আপডেট:
image

টিকেন্দ্রজিৎকী মীতম মাইখুম হাংদোকপগী থৌরম য়াওরুনবা হোজাইনা অমুকোগী টিম অমা চৎখ্রে

ইম্ফাল। আসামাগী মৈতৈশিংনা খুন্দারিবা হোজাইগী শিবপুর, জুগিজানদা ভিল্লেজ দিবেলপমেন্ট কম্মিটি অমদি শিবপুর নবজ্যোটি ক্লাব অনিনা শিন্দুনা পাঙথোক্কদৌরিবা হন্দক্তা নৌনা শাবা বীর টিকেন্দ্রজিৎকী মীতম মাইখুম হাংদোকপা অমদি আগস্ট ১৩গী অথৌবশিংগী নুমিৎ নীংশিং থৌরমদা শরুক য়ারুনবগীদমক ওল মণিপুর য়ুনাইটেদ ক্লবস ওর্গেনাইজেসন (অমুকো) গী মীওই ১২ না শাবা টিম অমা ঙসি (আগষ্ট ৯) অমুকোগী ওফিসতগী লুপ অসিগী প্রেসিদেন্ট ফৈরোইজম নন্দো লুৱাংনা লুচিংদুনা খোঙশানখ্রে হায়রি।

 

হোজাইগী খোঙচৎ অসিদা ভাইস প্রেসিদেন্ট অনি, সেক্রেটারি ওর্গেনাইজেসন, এসিষ্টেন্ট জেনারেল সেক্রেটারি অমদি এসিষ্টেন্ট ফাইনান্স সেক্রেটারি ২সু য়াওরি। অমুকোগী মীওই ১২ গী টিম অসিনা হোজাই অমদি লঙ্কাগী তোঙান-তোঙানবা মফমশিংদা খুন্দারিবা মৈতৈ অমদি মৈতৈ পাঙলশিংগসু উনদুনা মণিপুরী ঐখোয়গী থম্ময়গী ওইবা মরি হেন্না চেৎশিনহন্নবা অমদি অফবা মরি থম্নবা থবকসু পায়খৎকনি। অমুকোনা মণিপুরদা খুন্দামিন্নরিবা ফুরুপশিংগী অপুনবা শক্তাম শাগৎপদা মপুং ওইবা থৌদাং লৌদুনা লোকপগা লোয়ননা মণিপুরগী মপান লমদা খুন্দারিবা মণিপুরীশিংগসু পুকমেল পাউমেন্নদুনা মণিপুরীশিংগী অপুনবা পাঙ্গল অমা শাগৎতুনা ইন্দিয়া খক্তা নত্তনা মারেমগী মীয়ামদা মণিপুরীশিংগী লিংজেল মান্নবগী অমদি য়েলহৌঙৈদগী ঐখোয়গী লুদা তোংদা য়াওজরক্লবা থৌনা লিংজেলদু নৌহৌননা অমুক উৎথোকপগী লম্বী অমা শেমগৎপা য়াম্না মথৌ তারে।

 

মণিপুরী ঐখোয়না ঐখোয়গী অপুনবা থৌনা লিংজেল অমা শাগৎপা হায়বসিদা ঐখোয়না ঐখোয়গী অথৌবা অথৌবীশিংবু মখোয়গী য়াম্না মরু ওইবা নুমিৎশিং লাকপদা হৈকৎ-লৈকৎ তমদুনা নীংশিংবগা লোয়ননা মণিপুরী অমনি হায়বগী চাওথোকচা অদু লৈবা ঙম্নবগীদমক মণিপুরগী মনুং অমিদি মপান লমদা খুন্দারিবা মণিপুরী পুম্নমক্না থবক তৌমিন্নরসি, মদুদা অমুকোনা পাংবা য়াবা মতেংশিং পাংগে অমদি লৌবা য়াবা থৌদাংশিংসু লৌগে হায়রি।

 

মণিপুরগী মপান লমদা খুন্দারিবা মণিপুরীশিংনা মণিপুরগী মরৈবাক নুংশিবা মীওই কয়াগী নীংশিং থৌরম পাঙথোক্লিবা অদুনা মণিপুরদা লৈরিবা মণিপুরী মীয়ামদা অদুক্কী মতিক চাওথোকচবা পোকই। মণিপুরগী মপান লমদা খুন্দারিবা মণিপুরীশিংনা মরু ওইনা মৈতৈশিংনা আগস্ট ১৩, অথৌবশিংগী নুমিৎ/মলৈবাক নিংবশিংগী নুমিৎ অসিবু পাক-শন্না থৌরম পাঙথোক্কদৌরিবা অসিদা অমুকোনা ঙমজবা থৌদাং খরা লৌবা ওইনা আসামগী হোজাইগী শিবপুর, জুগিজানদা বীর টিকেন্দ্রজিৎকী নৌনা শাবা মীতম অদুগী মাইখুম হাংদোকপগী থৌরমদা শরুক য়াবা চৎকদৌরিবনি।

 

ত্রিপুরাদসু তখেল লৈমা তেংবাং লুপ অমদি মণিপুর লিটরেরি এন্দ কালচারেল ফোরাম, ত্রিপুর অনিনা পুন্না শিন্দুনা আগরতলাগী তরৌ মৈতৈ লৈকাইদা পাঙথোক্কদৌরিবা অসিদসু পুক্নিং থৌগৎপা ওইনা অঙম্বা শেলগী মতেং খরা পাংখ্রে হায়রি।

 

সোর্সঃ সঙাই এক্সপ্রেস । 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু