বাংলা মিডিয়ামদা তম্বা ঐখোয়বু ঙল্লিঙৈ মতমদা ত্রিপুরাদা মরূপ'না মৈতৈলোন ইবা-পাবা তন্বীখিবনি
আগরতলা, মে ১৪ : ত্রিপুরাদা মশীং লিকচরবসু মণিপুরগী ৱাংমদা খ্বাইদগী লীরবা চয়োলগী মণিপুরী পাউচে মরূপ'না ঙল্লিঙৈ মতমদা বাংলা মিডিয়ামদা তম্লকপা ঐখোয়বু মৈতৈ লোন ইবা-পাবা তন্বী তাকপীরকখিবনি। ৱাফম অসি মরূপ পাউচে'না মশাগী চহী ৫৮ দা খোঙদারকপগী মপোক কুমওনগা মরী লৈননা চৎখিবা মে ৯, বনমালীপুর মরূপকী শঙ্গায়দা পাঙথোকখিবা থৌরম অমদা চীফ গেষ্ট ওইনা শরুক য়াদুনা সাহিত্য একাডেমি নিউ দিল্লীগী মণিপুরী ল্যাঙ্গুয়েজ এডভাইজরি বোর্ড মেম্বর খোইস্নাম ওংবী বীরলানা হায়খি, মরূপকী খুত্থাংদগী ত্রিপুরাগী মতম মতমগী মৈতৈগী ওইবা ঈ-পাউ সাহিত্য নচিংবা মণিপুর, আসাম, বাংলাদেশ নচিংবা খঙবা ঙম্মী। মরূপকী দমক ঐখোয় পুম্বনা চাওথোকচৈ।
থৌরম অদু কবি সিজা মলিনানা থৌরম মপু ওইরগা পেট্রিওটিক রাইটার্স ফোরাম ত্রিপুরা ষ্টেটকী প্রেসিডেন্ট ক্ষেত্রিময়ুম মাধবী অমসুং মণিপুরী সাহিত্য পরিষদ ত্রিপুরাগী এক্সেক্যুটিভ মেম্বর এল মীনা দেবীনা গেষ্ট অব অনার ওইদুনা শরুক য়াখি অমসুং থৌরমগা মরী লৈননা ৱারোল কয়াসু ফোঙদোকখি। থৌরম অদুগী অহানবদা মরূপ হৌদোকপীরম্বা লৈখিদ্রবা স্নাখ্যা কমলজিৎ অমসুং লোইনবী সিজা অলকাগী মফমদা হৈকৎ লৈকৎ তমদুনা ইকাইখুম্নখি। মরূপকী ইডিটর আরকে তরুনজিৎনা ওক্লা-ৱারোল পীখি। মণিপুরী সাহিত্য পরিষদ ত্রিপুরাগী প্রেসিডেন্ট এল বীরমঙ্গলনা থৌরমগা মরী লৈননা মপান মণিপুরদা মণিপুরী লোলনা ফোঙবা মরূপ'না খ্বাইদগী পুন্সি শাংনা হিংনা লৈবা পাউচেনি হায়না শীংথাখি।
থৌরম অদুদা সাহিত্য পরিষদকী ভাইস প্রেসিডেন্ট টিএইচ নীলকুমার, জেনারেল সেক্রেটারী সেলৈবম খেলামোহন, কে অতুল, ময়েংবম মৃনাল কান্তি, লৈশাংথেম কুমার, জি বিপ্লব শর্মা নচিংবা অতৈ থৌবুরেনশিং অমসুং মণিপুরী লিটরেরী এ্যন্ড কলচারেল ফোরাম গী সেক্রেটারী কবি খোইস্নাম মংগল, পেট্রিওটিক রাইটার্স ফোরামগী মেম্বর নচিংবা শরুক য়াখি। অরোইবদা শৈরেং শৈদিন্নবা থৌরমদা কবি এস উমা, টিএইচ শুভনা, এইচ গন্ধেশ্বরী, সিজা প্রিয়া, কেএইচ মাধবী, য়ুম্নাম নির্মলা, এল প্রতিমা শর্মা, এইচ বেবী, এম বনানী, এস সুরেখা, এস নমিতা, কেএইচ সৈব্যা, কেএইচ বীরলানা মরূপবু শৈথারগা শৈরেং পাথোক্তুনা থৌরম অদু লোইশিনখি।
সোর্স : মরূপ
0 কমেন্ট:
কমেন্ট তৌবিয়ু