নারান খামারদা চোংথা মিয়া নীংশিং থৌরম
আগরতলা, জানুয়ারী ২০: ইংকুমজা ১৮৯১ গী মণিপুরগী খোংজোম লান্দা কমান্ডর ওইরম্বা নীঙতম লান্মী মেজর চোংথা মিয়ানা লৈখিদবা চহী ১১৬ শুবা নীংশিং নুমিৎতা ত্রিপুরা অমসুং মণিপুরদা শ্রদ্ধাঞ্জলি কৎখ্রে। ঙরাং জানুয়ারি তাং ১৭, মেজর চোংথা মিয়া মেমোরিয়েল ট্রাষ্ট ত্রিপুরানা শীন্দুনা নারান খামারদা সিনাই তুরেল তোর্বান্দা তর্পন কৎতুনা নুংথিলদা চোংথা মিয়া কমপ্লেক্সতা পাঙথোকখিবা থৌরম অমদা নীংতম লান্মী অসিগী মীতমদা হৈকৎ-লৈকৎ তমদুনা ইকাইখুম্নখি।
থৌরম অদুদা ট্রাষ্টকী প্রেসিডেন্ট গুরুময়ুম নিতাই শর্ম্মানা থৌরম মপু ওইখি। পনবা য়াবদি বৃটিশনা কালাপানিদগী থাদোকখিবা মতুং মহাক চহী খরা বৃন্দাবনদা লৈরগা ত্রিপুরাদা নারান খামারগী চোংথাম শাগৈগী লৈকায়দা খুন্দানা লৈখি। ইং ১৯০৮ জানুয়ারি ১৭, অহল ওইরদুনা পুন্সিগী অরোইবা য়াহিপ তানখি। নারান খামারদা হৌজিক চোংথাম শাগৈ অমত্তা লৈত্রে অদুবু চহী খুদিং মহাক্না লৈখিদবা নুমিৎ অসি তর্বন শন্দুনা হৈকৎ লৈকৎ তমদুনা অথৌববু ইকাইখূম্নৈ।
হন্দকসু থৌরম অদুদা চৌমুহনী বাজার পঞ্চায়েত উপ-প্রধান গুরুময়ুম গৌরহরি শর্ম্মা, ফানজৌবম গৌরচান্দ, নাওরেম ব্রজেন্দ্র নচিংবা শরুক য়াখি। থৌরম অদুদা নীংতম লান্মী চোংথা মিয়াগী পুন্সি ৱারীদা নৈনদুনা ট্রাষ্টকী সেক্রেটারী হৈগ্রুজম গন্ধেশ্বরীনা ৱা ঙাংখি। ইম্ফালদগী ফংবা পাউ অমদা নাগা মপালগী সিংজুবুং লৈরক্তা খিন্না লৈবা চোংথা মিয়া মীতমদা হৈকৎ লৈকৎ তমদুনা ইকাইখুম্নখি হায়রি।
সোর্স: মরূপ
0 কমেন্ট:
কমেন্ট তৌবিয়ু