• 459
• ২৪শে মে ২০২৫ ইং
• Share on:

থাজবা মাংনরক্লবা খুনাই অমদি মীনুংশিগী ঈরিকনা নাথৈরক্লবা মীওইবদা য়েন্নিংগী ইনোৎ পীরিবা লাইরিক ‘নাউপুরিবা নুমিৎ’- মীয়েং খরা  -- তোংব্রম অমরজিৎ

অশৈব মৈরাগী পুকনিংগী ৱাফম খর লাইরিক অসিদা ইরিবসিদসু হায়রি, “শৈরেংবু ঐনা কয়ামুক য়াম্না নুংশিজবগে হায়ববু শৈরেং ইবা মী খূদিংমক অচুম্বা ঙাঙলমগনি খল্লি। শৈরেংদদি মীনম্বা য়াদে হায়বসি ঐগী অচেৎপা থাজবনি।” থাজবা মাংদ্রিবা পুন্সিবু লুনা নুংশিনা খল্লিবা অমদি খুনাইবু শেমগা শাগৎচনিংবা অমদি অফবা করিগুম্বা খরদি পুন্সিনা হিংলিঙৈদা পাঙথোকলমগদবনি হায়বগী ফিলোসোফিদা চেৎনা থাজবা অইবনি।

লাইরিক্কী মমিং- নাউপুরিবা নুমিৎ (২০২৪) 
অইবা- ওসি মৈরা
অফোঙবা- ফিক্সন এন্দ পোইট্রি ক্লব, মণিপুর
লাইরিক্কী মখল-শৈরেং
লাইরিক্কী মখুম- লণ্ডন কৈথেল্লাকপম
লাইরিক্কী মমল- লুপা ৩০০/-
 

‘অয়ুক্কী অতিয়া’ হায়না মিংথোনবা শৈরেংগী লাইরিক অমা ২০০৭দা অহানবা ওইনা ফোঙলবা মতুংদা ‘নাউপুরিবা নুমিৎ’ হায়না মিংথোন্দুনা শৈরেং লাইরিক অমা ২০২৪দা চহী ১৮গী মতুংদা অনীশুবা লাইরিক ওইনা ফোঙলক্লিবসি অইবদা য়াওরিবা শৈরেং ইনিংবগী ইহুল অমা থম্মোয়দা ফাওরিবা, করিগুম্বা খরদি তম্নিংলিবা অকনবা লীচিং অমা য়াওরি হায়বসি তশেংনা উবা ফংই। অশৈব মৈরাগী পুকনিংগী ৱাফম খর লাইরিক অসিদা ইরিবসিদসু হায়রি, “শৈরেংবু ঐনা কয়ামুক য়াম্না নুংশিজবগে হায়ববু শৈরেং ইবা মী খূদিংমক অচুম্বা ঙাঙলমগনি খল্লি। শৈরেংদদি মীনম্বা য়াদে হায়বসি ঐগী অচেৎপা থাজবনি।” থাজবা মাংদ্রিবা পুন্সিবু লুনা নুংশিনা খল্লিবা অমদি খুনাইবু শেমগা শাগৎচনিংবা অমদি অফবা করিগুম্বা খরদি পুন্সিনা হিংলিঙৈদা পাঙথোকলমগদবনি হায়বগী ফিলোসোফিদা চেৎনা থাজবা অইবনি। অতিয়া অমদি লৈচিল নোংফাই তোয়না য়েংদুনা ঙাওজরিবশিং, চীং পাৎ তুরেলগী ফজবা শক্তমদা পুকনিং হুবা ঙম্লিবশিং মখোয়গী মীৎয়েং ৱাখল য়াম্না পাক চাওই। শৈরেং মিংথোল অনীমক স্যিম্বোলিক ওই। আশা মাংদ্রিবা, আশা পিরিবা শৈরেংনি হায়দবা ঙমদে। শৈরেংবু থৱায়মকনি খল্লিবশিংদা… কচ্চবা লাইরিক নাউপুরিবা নুমিৎ। 

ওসি মৈরা ১৯৭৭গী ওগস্ট ১৯দা ইম্ফাল ইস্টকী চনাদা পোকই। মীয়াম্না হেন্না খঙনবা মিং অসিমক ইবগী লমদা শিজিন্নবা মিংনি। অশেংবা মিংদি ওইনাম মৈরা কৌই। ওইনাম তুনান (চনা লুখোই) অমদি খাইদেম নুংথিলচাইবী (চনা লেম্বী) অনীগী অহুমশুবা মপারীনি। আসাম য়ুনিভর্সিতিদগী এম এ (মণিপুরী) লোইশিনখি। এ আই আর, ইম্ফাল এপ্রুভ তৌরিবা আর্টস্টনি। শিনফমদা চঙলক্তুনা হুইয়েন লানপাউ মীতৈ ময়েক এদিসনগী ইগজেক্যুটিভ এদিটর ফাওবা ওইখি। 
অইবগী ফোঙখ্রবা লাইরিকশিংদি- অয়ুক্কী অতিয়া (শৈরেং, ২০০৭), কাইদোংফম (ৱারেং, ২০০৮), শক্তম খরা ৱাখল্লোন খরা (ৱারেং, ২০১১) অমসুং থম্মোয় পাউদম (ৱারেং, ২০১৬)নি। অইবা অসি ফিল্ম মেকর অমা ওইনসু ফীচর তরামাথোই, দোক্যুমেন্টরি ফিল্ম অহুম অমসুং শোর্ট ফিল্ম তরারোম দিরেক্সন পীখ্রে। 
অইবসি পেট্রিওটিক রাইটর্স ফোরম, মণিপুরগী ফাওন্দর সেক্রেটরিনি। রাইটর্স ফোরম, ইম্ফাল; অশৈ ৱাফোঙ য়োকখৎলূপ, ইতম নুঙ্গোই; ফিক্সন এন্দ পোইট্রি ক্লব, ইম্ফাল অমসুং শৈপালগী লাইফ মেম্বরনি। অইবনা কলাগী লমদা লৌরিবা থৌদাংশিংবু শকখঙদুনা খোরিলোল অমদি ফিল্মগী লূপ কয়ানা মনা- মথুম কয়াসু পীখ্রে। মনাশিংদুগী মনুংদা চীং-তম অপূনবা শৈশক লূপ্না ‘বেস্ট লিরিসিস্ট এৱার্দ- ২০১৪’, সাহিত্য সেবা সমিতি, ককচিংনা ‘চন্দ্রশখি লাইশ্রম চুম্থাঙ সাহিত্য মনা- ২০১৬’, মনিপুর থিয়েটর সেন্টর, আসাম্না ‘ৱাহেংবম ওঙবী মোম্বী দেবী মেমোরিয়েল এৱার্দ- ২০১৭’ পীদুনা ইকায়খুম্নখ্রবা অইবনি।   
‘নাউপুরিবা নুমিৎ’ শৈরেং লাইরিক অসিদা পুন্না শৈরেং ৭৩ য়াওরি। ‘লৈকংলা’ মিংথোনবা শৈরেং অমনা লাইরিক অসিগী শৈহৌ শৈরেং ওইরি। ঙসি গ্লোবেল ক্লাইমেট চেঞ্জকি শফু কল্লবা মৈশা মরক্তা কবিনা ইরক্লিবসিদা য়াওরি মীওইবা মশানা তৌজবা কর্ম্মগী ফল মশানা ফংজবা হৌরক্লিবা অইং অশা খল কায়রকপনা ওইহল্লকপা খুদোংথিবা অমদি মাংজবশিং। কবিনা ইরক্লি, “ ফিরাংজি থাবগুম্না/ শন্দোক্তুনা লৈরিবা/ ফোঙ-ফোঙ শারবা লৈঙোয়লমদা/ নেৎ- নেৎতুনা শারি জগোই/ উটকি মখোঙনা/ মনমদা পোৎলুম পুনা-পুনা।/ মরাল খঙজদনা/ খাংদা ঙৌবগুম্না শারবা/ লৈঙোয়লমগী/ লৈঙোয় মকূপশিংনা খাঙলি/ চাউরবা উটকী/ খোঙপাকনা নেৎথরকপগী চৈনা।/ ওনশিন্নদুনা হংনরি/ অমনা অমদা/ কয়াম ৱাৼলিবগে উমং য়ৌগদবা? ”  (লাঃ১৫) ফজরবা ইমেজরিশিংদা চেল্লিবা পাউজেলসি হন্না হন্না পারগা থোক্লক্কনি শৈরেংসিনা করিনো হায়নিংবসি হায়বদো। মীওইবনা ঙসি মহৌশাগী মশাইকোলদগী লাপ্না থোক্লক্লে হায়বসি অইবগী ফজরবা লৈঙোই লমগী ইমেজরি অমদি উটকি শক্তম অসিনা ফোংদোকপা ঙম্লি। লৈকংলাগী ৱাংমদা উমংশিংনা লৈরি হায়বদু নীংশিংহল্লি অপাবশিংদা। অসিনা ইকো কন্সিসেস ওইবা প্রকৃতিগা নকশিন্নহন্নিংবগী ইঙ্গিৎশিং ফোংদোক্লি। 

অপংবগী মরল অশিংবনা চাবা, অশোন-অনাগী শরুক মুল্লগা শক্তি লৈবা তান্নরিবা, মশাগী ইন্তেগ্রিতি লৈত্রবা, হায়খিবা ৱা অমা ফাওবা ঙাকপা ঙম্নরকত্রবা মহাম তারক্লিবা, হামচৎনবশিংনা নম্না লৈঙাক চূক্লি পায়দুনা মশিং মশোন নাইনা খুনাই লমজিংলিবনি তৌরক্লিবা খুনাই অমদা ইচুদা চুনরক্লিবা শৈরেংনি ‘মীফম ৱারেপ’ খজিক্তং সেতাইয়র ওইনসু ইবগী স্তাইল অমা লোয়নদুনা হায়রক্লি, “ শায়োকশঙ।/ নুংথিল/ খন্ন-নৈনবা মীফম।/ ঙমদ্রবদি কাবা/ উতোন ৱাতোনদা/ চোংবা ঙমদ্রবদি/ উশা অমদগী উশা অমা/ অফং অফংবা/ মুন-মুনদুনা চাদ্রিমখৈ/ লৈবা ঙম্লোই মফমদুদা…” 
‘হিদান্নরিবা খুঙ্গং’ পুন্সিগী অশেংবা মশক উনিংলবদি তৌশিন্নবা য়াওদ্রবা, মীনম্বা হৈত্রবা খুঙ্গংগী লেন্দসকেপ অমদি মীনুংশিগী ঈরিকনা থন্না চেল্লিবা খুঙ্গংদা উবা ফংগনি হায়বসিদা য়ুম্ফম ওইদুনা  শৈথারকপনি শৈরেং অসিমক কবিনা। মৈরানা ইরক্লি, “ খুঙ্গংগী নিংথাদা চাউরকপনিনা/ নম্লি হকচাংগী কয়াৎ খুদিংমক/ খুঙ্গংগী মনম,/ খঙলি খুঙ্গংগী ফজবা…/ নাপ্পসিদা তারি/ খুঙ্গংগী নুংশিরবা খুল্লং ঈশৈগী খোন্থাং/ পাম্বীশিংনা মিহুল হুনবগী শাহুমসু…/ নুমিদাংৱাইরম খূদিংগী/ নুমিৎনা লূপখি ঈরোন্নুংদা/ হয়েংগী অঙনবা অয়ুক্তা/ মিতম্লক্কদবা/ অনৌবা নুমিৎ ওইনা/ শিন্নরকনবা লৈজবা মঙাল পূম্নমক।/ ওইজনিংই মোংফমসু খুঙ্গংদা।/ খুঙ্গংদদি পুন্সিগা থবক্কা হিদান্নদুনা লৈ…” (লাঃ ১৯) মসিনা ওইরমগনি খুঙ্গংগী পুন্সিবু কল্লকচনা হায়রম্লিবা কবিশিংনা "Villages are where the world's heart beats the loudest." "Simplicity and serenity find their home in village life." "A village is a symphony of nature and humanity." 

‘লায়রববু ৱাব্রা?’ ৱাহং অসিমক হংনা হংনা লায়রবগী নুংঙাইবা মৈশা খাঙদবা কনানদি খঙলোই ৱাহং অসিগী ৱাহন্তোক। শৈরেং অসি য়াম্না তেল্লি অদুনা য়াম্না ফজবা শৈরেংনি হায়দবা ঙমদে। শৈরেং অসিনা হায়নিংবদু পরেং খরদা লোয়না ফোঙদোকপা ঙম্লে খল্লি। মৈরানা ইরক্লি, “ ঐঙোন্দগী হেন্না ৱাব্রনে/ লায়রবা নহাকনা?/ অসুমক তোন্না/ কোনুংদা হিংবগুম/ হিংলব্রনে খাংপোকশঙসিদা? …” (লাঃ ২১) খুনাইগী লৈরিবা সিস্তেম, শেনমিৎলোন, লায়রবা ইনাকখুনবগী পল, অচৌ মচাগী কাংলুপ মসিগী ক্লাস এন্ড কনফ্লিক পুম্নমক কোনুং অমদি লায়রবগী ইমেজরিদা পুথোক্তুনা ইরক্লি। মসিনি শৈরেংগী ফজবা। 
‘কূমহৈগী কৈথেল’ শৈরেং অসিদা উরিবসি মীখল অমদি মীয়াম্নি। শোয়রবা খুদিথিরবা খুনাই অমগী মশকনি। হন্না হন্না য়াই থারি প্রোপাগন্দা পোলিতিক্সতা। থাজরি মীয়াম্নদি লাকখিনি অশেংবা লুচিংবা অমা। মঙদি মঙলি অদুবু কূমহৈগী কৈথেলসিদা উরিবসিদি অসিনি হায়বদু ইরক্লি কবিনা, “ কূমহৈ!/ মঙক হাইগৎনীংবা/ মশোং ফন্নীংবশিংনা/ শুম্লি মহী তপ-তপ তাবমখৈ/ য়োৎকী কোলুদা/ পাম্বৈ লৈজদ্রবশিংগী থম্মোয়।/ কূমহৈ!/ য়ূমথোং খূদিং/ থৌনা লৈজদ্রবশিংনা/ লোইপোৎ কাবদি খক তোক্তে/ য়োন্থোকচরগা মশা পূম্বা/ কূমহৈ…” (লাঃ ২৫) 
লাইরিক অসিগী মিংথোল ওইরিবা শৈরেং ‘নাউপুরিবা নুমিৎ’ ফজরবা ইমেজরি অমদি সিম্বোলশিংনা মচু লোক্লি সনাগী ৱাহৈগুম্না। মহৌশা মালেম অমসুং মীওইবগী তৎনা থানবা য়াদ্রবা মশক অমসু শৈরেং অসিদা য়াওরি। পুন্সি অমদি খুনাইগী ৱারী ময়াম মরক্তা লমদম অসিগী ৱারীসু অনৌবা কোরৌ অমদা শিন্ননিংলি কবিনা। অদুনা হায়রক্লি, “লুকথরক্লিবা কৌরৌগী মঙালসিদা/ শিন্নখ্রগে চীংদোলসিগী ৱারী।/ কোরৌসিনা থাবুম তরা নাউপুরদুনা/ হয়েং ইনুংনা ঙাল্লকপদা/ তাইবং ফাওরকনবা/ পুম্নৌ নৌরবা তাইবংপান অমা।” (লাঃ ৫৯) শৈরেং অসিগী মিংথোল অসিমক আশানি। অহিংগুম্না হিংলিবা খুনাইদা শৈরেং অসিনা আশা অমদি পীরি। 
‘নাউশোন্নরবা নুংশিৎকী মনম’ য়াম্না তেন্না ইবা শৈরেংনি। অদুবু পীনিংলিবা পাউজেলদি ফ্রি স্পিরিত ওইনিংবদুনি কবি অমা ওইবগী। লৌনম চাওরবা মীওইবা খুনাই মরক্তা হিংবদা তল্লকপা মতাংদুনি। তৌইগুম্বসুং হিংলবদি “চারবসু চাদ্রবসু/ পায়রগা চেঞ্জগে/ নীংতম্বগী ফিরাল” হায়রক্লি। 
কবি মৈরাগী শৈরেংদা ইমালোলগী ফজবা মশক কয়া থেংনবীগনি অমদি শিজিন্নরিবা ৱাহৈশিংনা অপাবশিংদা পীরিবা  শৈরেংগী মহাউসু নিংথিজনা ফংহল্লি হায়না লৌদবা ঙমদে। লেপ্তনা শৈরেং লাইরিক মথং মথং ইরক্কনি হায়না থাজবা থমজরি।