কংলা নোংপোক থোঙ মীয়ামদা শিন্নখ্রে
ইম্ফাল, জানুয়ারি ১০ : হৌখিবা জানুয়ারি ৬ তা য়ুনিয়ন হোম মিনিষ্টার অমিৎ সাহনা শঙ্গারমখিবা ‘কংলা নোংপোক থোং’ ঙসি চীফ মিনিষ্টার এন বিরেননা অমুক হন্না লাইশোন তিনশোনগী থৌরমদা লোয়ননা শঙ্গাদুনা মীয়ামদা শিন্নখিবগা লোয়ননা মনীংলোমগী হায়বদি নোংচুপ থোঙদগী মীয়াম চঙলিবা অসি থিংলগা নোংপোক থোঙগী মশক ওইরিবা নোংপোক থোংদগী মীয়াম চঙহল্লগনি হায়না ফোঙদোকখ্রে।
ষ্টেট আর্কিওলোজি ডিপার্টমেন্টনা শীন্দুনা পাঙথোকখিবা থৌরম অদুদা চীফ গেষ্ট ওইখিবা চীফ মিনিষ্টার এন বিরেননা মহাক্কী ৱারোল পীবদা হায়, মৈতৈ লাইনিং চৎপশিংগী চৎনবিদা মনিং থোঙ হায়বসি অশি থোঙ ওইনা লৌনবগা লোয়ননা অরুবা লাইফমলেন অমা ওইরিবা কংলাগী মনিং থোঙ ‘নোংচুপ থোঙ’ দগী মীয়াম্না চঙনবা অসি অফবা নত্তে হায়না অখঙ-অহৈশিংনা ফোঙদোরকপদগী নোংপোক থোঙ ফাৎপা শক্তুনা নোংপোক থোং অসি শাবনি।
ৱাফম অসিগী মতাং অমদি কংলা মনুঙদা লৈরিবা কংলাশাগী ময়াদা ‘কবাক খনবা’ লৌথোকপগী মতাংদা মীয়াম মরক্তগী তোঙান তোঙানবা ৱাফমশিং ফোঙদোক্নরকপনা থবক অসি অখঙ অহৈ অমসুং মীয়ামগী অপাম্বা মতুং ইন্না পাঙথোক্নবা হোৎনবদা চহি অহুম চঙখি হায়বা ৱাফমসু চীফ মিনিষ্টার এন বিরেননা থমখি।
মহাক্না হায়, মীয়াম্না কংলা নোংচুপ থোঙদগী কংলা মনুং চঙবা থিংলগনি অমদি ঙসি শঙ্গারিবা নোংপোক থোংদগী ওইনা চঙহল্রগনি, মসিদা আইআরবি পার্সোনেলশিংনা স্পিসিয়েল ওইবা য়ুনিফোর্ম শেৎতুনা ঙাকহনগনি। কংলা নোংপোক থোং শেমগৎপগা ইরোইননা নিউ চেক্কোনদগী থোং অসি তাবা লম্বী পাকথোকপদা মসিগী নাক য়েৎতা খোপচিন্দুনা শাজিনবা ষ্ট্রাকচার খরসু থুগাইখি হায়বা ৱাফম থম্লদুনা পোরোমপাৎ তাখিবা লম্বীগী শরুক খরসু পাক চাওনা থম্নবা হোৎনরি হায়নসু চীফ মিনিষ্টার এন বিরেননা ফোঙদোকখি।
মহাক্না হায়, মণিপুর অসি ৩৩ এডিদগী হৌরগা মথং মথং নিংথৌ পানখিবা অমদি চহি ২০০০ হেনবগী মশাগী পুৱারী লৈজরবা লমদম অমনি, পুৱারী অসিবু মীওই খরনা মশাগী কান্নবা খক্তা য়েংলগা হোংদোক্নবা হোৎনবসি য়াম্না লাইবক থিবনি। ষ্টেট অসিদা খুন্দারিবা ফুরুপ অমদি লাইনিং লাইশোন খুদিংমক লৈঙাক্না ইকায়খুম্নৈ হায়না চীফ মিনিষ্টারনা ফোঙদোক্লদুনা লৈঙাক অসিদা য়াওরিবা মিনিষ্টার অমদি এমএলএশিংনা তোঙান তোঙানবা লাইনিং লাইশোন খুদিংমক্তা শরুক য়াবগা লোয়ননা লৈঙাক অসিনা পাম্লিবা অসি ষ্টেট অসিদা ইং চিকপা অমদি চাওখৎপা পুরকপা অদুনি হায়খি।
ঙসি শঙ্গাখিবা প্রোজেক্ট অসিগী ফান্ড থাদরিবা ইম্ফাল স্মার্ট সিটি লিমিটেড অমসুং মসিবু শারিবা মণিপুর পুলিস হাউসিং কোর্পোরেসন লিমিটেডকী অফিসিয়েলশিংবুসু চীফ মিনিষ্টারনা থাগৎপা ফোঙদোকখি। থৌরম অদুদা এগ্রিকালচার মিনিষ্টার থোঙাম বিশ্বজিৎ, ৱার্ক্স অমসুং য়ুথ এফিয়ার্স এন্দ স্পোর্টস মিনিষ্টার গোবিন্দাস কোন্থৌজম, টেক্সটাইল, কম্মার্স এন্ড ইন্ডাষ্ট্রি মিনিষ্টার নেমচা কিপগেন, হেলঠ মিনিষ্টার ডাক্তর সাপম রঞ্জন, এডুকেসন মিনিষ্টার থৌনাওজম বসন্তকুমার, এমপি লৈশেম্বা সনাজাওবা অমদি কৈশামথোং এসেম্বলী কন্সটিটুয়েন্সিগী এমএলএ নিশিকান্তা সিংহ সাপমনচিংবা মশক নাইবা মীওই কয়াসু শরুক য়াখি। ঙসি থোং অদু নৌনা হাংদোকপগা মরী লৈননা নাৎকি ওইবা লাইনিং-লাইশোনগী থৌরমশিংসু পাঙথোকখি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু