী হান্না মপি লাইরিক্তা তম্বীবা মখলগী লাইরিক খুৎতম অমা পাক শন্না লৈখিবা অসিনা ঙসিদি অনৌবা মীরোলদা ইরোল ইয়েক নুংশিবা ইকায়খুম্নবা, ইজাতিগীদমক্তা খনবা ইমা লৈবাক্কীদমক চাওথোকচবা ফাওবা অদুগুম্বা ৱাখল্লোন অদু ময়েং তাবগুম্বা অমা থেংনদবসু নত্তে। মসি পুম্নমক ইদ্যুকেসন্নিস্টনি হায়দুনা লৈরিবা অদুগা লৈবাক্কি পোলিসি মেক্করশিংনা মিৎয়েং শান্না উবা ৱাৎখিবা অদুগী মহৈনি। অদুবু থেংলবসু থেংনা মনিপুরদা চহী খরসিদা থোক্লকলিবা অমদি হৌরক্লিবা নহারোলশিংদা নৌহৌনা মিকপ থোকপা, ইপা ইপুগী খোঙ্গুল লীনিংবা অদুগা লাইরিক লাইশুগী মঙাল নিংথিজনা ফংলবা নহারোল কয়ানা মাগী মাগী অঙম্বা থাক্তা খুনাইসিদা অফবা থবকশিং লেপ্তনা তৌরকপা হেনগৎলকলি। অসিগুম্বা অফবা খোঙথাং অমখক শিংজমৈদা লৈবা বুক্স এন্দ কোফিগী মপু নহা অইবা অমসুং আর্টিস বীশান্তম য়ুম্নাম্না হৌদোরক্তুনা হৌখিবা জুলাই ১০দগী ২০ ফাওবদা অঙাংশিংগী বুক ফেস্তিবেল অমা নুমিৎ ১১নি চুপ্না পাঙথোকখি। মনিপুরদা বুক ফ্যিয়ার চহী খুদিং পাঙথোকতুনদি লাক্লি স্তেত সেন্ত্রেল লাইব্রেরিনা শিন্দুনা অদুবু হৌখিবা চহী খরসিদি কোভিদনা মরম ওইদুনা করিসু পাঙথোকপা ঙমদনা লাক্লি। অসিগুম্বা তাল্লক অসিদা অহানবা ওইনা অঙাংশিংতগী ওইবা বুক ফেস্তিবেল অমা শিনবা হায়বসি য়াম্না পুকনিং থৌগৎনিংঙাই ওই।
বুক্স এন্দ কোফি অসিমক ২০১৩গী দিৱালি নুমিত্তা শিংজমৈ থোকচোম লৈকাইদা অহানবা ওইনা হাংদোকখি। মফম অসি হাংদোকখিবগী মরমসু মীপূম খুদিংদা লাইরিক পাবগী হৈনবী অমা লৈনবা অমসুং অৱা পোত্থাফম ওইবা মফম ওইহন্নবা হোৎনবনি। তশেংবসু চহী খরসিদা নহারোলশিংগী অমসুং অঙাংশিংদা সেন্তর অসিনা করিগুম্বা খরদি খুদোল তমদুনা লাক্লি হায়বসি থবকনা লেংদ্রবা খুদম ওইরি। নোংমাইজিং খুদিং মফম অসিদা অঙাংশিং লাই য়েকপা তাকপি তম্বীরি অমসুং ম্যুজিক ক্লাস ওইনা ভাইওলিনসু তম্বীরি। পানিংবা লাইরিক পাবা য়ারি। লৈনিংবা লাইরিক কয়াসু মরাং কায়না ফংহল্লি। মরক মরক্তা আর্ত একজিবিসনসু শিনবা থেংনৈ। সহরগী নিল খোংবা মরক্তা বুক্স এন্দ কোফিনা থৱায় অমদি হাপ্লি লাইরিক ময়াম থেল্লদুনা ম্যুজিকনা অমসুং পেন্তিংনা।
নুমিৎ ১১নি চত্থখিবা অহানবা চিলদ্রেন বুক ফেস্তিবেল হৌখিবা জুলাই ১০, ২০২২ দা লৈঙাক্কি মহুদ মিনিস্তরসু ওইরিবা শ্রী য়ুম্নাম খেমচান্দনা অথোইবা লেংবীরকপা ওইনা লেংবীরক্তুনা বুক্স এন্দ কোফিগী হোল্ডা হাংদোকখি। থৌরম হৌদোক্লদুনা মিনিস্তর খেমচান্দনসু হৌরক্লিবা অঙাংশিংদা ইপা ইপুনা হাক্তকতগী লিনদুনা লাক্লবা ফুঙ্গা ৱারীশিং, মসিদা য়াওরিবা মোরেল লেসনশিং অমসুং ঙসিগী অঙাংশিংদা মসিবু খঙহন্নিংবগী অপাম্বা ফোংদোকখিবনি। তশেংবসু হৌজীক মতমগী মনিপুরী খুনাইদা লৈরিবা অৱাৎপা অমা হায়রগদি অঙাংশিংদা অমসুং পুংকক চাওরবা অঙাংশিংনা পাবা য়াবা লাইরিক অসিনি। মসিগী হীরম অসিমদি য়াম্না ৱাৎলগা লৈরে হায়বসিমদি অখঙ অহৈশিংনা তত্তনা হায়নরবা ৱাফমনি। কোমিকতগী হৌরগা অঙাংশিংনা পাবদা নুংঙাইরবা লাইরিক পুন্না ৫০০ হেন্না ফেস্তিবেল অসিদা দিসপ্লে তৌখি। লাইরিক লৈনিংবশিংনা দিস্কাউন্ট ১৫% পীরগা লৈনখি। নুমিৎ ১১নি চুপ্না চত্থাখিবা বুক ফেস্তিবেল অসিগী অহানবা নুমিত্তা সাপম সুইতিনা নুমিদাংৱাইরম পুং ৪ তারকপদা শরুক য়াবা লাক্লিবা অঙাংশিংদা ৱারী লীখি। ফেস্তিবেল অসি অয়ুক নুমিৎ খুদিং পুং ১০মখায়দগী হৌদুনা নুমিদাং পুং ৭ঃ৩০ ফাওবা পাঙথোকখি। হুম্নি চনবা নুমিত্তা শকনাইরবা লাই য়েকপা আর কে জয়কুমারনা অঙাংশিংগী পেন্তিং ৱার্কসোপ অমসু পাংথোকখি। মরিনি চনবা নুমিত্তসু নহা ওইরিবা আর্তিস নোংপোকহেনবা সাইখোম, রাহুম সেরাম অমসুং বোনি খোমদ্রাম্না অঙাংশিংগী পেন্তিং ৱার্ক্সোপ অমা অমুক পাংথোকখি। মঙানি অমসুং তরুকনি চনবা নুমিত্তনা শকনাইরবী অইবী পারিস্মিতা সিংহনা বুক ৱার্ক্সোপ পাংথোকখি। অঙাংশিং য়ং এদল্ট কয়ানা শরুক য়াখি। মসিদা ৱারীমচা কমদৌনা ফজনা ইগদগে হায়বগী মতাংদা কুপ্না নৈনখি। ৱার্ক্সোপ অসিদগী খনগৎলবা অঙাংশিংগী ৱারীশিং অয়েকপা লাই য়াওনা লাইরিক ওইনা ফোংনবসু হোৎনরি হায়রকখি বীশান্তম্না। জুলাই তাং ১৬ তনা অঙাংশিংগীতা ওইবা পেন্তিং কম্পিতিসন অমসু পাংথোকখি। জুলাই ১৭তনা স্তোপ মোসন এনিমেসনগী মতাংদা অঙাংশিংদা রাহুল লাইশ্রম্না কমদৌবনো হায়বদু তাকপীখি। জুলাই ১৮ অমসুং ১৯দনা নীতা সরাংথেম্না অঙাংশিংদা ক্রাস্পকি ওইবা স্কিল দেবেলবমেন্টকি লৌশিং জ্ঞান তাকপীখি। অশেংবসু হৌজিক্কী মতমদা স্কিল দেবেলবমেণ্ট অসিমক য়াম্না মরু ওইবা হীরম অমদি ওইরিবনি খল্লি। লাইফ স্কিল অসি লাইরিক তম্বীবা মতমদা খজিক খজিক য়াওহনখিবা তারবদি তুংদা অঙাংশিং অসিনা হীংবদা পাম্বৈ অমদি ওইগদৌরিবনি। মসি য়াওদবা মতমদা ঙসি লৈঙাক অসিনা থেংনরিবা নহারোলশিংদা থবক পীবা ঙমদবগী খুদোংচাদবসি হেন্না হেন্না মায়োকনরকপা হেনগৎলক্কদৌরিবনি। অদুনা মতম চানা লাইফ স্কিল অসি অঙাংশিংদা তম্বীবা তাকপীবা অদুগা পোৎ খুদিংমক্কী ভেল্যুস অসি খঙহনবা তঙাইফদে। বুক ফেস্তিবেল অসিগী লোইশিনবা থৌরমদি “কেক্রু” সেসন হায়বসিনা ওইখি। কেক্রু হায়বসিমক থায়নদগী হৌনা মৈতৈশিংনা সনা লুপা শেংবা চাম্বদা শিজিন্নবা উহৈ অমনি। মমিং অসিমক য়াম্না সিম্বোলিক ওই। মরু ওইনা কেক্রু সেসন অসিদা বুক্স এন্দ কোফিদা শৈরেং শৈদিন্নবা থৌরম কয়া পাঙথোকখিবা লৈরে। লেপ্তনা কয়াসু পাংথোক্লক্কনি খল্লি। অসিগুম্বা কেক্রু সেসন অমা বুক ফেস্তিবেল অসিগী লোইশিনবা নুমিত্তা হাপ্তুনা অঙাংশিংনা মানা মানা হৈজবা শৈরেং থিবা, ৱারী লীবা অদুগা ঈশৈ শকপদা য়াম্না থৱায় য়াওনা শরুক য়াখি। নুমিৎ অসিদা সিয়োম ম্যুজিক বেন্দকি শকনাইরবা শৈশকপা চাওবা থিয়ামনসু ফোল্ক ফ্যুজন্দা “তোং তোং তোংদ্রুম্বী” “চিংদা শাৎপী ঈঙেল্লৈ” পুন্সি লোক্তা য়ুম্ফম ওইবা মহৌশা খূৎশেমগা মীওইবগা লৈনরিবা তৎ-থানবা য়াদ্রবা মরিগী মতাংদা শৈথাবা ফোল্ক ত্যুন্দা ফজরবা ইশৈশিং খুদোল তমখি। শরুক য়াবা লাক্লিবা অঙাংশিং অমসুং মপা মমা ওইবশিং অমসুং থৌরমদু য়াওবা লাকপশিংগী পুকনিং শুমহৎখি। লোয়শিনবা নুমিৎসিদা পেন্তিং কম্পিতিসন্দা মকোক মথং তারবা গ্রুপ এ অমসুং বি হায়না কাংলুপ অনী খায়দোক্তুনা মনাশিং লান্থোকখি। গ্রুপ (এ- ক্লাস ১-৪))দা অহানবা মনা ফংখিবনা লনচেন য়ুম্লেম্বম, (২) নোংদম্লেম্বী য়ুম্নাম, (৩) এন থোইহেনবা অমসুং কন্সোলেসন প্রাইজতা পারৈহনবী লৈশাংথেম্না ফংখি। গ্রুপ (বি ক্লাস ৫-৮)দা অহানবা মনা ফংখিবনা মনিখোম্বা, (২) য়াইফবা য়ুম্নাম (৩) জেসি তোংব্রম অদুগা কন্সোলেসন প্রাইজতা নোংপোকঙানবানি। তুংগী আশা কয়া লৈরিবা অঙাংশিংদা ফেস্তিবেল শিল্লিবা বীশান্তমগী মায়কৈদগী অচম্বা মনা মথুমশিংসু লান্থোকখি।
চিলদ্রেন বুক ফেস্তিবেল হায়বসিমক মালেমগী লৈবাক কয়াদা পাঙথোকনবগী পাউদম কয়া লৈরি। ইন্দিয়াগী মফম খরদসু পাঙথোকনরি। অদুবু পাক শন্না লেপ্তনা পাঙথোকপদি কয়া তৌদ্রিবা ফেস্তিবেল অমনি। মনিপুরদা অসিগুম্বা মখলগী অঙাংশিংগীদমক খল্লগা শিল্লকপা থৌরম অসিমক য়াম্না মতাং চাবা অমসুং তৌদ্রবা য়াদ্রবা ঙসিগী মীরোলগী থৌদাং অমনি। অসিগুম্বা চাওখ্রবা থৌদাং অমসুং ৱাখল্লোন অমা পুথোক্লকলিবা বীশান্তম য়ুম্নামদা মনিপুর মীয়াম্না থৌনা হাপ্পিবা পুকনিং থৌগৎপিবা তঙাইফদে য়াইফবা মনিপুর খুনাই অমগীদমক।
0 কমেন্ট:
কমেন্ট তৌবিয়ু