আগরতলাদা ইন্তরনেসনেল সেমিনার; ক্ষেত্রিময়ূম মাধবীদা নোংমাইথেম তোম্বী মেমোরিএল এৱার্দ লান্থোকখ্রে
ইম্ফাল, মে ১৮: মণিপুরী সাহিত্য পরিষদ ত্রিপুরানা নোংমাইথেম ফাউন্দেসন ইম্ফালগা খুৎশম্নদুনা শক্নাইরবা অইবা লৈখিদ্রবা প্রোফেসার নোংমাইথেম তোম্বী সিংহগী মরমদা নোংমগী ওইবা ইন্তরনেসনেল সেমিনার অমা ঙরাং পাংথোকখ্রে। আগরতলাগী নজরুল কলাক্ষেত্র কমপ্লেক্সতা লৈবা সাহিত্য একাদেমি অডিটোরিয়াম হোলদা থৌরম অসি পাঙথোকপগা লোয়ননা ত্রিপুরাগী শক্নাইরবী শৈশকপী ক্ষেত্রিময়ূম মাধবীদা প্রোফেসার নোংমাইথেম তোম্বী মেমোরিএল এৱার্দ ২০২৬ পিদুনা ইকাই খুম্নখ্রে।
লৈখিদ্রবা প্রোফেসার নোংমাইথেম তোম্বীগী পুন্সি অমসুং থবক হায়বা হীরমদা পাঙথোকখিবা ইন্তরনেসনেল সেমিনার অদু হৌদোকপগী থৌরমদা বাংলাদেশ মণিপুরী সাহিত্য সংসদকী প্রসিদেন্ত কবি এ কে শেরামনা চীফ গেস্ত অমসুং মনিপুরী সাহিত্য পরিষদ ত্রিপুরাগী প্রেসিডেন্ট এল বীরমঙ্গলনা মীফম মপু ওইখি। লৈখিদ্রবা প্রোফেসার তোম্বীগী মফমদা হৈকৎ লৈকৎ তমদুনা হৌদোকখিবা থৌরম অদুদা এন আই তি আগরতলাগী এসিস্তেন্ত প্রোফেসার দাঃ নোংমাইথেম অনুরাধা দেবীনা তরাম্না ওকপগী ৱারোল পীখি। থৌরম অদুদা ত্রিপুরাগী শক্নাইরবী শৈশকপী ক্ষেত্রিময়ূম মাধবীদা প্রোফেসার নোংমাইথেম তোম্বী মেমোরিএল এৱার্দ ২০২৬ লান্থোকখি। এৱার্দ অসিদা লেংয়ান ফি, সাইতেসন, মমেন্তো অমসুং লুপা লীশীং ৫ য়াওখি।
অহানবা সেমিনারগী শরুক্তা এন প্রফুল্ল বিজয়ননা চেয়ার লৌখি। থৌরম অদুদা এ.কে শেরাম, খোইস্নাম বীরলা অমসুং এল মীনা না পেপার পাথোকখি।
এ.কে শেরামনা চেয়ার লৌদুনা মতুংদা পাংথোকখিবা অনিশুবা সেমিনারদা ডব্লিউ বীরমঙ্গল, কে ধীরেন অমসুং এল বীরমঙ্গলনা পেপার পাথোকখি।
থৌরমগী অরোইবদা অইবা অইবী ১২না শরুক য়াদুনা শৈরেং শৈদিন্নবর্গী থৌরম অমসু পাঙথোকখি, মণিপুরী সাহিত্য পরিষদ ত্রিপুরাগী জেনরেল সেক্রেতরি সেলৈবম খেলামোহননা ময়াম্বু থাগৎ ৱাহৈ ফোঙদোকখি হায়না আগরতলাদগী ফংবা পাউ অসিনা হায়রি।
0 কমেন্ট:
কমেন্ট তৌবিয়ু