সিনিয়র মিস্টার ইন্দিয়া কন্তেস্ততা মণিপুরনা টিম রান্নার্স আপ তারক্লে
ইম্ফাল, দিসেম্বর ২৭ : হন্দক্তা পাঞ্জাবকী লুধিয়ানাদা পাঙথোকখিবা ১৪ শুবা মিস্তার ইন্দিয়া মেন্স সিনিয়র নেসনেল বোদি বিল্ডিং চেম্পিয়নশিপ ২০২২ দা মণিপুরনা টিম চেম্পিয়নশিপ ২০২২ দা মণিপুরনা টিম চেম্পিয়ন্স ফার্স্ত রান্নার্স-আপ তারক্তুনা স্তেত অসিগী মিংচৎ পুরকখ্রে। স্তেত অসিগী বোদি বিল্ডিংগী ঈহৌগী চহী ৭২ গী পুৱারীদা হন্দক্কী সিনিয়রগী নেসনেল কম্পিতিসন্দা ফার্স্ত তিম রান্নার্স-তারকপা অসিনা খ্বাইদগী চাউবা এচিভমেন্ত অমনি হায়না ওল মণিপুর বোদি বিল্ডার্স এসোসিয়েসন্না (অম্বা) লৌরি।
চাউনা মায় পাক্লকখ্রবা মণিপুরগী তিম্বু ঙসি এসোসিয়েসন অদুগী খুমন লম্পাক স্পোর্টস কমপ্লেক্স ইম্ফালদা লৈবা ওফিসতা হরাও তয়াম্না ওক্তুনা পূক্নিং থৌগৎখি। থৌরম অদুগী সাইদ লাইন্দা অম্বাগী জেনারেল সেক্রেটারি য়ূম্লেম্বম সুমন্তনা পাউমীশিংদা হায়খি, লৈবাক অসিগী স্তেতশিংগী মরক্তা মণিপুরগী সিনিয়র বোদি বিল্ডারশিংনা মকোক ওইরকপা হায়বসি ঐখোয় খুদীংমক্না চাউথোকচবা পোকই। অম্বানা চহী ৭২ চূপ্না স্তেত অসিদা শাগৎচরকপা বোদি বিল্ডিং ঈহৌদা মসিনা সিনিয়রগী থাক্তা তানবা ঙম্বা খ্বাইদগী চাউবা এচিভমেন্তনি।
সিনিয়র নেসনেল চেম্পিয়নশিপ অদুদা রেলওয়েজ স্পোর্টস প্রমোসন বোর্দনা পোইন্ত ৩১৫ ফংদুনা তিম চেম্পিয়ন ওইখি, অদুগা মণিপুরনা অপূনবা পোইন্ট ১২৫ ফংদুনা ফার্স্ত রান্নার্স আপ টিম তাইতেল লৌরকখি। মণিপুরনা চেম্পিয়নশিপ অদুদা শরুক য়াখিবা স্তেত ২৭ তগী খ্বাইদগী মাঙজিন থাবা মফম অদু কনবা ঙমখি। মণিপুরনা গোল্ড অহুম, সিলভার অহুম লৌরকখি।
সুমন্তনা মখা তানা হায়, রেলওয়েজ নত্তবা অতৈ গভর্ণমেন্তকী স্পোর্তস বোর্দ তরুক অমসুং লৈবাক অসিগী অতৈ স্তেত ২৭তগী মাঙজিন থারকপা হায়বসিদা স্তেত গভর্নমেন্তনা ঐখোয়গী বোদি বিল্ডিংগী ঈহৌ অসিদা অহেনবা মিৎয়েং চঙহন্নিংঙি। মশান্না অসি নন-ওলিম্পিক দিসিপ্লিন অমা ওইরগসু স্তেত অসিগী শান্নরোয়শিংনা মাঙলোমদা চঙশিল্লক্লিবা অসিদা গভর্ণমেন্তনা অহেনবা মিৎয়েং চঙবীরগদি হেন্না চাউবা বোদি বিল্ডিংগী মায় পাকপা ঈহৌ অমা শাগৎপদা শোয়দনা মতেঙ ওইগনি হায়বসি ঐহাক্কী অচেৎপা থাজবনি।
অম্বা স্তেত গভর্ণমেন্তনা রিকগ্রিসন পীরিবা বোদি অমনি হায়রদুনা সুমন্তনা হায়, স্তেত অসিদা বোদি বিল্ডিং মশান্নদা থৱায় য়াওনা চঙশিল্লিবা শান্নরোয়শিংনা অচুম্বা গভর্ণমেন্তনা শক খঙবীরিবা বোদি বিল্ডিংগী গভর্ণিং বোদিগী মখাদা শান্নবীয়ু। শান্নরোয়শিংগী মমা মপা ওইবশিংনসু মশান্না অসিদা মখোয়গী অঙাংশিংবু মশক থোকপা কেরিয়ার অমা শেমজনবা হোৎনবদা গভর্ণমেন্তনা মশক খঙবা বোদিগী মখাদা লৈবা ইনস্তিত্যুসনশিং অমসুং জিম্নাসিয়ামশিংদা থাবীয়ু। মসিনা অঙাংশিংগী তুংগী পুন্সিদা য়াইফবা মশক থোকপা বোদি বিল্ডারশিং ওইবা ঙমগনি। মহাক্কী এসোসিয়েসনগী মখাদা হৌখিবা শান্নরোয় কয়অ পেরামিলিটারি ফোর্সশিং, আর্মিনচিংবা অমসুং অতৈ পাব্লিক সেক্টরশিংদা মখোয়গী থবক ফংদুনা মশক থোকপা বোদি বিল্ডিংগী কেরিয়ার মায় পাক্না শেমজবা ঙম্লি হায়বসি মীয়াম্না খঙনরবা ঙাক্তনি। মসি নৌনা নীংশিংবসু মথৌ তাদব্রা খল্লি।
নেসনেল চেম্পিয়নশিপ অদুদা মায় পাক্লকখ্রবা শান্নরোয়শিংনসু মখোয়দা হেন্না হোৎননিংবগী থৌনা অদু পোকহন্নবা স্তেত গভর্ণমেন্তনা মখোয়গীদমক পায়খৎপা য়াবা থৌরাংশিং পায়খৎহন্নিংবগী অপাম্বশিং ফোঙদোক্নখি। লুধিয়ানাগী নেসনেল চেম্পিয়নশিপ অদুদা মণিপুরগী এল নেতানা নুপাগী বোদি বিল্ডিংগী কেজি ৫৫গী কালূপ্তা, অদুগা কেজি ৮৫ কী কাংলূপ্তা মেরাদোনা ক্ষেত্রিময়ূম্না অমসুং মেন্স ফিটনেস ফিজিক্তা মাইবম রোবার্তনা গোল্ড মেদেলশিং লৌরকখি। রোয়েল জিম নিঙোমথোংগী মেলসন নোংমৈকাপম্না মেন্স বোদি বিল্ডিংগী কেজি ১০০গী কাংলূপ্তা সিলভার মেদেল লৌরকখি, অদুগা মহাক্কী জিমগী জয়জিৎ ৱাইখোম্না মেন্স এথলেতিক ফিজিক্কীদা সিলভার অমসুং বোবি গোল্ডেন জিম কাঞ্চিপুরগী মঙাল অরম্বম্না মেন্স ফিতনেস ফিজিক্কী ওপেন্দা সিলভার লৌরকখি। আর সি সি য়াসকি ৱারশিম চেসাম্না মেন্স স্পোর্তস ফিজিক্কী সেন্তিমিটার ১৬৫কী মথক্কীদা মরিশুবা মফম কল্লকখি।
চেম্পিয়নশিপ অদুদা আর সি সি য়াসকী লমজিংবা নিংথৌজম, লাইফস্টাইল জিম সঙাইপ্রৌগী এম রোনাল্ড সিংহ অমসুং মণিপুর পুলিস স্পোর্তস ক্লাবকী এল সুভাশচন্দ্র সিংহনা মথংশিৎনা মেন্স বোদি বিল্ডিং গী কেজি ৬০, কেজি ৭০, কেজি ৭৫ অমসুং কেজি ৮০ গী কাংলূপ্তা কম্পিত তৌখি। মণিপুরগী টিম অদুবু অম্বাগী প্রেসিদেন্তকী থৌসু পুরিবা এন রতননা কোচ অমসুং এস ধ্রুব সিংহনা টিম মেনেজার ওইনা লুচিংখি।
সোর্স: পোক্নফম
0 কমেন্ট:
কমেন্ট তৌবিয়ু