বাংলাদেশ অমদি ত্রিপুরাগী য়াওনা ষ্টোল ১০৮ শরুক য়াদুনা মার্জিং পোলো কমপ্লেক্স হৈঙাংদা নুমীৎ ১২ নিং চুপ্না চত্থগদবা শিংজু ফেষ্টিভেল হৌদোকখ্রে
ইম্ফাল, দিসেম্বর ২৮ : বাংলাদেশ অমদি ত্রিপুরাদগী য়াওনা তোঙান তোঙানবা মফমশিংদগী শিংজু য়োনবীশিং অমদি অচা-অথক য়োনবী কয়াগী ষ্টোল ১০৮ লোম শরুক য়াদুনা মার্জিং খুভম কনবা লূফ, হৈঙাংনা স্পোন্সর তৌদুনা শিংজু য়োকখৎপা লূপ (এস ৱাই ও এল) না শীন্দুনা নুমীৎ ১২নি চুপ্না চত্থগদবা ৬লক শুবা শিংজু ফেষ্টিভেল চহী অসিগী ওইনা মার্জিং পোলো কমপ্লেক্স হৈঙাংদা ঙসি হৌদোকখ্রে।
শিংজু ফেষ্টিভেল হৌদোকপগী থৌরম শরুক য়াবা লাকখিবা ত্রিপুরাদগী তখেল্লৈমা তেংবাঙ লূপকী মীহুৎশিং অমদি কুহ্মৈ অসিদা স্পোন্সর তৌরকখিবা মীওইশিংবু তরাম্না ওকখি। থৌরম অদুগী অখন্নবা মীথুংলেন ওইদুনা চহী অসিগী শিংজু ফেষ্টিভেল ব্রান্দ এম্বসেদর ওইরিবী সুস্মিতা মংশাতাবমনা ফোঙদোকখিবদা, শিংজু হায়বসি লমদম অসিগী য়েলহৌঙৈদগী লৈরক্লবা চীঞ্জাক অমনি। শিংজু হায়বসি মমাংঙৈদগী হৌনা অদুম্মক শুপ্নগী মথেল অমা ওইনা চানবগী খক্তা খন্নরম্মী।
অদুবু কুহ্মৈ অসিদগী শিংজু অসি মমল য়াম্লবা অমদি লমদম অসিগী মরুওইবা লাই হরাওবা, ইপান থাবা, লমতা থাংজগী থৌরমশিংদা চঙদবা য়াদ্রবা পুৱারীদা শাগোন্নদুনা লাক্লবা চীঞ্জাক মখল অমনি। অমরোমদা, মীয়াম্না হৌজিক মিমি শিংজু হায়না য়াম্না পাম্না চানরিবা অসিনদি শিংজু অসি মুৎশিল্লক্লে হায়বদি য়ারোই। অদুবু ইপা-ইপু হাক্তক্তগী লৈরক্লবা শিংজুগী মশক অসিদি মুৎখিদনবা হোৎনমিন্নসি হায়খি।
থৌরম অদুদা অথোইবা মীথুংলেনগী ৱারোল পীরদুনা মিনিষ্টার খেমচান্দগী লোয়নবী য়ুম্নাম ওংবী জয়মালানা ফোঙদোকখিবদা, শিংজু হায়না মতম কুইনদগী খনগৎলক্লবা মনা-মশিংনা য়োম্লগা শেম্লিবা অসি মৈতৈগী চীঞ্জাক অমা ওইনা পোপ্যুলর ওইরক্তুনা ঙসিদি মণিপুরগী মপান্দসু শিংজু অসি সালাদ হায়না পাম্নবা হেনগৎলক্লি। ফেষ্টিভেল অসি য়াম্না মতিক চাই অমদি মগুন লৈবা ফেষ্টিভেল অমনি। লোয়ননা মতম অমদা শিংজু খক য়োনবনা ইমুং-মনুং ফাওবা পুন্নরম্মী হায়নসু ফোঙদোকখি।
বাংলাদেশ, ত্রিপুরানচিংবদগী মৈতৈ কয়া লাক্তুনা কুহ্মৈ অসি য়াওবা লাকপা হায়বসি য়াম্না নুংঙাই অমদি ঐখোয়গী ওইনদি য়াম্না লাইবক ফবনি। শিংজু ঐখোয় পুম্নমক্না য়োকখৎমিন্নসি হায়খি। থৌরম অদুদা ইম্ফাল ইষ্টকী অধক্ষ্য পি বিমোলা, মিনিষ্টার দিঙ্গোগী লোয়নবী ঐচ সিতা, ৱাংকৈ এ সীগী এম এল এ অরুন কুমারগী লোয়নবী থাংজম ওংবী পুর্ণিমাসি, পি দব্লিয়ু এফ মণিপুরগী পেত্রোন মেম্বার দব্লিয়ু হেমাবতি, শিংজু ফেষ্টিভেলগী ভাইস চেয়ারমেন এস প্রেমলতা অমদি চহী অসিগী শিংজু ফেষ্টিভেলগী ব্রান্দ এম্বেসেদর ওইরিবী সুস্মিতা মংশাতাবমনচিংবনা প্রেসিদিয়াম মেম্বারশিং ওইনা শরুক য়াখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু