বাংলাদেশতা এম কে বিনোদিনীগী ১০০সুবা মপোক কুমওন
সিলেট, অক্টোবর ১৪ : মণিপুরী সাহিত্যদা য়াম্ন ইচং থৌরবা শকনাইরবা অইবী মহারাজকুমারী বিনোদিনী মণিপুরী সাহিত্যদা মহাক্কী থৌদাং পাক শন্না লৈখ্রবা অদুগুম্লবা মীশক অমনি। মহাক্না মণিপুরী সাহিত্যগীদমক মফম অয়াম্বদা খুৎ থারম্লদুনা মীয়ামদা খংহন্নবা হোৎনরম্মি। সানা কোনুংদা পোক্লবসু মীয়ামগা নকশিন্না তিন্ননবা হোৎনরম্বা অসিবু ইচম চম্বা মী অমগিী গুণ ফোংদোকলম্মী। সাহিত্যবু নুংশিজবা, লুপ অমবু শৌগৎপদা করি থৌদাং লৌফম থোকই হায়বনচিংবা মহাক্কি ওয়াখল্লোন্দগী খংবা ঙম্মি। অদুনা মহাকপু লিজেন্ড অমনি হায়বদা হায়মন্বা থোকলোই হায়না এম কে বিনোদিনীগী পুন্সি ৱারী লিবদা ফোংদোক্নরকই।
বাংলাদেশ মণিপুরী সাহিত্য সংসদ সেন্ট্রাল কমিটি অমদি ছোটধামাই ব্রাঞ্চকা খুৎশমন্দুনা ঙসি ১৪ অক্টোবর’২২ ইরাই নুমিৎ জুড়ি উপজেলাগী মনুং চন্না লৈবা মণিপুরী শিল্পকলা একাডেমী, ছোটধামাইদা অয়ুক পুঙ ১১ তাবদা মহারাজকুমারী বিনোদিনীগী চহী ১০০ সুবা মপোক কুমওনগা মরী লৈননা ইকাইখুম্নবা ফোঙদোকপগী থৌরম অমা পাংথোকখি।
বামসাস সেন্ট্রাল কমিটিগী জেনারেল সেক্রেটারী নামব্রম শংকরনা কন্ডাক্ট তৌরদুনা ছোটধামাই ব্রাঞ্চকী প্রেসিডেন্ট অহৈবম রণজিতনা মীফম মপু ওইরদুনা জুড়ি উপজেলা পরিষদকী মহিলা ভাইস চেয়ারম্যান অনৌবম রনজিতা শর্মানা অথোইবা মীথুং ওইখি। অখন্নবা মীথুংদা এল জয়ন্ত, প্রেসিডেন্ট, মণিপুরী কালচারেল কমপ্লেক্স, চবুংবম কুঞ্জেশ্বর সিংহ, রিটায়ার্ড হেড মাস্টার, এল প্রশান্ত সিংহ, ভাইস প্রেসিডেন্ট, বাংলাদেশ মণিপুরী সাহিত্য সংসদ অমদি এল ইবুংহাল সিংহ শ্যামল, জেনারেল সেক্রেটারী, মণিপুরী ভাষা গবেষণা ও উন্নয়ন সংস্থা।
অহৌবদা এম কে বিনোদিনীগী ফটোদা হৈকৎ-লৈকৎ কৎতুনা থৌরম হৌদোকখি। কবি এ কে শেরামনা এম কে বিনোদিনীগী পুন্সি ৱারীগা মরি লৈননা কী-নোট পেপার পাখি। থৌরম অসিগা মরি লৈননা ৱা ঙাংখি ফানজৌবম ভাগ্য সিংহ, ফানজৌবম সমরজিত, হামোম প্রবিত, সিবেন সিংহ অমসুং মহারাজকুমারী বিনোদিনীনা ইথোক্লম্বা শৈরেং থিদুনা তাহনখিবা কৈনাহন দেবী, রওশন আরা বাঁশি, অয়েকপম অঞ্জু, আওয়াংতাবম সমরেন্দ্র অমদি শ্যামলী দেবী।
0 কমেন্ট:
কমেন্ট তৌবিয়ু