কুঞ্জমোহনগী ৱারীমচা ‘লিচিং’দা মীৎয়েং অমা — ডা. রোসন তেকচম
ৱারীমচা অসিগী শম্লপ্পা ৱারীদি পাকিষ্টান অমদি বাংলাদেশ অনী খায়দোক্তিঙৈ মতম, বাংলাদেশকী বাঙ্গালী হিন্দু খুন্দা লৈরিবী মশাগী চহী ৬০ রোম শুরবী থৌদামগী হনুবী অদু মাঙ্গোনগী ফম্মেনদা ফক অমা থাদুনা হিপ্লগা ৱাখল তৌদুনা লৈ। অহল-লমন্না হায়নরম্বা নয়ূম-নকৈ অফবা শারুনু, লৌ-শিং য়াম্না লৈশিল্লূনু, নোংম নৎত্রগা নোংমদি লৈবাক অসিদগী ঐখোয়বু চৎলো হায়দনা তাল্লদৌরিবনি। ইপা ইপুগী হৌরকফম মীতৈ লৈবাকতা মীতৈ ঐখোয়না অমুক হনবা হায়বসি শোয়দ্রবনি। অহল-লমন্না হায়নরম্বা ৱাফম অসি চুমগদৌরি হায়বসি হনুবীদুনা খনখি।
ঙসিগী মীওইবা খুন্নাই অসিদা শিবদসু পুবা য়াররোইদবা লন-থুমগদিমক, লৈবাক মুন্নবগীদমক, ধর্ম্মগী, শক্তি তান্নবগী তোঙান-তোঙানবা মরম কয়াগীদমক মীওইবনা অমগা অমগা হাৎতোক্নরি, কাঙলূপ মশেল হাৎতোক্নবা, কাঙলূপ মশেল য়েংথিনবা অসিনা মীওইবগী পুন্সিদা মাঙজবা নত্তনা করিসু কান্নবা পীদে। মসি খঙনা-খঙনা মীওইবনা অমগা অমগা হাৎতোক্নরি, কাঙলুপ মশেল য়েংথীনরি, খুন কয়া মৈ থারি। মসিনা মীওইবগী পুন্সিদা অৱা-চৈথেং কয়া পীরি। মসি অইবা নোংথোম্বম কুঞ্জমোহননা মাগী ‘লিচিং’ হায়বা ৱারীমচা অসিদা নীংথিজনা উৎলি।
ৱারীমচা অসিগী শম্লপ্পা ৱারীদি পাকিষ্টান অমদি বাংলাদেশ অনী খায়দোক্তিঙৈ মতম, বাংলাদেশকী বাঙ্গালী হিন্দু খুন্দা লৈরিবী মশাগী চহী ৬০ রোম শুরবী থৌদামগী হনুবী অদু মাঙ্গোনগী ফম্মেনদা ফক অমা থাদুনা হিপ্লগা ৱাখল তৌদুনা লৈ। অহল-লমন্না হায়নরম্বা নয়ূম-নকৈ অফবা শারুনু, লৌ-শিং য়াম্না লৈশিল্লূনু, নোংম নৎত্রগা নোংমদি লৈবাক অসিদগী ঐখোয়বু চৎলো হায়দনা তাল্লদৌরিবনি। ইপা ইপুগী হৌরকফম মীতৈ লৈবাকতা মীতৈ ঐখোয়না অমুক হনবা হায়বসি শোয়দ্রবনি। অহল-লমন্না হায়নরম্বা ৱাফম অসি চুমগদৌরি হায়বসি হনুবীদুনা খনখি। সাহেবনা লৈবাক অসি থাদোক্তুনা চৎখ্রবা মতুং মুসলমান্না নিংথৌ ওইবদগী ঐখোয়বু উশিৎ থওইদ্রে। নিংথৌ হায়বসিদি অচান-মীরাই নাইফম থোক্তে, মহাক্তি মুসলমান, হিন্দু, মীতৈ পূম্নমক্কীনি। নিংথৌগী লম ওইজরবসু ইপা-ইপুনা জঙ্গল কোক্তুনা, তু-খোং ফুন্দুনা লৈবাক অসিদা খুন্দাদুনা শুরোল কয়া লৈরক্লবনি। মসিবু হেক্তা থাদোক্তুনা চৎকদ্রা? চৎলোই, শিরফাওবা চৎলোই, মথোং মরম খঙদবা মীরৈবাক অমদা চৎলগা শিরুগদবগী শরুক ঐগী পোকফম চাফম অসিদা শিজগে। মসি হনুবীদুনা খনখি।
হনুবীদু মপুরোইবা লৈখিদ্রে, মচাগা মমৌগা অনীসু তাইবংপান থাদোকখ্রে। মশু অনীগা মহাক্কা মখোয় অহুম লৈরি। মশুনুপাদুনা ভাস্কর কৌই, মশুনুপীদুনা চন্দ্রা কৌই হনুবীদুনা ৱাখল তৌনা হিপ্লিঙৈ মশুনুপী চন্দ্রানা থাউমৈ মুকফু অমা থান্দুনা পুথোরকই। মশুনুপীবু উবদা হনুবীদুনা হিদাক ঙান্থক অমত্তং শেম্লক্নবা হায়খি। মশুনুপীনা হিদা হান্দুনা পুথোরক্তুনা মবোক্তা পী। চন্দ্রাগা মবোক্কা ভাস্কর হল্লক্তবগী ৱারী শান্নরিঙৈ তাল্লক অদুদা তোম্বীনৌ লাকই। তোম্বীনৌহোয়গী ইমূংগা চন্দ্রাহোয়গী ইমুংগা মরী-মতা করিসু থোক্নদ্রবসু য়াম্না নুংশিননা লৈমিন্নরকপনি। তোম্বীনৌনা মখোয়গীদি পুননবা পোৎ-চৈ য়োম্বা লোইহৌরে ইবেনখোয়গীদি করম তৌরি হায়না হংলকপদা হনুবী অদু লুৱাই-লুতোন ফুং লাউনা শাগৎলকই। পুরৱারোমদা হন্দক য়ূম-কৈ কয়া মৈ থাখিবগী, নুপী অঙাং ওৎ-নৈখিবগী পাউ কয়াসু তোম্বীনৌনা তমখি। তোম্বীনৌনা তম্লিবা পাউ অদু হনুবীদুগী মবুক্নিংদা ইচং-চংদে। হনুবীদু মফম অদু থাদোক্তুনা চৎনীংখিদে। মহাক্না শিখাং খাংদুনা লৈরকপনা মফম অদুদা ঙসি ফাওবা লৈবনি। মফমদুদগী ভারতলোমদা চৎখিবশিংবু ভারত সরকারনা মতেং পী, পীজ-পীথক তৌই হায়বদুসু মমিংতগীনি, মবুক থন্না চাবা ফংবা নত্তে। লম পীদুনা খুনদাহল্লি হায়বদুসু চীংনুং-মান্নুংদনি, জঙ্গল কোকহল্লিবনি। তিন-কাং মরক্তা অনা-অয়েকসু মহানি।
ঙাইহাক লৈরগা মশুনুপা ভাস্কর হল্লক্তুনা থোং ৱাংমগী বাঙ্গালী হিন্দু খুন অসি হয়েং অহিংদি শোয়দনা মৈ থারনি হায়বগী পাউ তম্লকখি। মসিদগী তোম্বীনৌসু ময়ুমদা চৎখ্রে, মশু-মবেনসু চাক চারে। চাক তোকপগা ভাস্কর অমদি চন্দ্রা মচিন-মৌপ্বানা পুননবা পোৎ-চৈ য়োম্বা লাক্নরি। হনুবীদুদি মপান্দা তুমিন্না ৱাখল তৌদুনা ফম্লগা লৈ। ঙাইহাক রৈরগা ফম্লম্বদগী হৌগৎলগা শঙ্গোল্লোমদা চংশিল্লগা শনবী মপী মচা অদুদা নানবী অদুগা মপি শিন্থরকই। চন্দ্রাগী অউনপোৎ ওইননবা মপানা থম্লম্বা শন মপী মচানি। শঙ্গোন্দগী থোরক্লগা হনুবীদু মাঙ্গোনদা অমুক ফম্লরে। মহাক্না হেক ফমথবগা হুস লাবা অদুনা মমৈ ফেরে ফেরে হায়রদুনা পুন্সিদা অমুক উন্নররোই হায়বগী মীৎয়েংদা মুন্না য়েংলকখি। পূংমুক্কী মতুংদদি মখোয় পূম্নমক য়ূম অসি থাদোক্তুনা চৎলনি খল্লুবদা হনুবীদু থম্মোয় চীংখায়রকই।
নোংয়াই মতুং পূং অমরোম তাখ্রে, ময়াম্না হায়নখিবা পূংজা অদু য়ৌরক্লে। মশু-মবেন অহুম অদু সনামহী লৈমরেল খুরুম্লম্লগা পোৎয়োম অমমম পায়দুনা থোরকই। মখোয় অহুম্মক্কী পিরাংনা ঈমায় পাথরকই। নোংঙান্দ্রিঙৈ মাইল মঙা চৎলগা তুরেল অমা লৈরিবদু লানহৌদবা য়াদে, মদু লাল্লগা হিন্দুষ্টানগী ঙমখৈনি। ময়াম চৎনবা হৌখ্রে। মশু মবেনসু কোন্থোং অদু লান্থোক্লগা লাকপা হৌই। খরা চৎলগা খোং মচা অমগী মনাক্তা হৌরিবা মৈহৌরোলদগী লৈরক্লবা খোংনাং পাম্বী অদুগী মপা য়ৌরক্লে। মফম অদুদা হনুবীদুগী মপুরোইবা, মচা অমদি মমৌনুপী লৈরোল চনখিবনি। মফম অদুদা মশু অনীবু খুরুমহনখি। অদুগা হনুবী অদুদি খুরুম্বদগী হৌগৎখিদ্রে। মপুরোইবা অমদি মচাগা মমৌগবু কৌদুনা কপখ্রে। মশু অনীদুনা হৌগৎলো চৎলসি হায়বদা, ‘ঐ চৎলরোই, মফম অসিদা ঐ অসুম…। নখোয় অনী চৎ…। ” হায়দুনা ৱাহৈ ফাওবা মপুংফানা হায়দোকপা ঙমখিদ্রে।
অইবগী ৱারীমচা অসি পাকিষ্টান অমদি বাংলাদেশ অনী খায়দোকত্রিঙৈ বাংলাদেশকী বাঙ্গালী হিন্দু খুন্দা খুন্দারিবা মীতৈশিংনা মুসলমানশিংগী মীওৎ-মীনৈ মরক্তা খুন মৈ থারক্লনি হায়বগী অকিবা অমদি মীপাইবনা থৱায় হিংননবা খুন অদু থাদোক্তুনা চৎপগী থৌদোকপু লৌখৎতুনা উৎলি। মসিনা খুন্নাই অসিদা লৈঙাক মপুশিংনা অচান-মীরাই নাইবা, কাঙলূপ অচৌবশিংনা কাঙলূপ মচাশিংবু ওৎপী-নৈরিবা, জাৎ-ধর্ম্ম খেন্নবগী হাৎন-শুনবা, কাঙলূপ মশেল য়েংথীনবা, য়ুম কয়া মৈ থাবনচিংবগী থৌদোক কয়া থোক্লি হায়বা তাকপগা লোয়ননা অসিগুম্বা থৌদোকশিং অসিনা তুশোন্ননা হিংলিবা চমজরবা মীওইশিংগী পুন্সীদা করি চৈথেং পীবগে হায়বদু তাক্লি। থৌদামগী হনুবী অসি ইচম-চমজবী, মপুরোইবা নীংজবী, মপুরোইবা শিবা মফমদা শিবা পামজবী, মাগী পোক্নফম লমদমদা অরোইবা য়াহিপ তাঞ্জাবা পাম্বী নুপীনি। মসিনা ভাস্করগী মপা লৈরিঙৈ মফম অদুগী কাঙলূপকী ঈরাং অদুদা খুন অদু থাদোক্তুনা চৎলসি হায়বদা হনুবীদুনা য়াখিদে মহাক্না শিখাং খাংবদগী হৌজিক ফাওবা খুন অদুদা লৈরকখিবনি। অদুবু মুসলমানশিংগী মীওৎ-মীতৈ মরক্তা মখোয়বু হাৎপিখ্রনি, খুন অদু মৈ থারক্লনি কিবদগী থৱায় হিংননবা অসুক কুইনা খাঙজরক্লবা মহাক্না শিজগে খঞ্জরিবা মপুরোইবনা য়াহিপ তানখিবা পোক্নফম লমদম অদু থাদোক্নীংদ-থাদোক্নীংদা থাদোক্তুনা চৎপা তাখি। মসি লৈঙাক মপুশিংনা প্রজাশিংবু চপ মান্নবা য়েংবা ঙমদবা, মীশিং য়াম্বা অচৌবা ফুরুপশিংনা মীশিং য়ামদবা কাঙলূপ মচাশিংবু হন্থনা য়েংবিবা, জাৎ-ধর্ম্ম খেন্নবগী মীৎয়েং কাঙলূপ মশেল য়েংথিনবা কয়া অসিনা ওইহল্লকপনি। অদুনা, লৈঙাক মপুশিংগী অচান-মীরাই নাইবা মীৎয়েং, জাৎ-ধর্ম্ম খেন্নবগী য়েংথীনবা, কাঙলূপ মশেল হাৎনবগী থৌদোকশিং অসিনা ভাস্করগী মশু-মবেল অমিদ বাঙ্গালী হিন্দু খুনগী খুঞ্জাশিংগী পুন্সিদা ফংলিবা অৱা-চৈথেং অদুনা অপবশিংদা শাফু পীরি। অদুগা মসিবু উত্তুনা জাৎ-ধর্ম্মগী খেন্নবা লৈতনা, কাঙলূপ মশেল য়েংথীনবা তোক্তুনা নুংশি চান্ননা হিংমিন্ননীংবগী ৱাখল ফোঙদোকপনা ৱারীমচা অসিগী পাউজেলনি। অদুগা ৱারীমচা অসিদা য়াওরিবা থৌদামগী হনুবী অমদি মাগী ইমুং অসি মৈত্রবাকতগী চোইনা তাদুনা বাংলাদেশতা খুন্দ্রাখ্রবা মীতৈশিংনি, তোম্বীনৌ অমদি মাগী ইমুংসুনি। মফম অদুদা খুনদারিবা মীতৈশিংনা চোইনা তাখ্রবা বাংলাদেশতা খুন্দা লৈতাদুনা লৈখ্রবা মীতৈশিংবু মফম অদুগী মীওইশিংনা মীতোপ ওইনা খনবিবা, তাথি-তাওইনা তৌবিবা, মফম অদুদা লৈরিবা মীতৈশিংনা হিংলিবা তুশোন্নরবা পুন্সিগী মশক কয়াবুস ফোঙদোক্লী।
অইবগী ৱারীমচা অসিদা থৌদামগী হনুবীদুনা নুমিদাং মঙ্গোন্দা হিপ্তুনা লৈবদগী হৌরগা নোংযাই মতুং য়ূম থাদোক্তুনা চৎপা হৌরকপা ফাওবগী থৌদোকপু লৌখৎতুনা উৎলি। চরিত্র য়াম্না য়াম্মুবা নত্তে। হনুবী, তোম্বীনৌ, ভাস্কর, চন্দ্রা চরিত্র মরী অসি য়াওই। অদুগা ৱারীমচা অসিগী ৱারী খুৎলি অইবনা অপাবশিংদা পাউদম্বনি। হায়বদি থার্ড পার্শোনদা পাউদম্বনি। মরক মরক্তা চরিত্রশিং ৱারী ৱাতাই শান্নবা অৱাই-অখুম য়াওরি। মতাং চানা পাউরৌ শীজিন্নদুনা হেন্না ফজহন্নবা হোৎনরি। লোয়ননা ৱারীমচা অসিগী থৌদোকশিং মথং-মনাও নাইনা চত্থৈ। অদুবু সমস্যা কয়া পুখৎলগা সোল্ভ তৌরমদবা য়াওই। হনুবীদুগী মচাগা মমৌগা শিখিবগী ৱাফম পল্লগা মতৌ করম্না শিখিবগে হায়বা তাক্তে। অদুগা ৱারী অসিগী অরোইবদা হনুবী অদু করি তৌখ্রবগে হায়বা ময়েক শেংনা তাক্লমদে। মসিনা অপাবশিংদা ৱাখল খলহল্লি। তশেংনা, কুঞ্জমোহনগী ‘লিচিং’ হায়বা ৱারীমচা অসি থোইদোক্না শিংথানীংঙাই ওইরবা ৱারীমচা অমনি হায়বা য়াই।
কর্টেসি- সঙাই
0 কমেন্ট:
কমেন্ট তৌবিয়ু