আপডেট:
image

ফিফা আন্ডার ১৭ ৱুমেন’স ৱার্ল্ড কাপতা ইন্দিয়াগী টিমদা মণিপুরী ৭ য়াওরে

ভুবনেশ্বর, অক্টোবর ৫: থা অসিগী ১১দগী ইন্দিয়ানা য়ূম্বু ওইদুনা পাঙথোক্কদৌরিবা ফিফা আন্ডার ১৭ ৱুমেন’স ৱার্ল্ড কাপকীদমক হেদ কোজ থোমাস দেন্নরবিনা য়ূমশকৈশা নুমিৎতা মেম্বার ২১ না শাবা লৈবাক অসিগী টিম লাউথোকখিবদা মণিপুরগী শান্নরোয় তরেৎ য়াওখ্রে। ৱার্ল্ড কাপকি ইন্দিয়াগী টিমদা য়াওরিবা মণিপুরগী শান্নারোই তরেৎ অদুদি গোলকিপ্পরদা মোনালিশা মোইরাংথেম অমসুং মেলোদি চনু কৈশামনি। দিফেন্দারদনা শিল্কি হেমাম অমসুং মিদফিল্ডারদা ববিনা লিশমনি অদুগা ফোরৱার্দতনা লিন্দা কোম সর্টো, রেজিয়া লাইশ্রম অমসুং শেলিয়া লোকতোম্বমনি।

হন্দক্কী ৱার্ল্ড কাপ অসিদা য়ূম্বু ইন্দিয়ানা গ্রুপ এদা য়ুনাইটেদ ষ্টেটস, মোরোক্কো অমদি ব্রাজিলগা পুন্না তামিন্নরিবনি। ইন্দিয়ানা অেক্টোবর ১১দা য়ুনাইটেদ ষ্টেটসকা ভুবনেশ্বরগী কলিঙ্গা ষ্টেদিয়ামদা লম্বা তৌনরবা মতুং অক্টোবর ১৪ অমদি অক্টোবর ১৭ তনা মথংশিৎনা মোরোক্কো অমসুং ব্রাজিলগা অমুক মায়োক্নগনি।

মালেমগী লেমজনিংঙাই ওইরবা টূর্নামেন্ট অসি অক্টোবর ১১দগী৩০ ফাওবা ভুবনেশ্বর, গোৱাগী মার্গাও অমদি নভি মুম্বাইদা পাঙথোক্কদবনি অমদি ভুবনেশ্বরগী কলিঙ্গা ষ্টেডিয়ামনা ইন্দিয়াগী পুল মেটচ অহুমগী য়ূম্বু ওইগনি। ইন্দিয়াগী টিমদা য়াওরিবা প্লেয়ারশিং অদুদি গোলকিপ্পারদা মোনালিশা মোইরাংথেম, মেলোদি চনু কৈশাম অমসুং অঞ্জলি মুন্দানি। দিফেন্ডারদা এষ্টম ওরোন, কাজল, নাকেটা, পূর্ণিমা কুমারি, ভার্শিকা অমসুং শিল্কি হেমামনি। মিড ফিল্ডারদনা ববিনা লিশম, নিটু লিন্দা, শেলজা অমসুং শুভাঙ্গি সিংহনি। ফোরৱার্দতনা অনিটা কুমারি, লিন্দা কোম সর্টো, নেহা, রেজিয়া লাইশ্রম, শেলিয়া লোতোম্বম, কাজোল হুবার্ট দিসুজা, লাভনয়া উপাধ্যায় অমদি সুধা অঙ্কিটা টির্কিনি।

মালেমগী ওইবা ফূটবোল মশান্নগী চহি ১৭ কি মখাগী কম্পিটিসন অসিদা হন্দক ইন্দিয়ানা শরুক য়াগদৌরিবা অসিনা নুপী টিমগী ওইনদি ইহান হানবনি। পনবা য়াবদি হৌখিবা চহি ২০১৭ দা পাঙথোকখিবা আন্দার ১৭ মেন’স ৱার্ল্ড কাপতা ইন্দিয়াগী টিম শরুক য়াখিবগা লোয়ননা ইন্দিয়াগী টিম অদুদা মণিপুরগী নুপামচা শান্নরোয় নিপা-ধিরাজ, বোরিস, সুরেশ, নিংতোইঙম্না, অমরজিৎ, জেকসন, নোংদম্বা অমসুং শাহজাহান য়াওখিবনি।

নুপীশিংগী ওইনা অহানবা ওইনা আন্দার ১৭ ৱার্ল্ড কাপতদা শরুক য়াগদবা অসিগা মরী লৈননা হেদ কোচ দেন্নরবিনা হায়, ‘হন্দক্কি অসি পূম্নমক্কি ওইনা অনৌবা ফীবম অমনি। ইন্দিয়ানা মমাঙদা ৱার্ল্ড কাপ (নুপী) দা অমুক্তা শান্নখিদ্রি। মসিদি পুমতোপ তোপ্পা ফুটবোলগী গেমনি।’

‘ঐখোয়ান নীংথিনা শেম-শারে হায়বা মীয়ামদা খঙহনবগী য়াম্না মশক থোকপা তাঞ্জিনি, ঐখোয়বু কনামত্তনা নমথবা য়ারোই’ হায়না হেদ কোচনা ফোঙদোকখি। শান্নরোয়শিংনা তৌগদবশিংগী মতাংদা পল্লদুনা মহাক্না হায়, ‘ফিল্ডদবু চঙখ্রবদি পূম্নমক কাউথোক্লগা শান্নবা অদুখক্তদা মীৎয়েং থমগদবনি, মসিনি ঐখোয়গী নুপীমচাশিংনা শোয়দনা তৌগদবসু।’ ‘ঐখোয় টূর্ণামেন্ট অসিগী মীয়াম্না য়াম্না পাম্নবা টিম ওইনা শরূক য়াগদবা নত্তে, ঐখোয়গা লাম্বা পাগদৌরিবশিংনা অকনবা প্রেশার লৈগনি হায়না থাজৈ’ হায়বা ৱাফম মহাক্না থমখি।

শান্নবুংবু য়ৌখ্রবদি নীংথিনা পাঙথোকপা অদুনি মথৌ তারিবদি হায়বা ৱাফম থম্লদুনা হেদ কোচনা হায়, ‘নীংথিনা পাঙথোকপনা খ্বাইদগী হেন্না মরুওইবনি। ঐখোয়গী নুপীমচাশিংনা পাখৎ-থুক্কৎপা তৌরোই, মশাদা থাজবগা লোয়ননা নীংথিনা শান্নগনি হায়না থাজৈ। নীংথিনা শান্নবগা পাখৎপা-থুক্কৎপগা পুনবা য়ারোই। হনবা লৈতনা ফজনা শান্নবা তাই।’

অমরোমদা থাসিগী ১১দগী হৌগদৌরিবা আন্ডার ১৭ ৱুমেন’স ৱার্ল্ড কাপতা শান্নরোয়শিংনা নীংথিনা শান্নদুনা মায় পাক্লকপা ওইসনু হায়বা ৱাফম ইয়ং ওয়েলফিয়ার ক্লাব, ৱাই দব্লিয়ুসি, লংথবালগী চেরোল অমনা ফোঙদোরক্লি। পনবা য়াবদি ইন্দিয়াগী শান্নরোয় ২১ না শাবা টিম অদুদা মণিপুরগী নুপীমচা শান্নরোয় তরেৎ য়াওরকপগা লোয়ননা মণিপুরগী য়াওরক্লিবা তরেৎ অদুগী মনুংদা ৱাইদব্লিয়ুসি লংথবালগী শান্নরোয় মঙা য়াওরি।

ইয়ং ওয়েলফেয়ার ক্লাব লংথবালগী শান্নরোয় মঙা য়াওরকপদা ৱাইডব্লিয়ুসি লংথবালনা হরাউ তয়াম্বা ফোঙদোরকপগা লোয়ননা ইন্দিয়াগী টিমনা অফবা পার্ফোমেন্স পীদুনা লৈবাক অসিগী মিংচৎ পুরকপা ঙম্বা ওইসনু হায়না ক্লাবনা য়াইফ পাউজেল পীরক্লি। ৱার্ল্ড কাপ অসিগীদমক মণিপুরগী শান্নরোয় তরেৎ খল্লকপগী মনুংদা ৱাইডব্লিয়ুসি লংথবালগী য়াওরকখিবা শান্নরোয় মঙা অদুদি হেমাম সিলকি, লিন্দা কোম, কৈশান মেলোদি, লিসম ববিনা অমদি লাইশ্রম রেজিয়ানি।

আন্ডার-১৭ ৱার্ল্ড কাপ অসিদা ইন্দিয়াগী টিমনা অফবা পার্ফোমেন্স পীদুনা নেসন অসিগী মায় পার্ফোমেন্স পীদুনা নেসন অসিগী মায় পাকপা পুরকপা ঙম্বা ওইসনু হায়না ইয়ং ওয়েলফিয়ার ক্লাব লংথবাল ঈশ্বরদা থৌনিজরি হায়বা ৱাফমসু থম্লক্লি। হন্দক্কি ৱার্ল্ড কাপ অসিগীদমক মণিপুরদগী নুপীমচা ১১ ট্রাইয়েলগী কৌরকখিবগা লোয়ননা জমশেদপুরদা কেম্প তৌখিবনি। মখা তারকপদা উরিষ্যাদা অমুক কেম্প তৌবগা লোয়ননা অরোয়বা রাউন্দগী খনগৎখিবা মণিপুরগী নুপীমচা তরেৎকি মনূংদা তরেৎমক খল্লকখিবনি।

সোর্স: সঙাই এক্সপ্রেস      

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু