আপডেট:
image

ওমিক্রোন শন্দোরকপা থিংনবা চেকশিন থৌরাংশিং কনখৎনবা ডব্লিয়ু ঐচ

নিউ দিল্লী, ডিসেম্বর ১৮ : কোভিদ-১৯গী অনৌবা ভেরিয়েন্ট ওমিক্রোন মখা তানা শন্দোরকপা থিংনবা পাব্লিক হেলথ অমসুং সোসেল থৌরাংগা লোয়ননা ভেক্সিনেশন কনখৎনবা থাংজ নুমিৎতা ৱার্ল্ড হেলথ অর্গানাইজেশন (ডব্লিয়ু ঐচ ও) না সাউথ ইষ্চ এসিয়া লমদমগী লৈবাকশিংদা তকশিনখ্রে। গ্লোবেল হেলথ বোডি অসিগী মতুং ইন্না, হাইপার মিউটেন্ট ভেরিয়েন্ট অসি হৌজিক ফাওবদা লৈবাক ৭৭ তা শন্দোক্লে।
ডব্লিয়ু ঐচ ও সাউথ ইষ্ট এসিয়া রিজনগী রিজনেল ডিরেক্টর ডা. পুনম খেত্রিপাল সিংহনা হায়, হান্নদগী ইফেক্টিভ ওইরক্লবা হেলথ অমসুং সোসেল থৌরাংশিং লৌখৎতুনা লৈবাকশিংনা ওমিক্রোন মখা তানা শন্দোরকপা থিংবা ঙমগনি। ঐখোয়না রিক্স ৱাংবা মীওইশিং অমসুং প্রোটেক্সন খ্বাইদগী নেম্বা মীওইশিংবু লায়না অসিদগী ঙাকথোক্নবা মখা তানা হোৎনগদবনি।
রিজনেল ডিরেক্টর অসিনা মখা তানা হায়, হৌজিক ফাওবদা ঐখোয়না উবা ফংলিবসিগী মতুং ইন্না, ওমিক্রোন অসি হৌখিবা থা কয়া অসিদা মারেমদা কোরোনা কেস ৱাংহনখিবা ডেল্টা ভেরিয়েন্টতগী হেন্না য়াঙনা শন্দোকপগুম তৌরি। সাউথ আফ্রিকাদগী লাকপা ডাটানা ওমিক্রোননা রি-ইনফেক্সন থোকহনবা য়াবগী রিস্ক হেনগৎহল্লি হায়বগী ইঙ্গিৎ পী। ওমিক্রোননা কদাই ফাওবা লায়না লুশিলহনবগে হায়বগী মতাংদা ক্লিনিকেল ডাটা মতিক চানা লৈত্রি।
হৌজিক ষ্টাডিশিং চত্থরিবা ওইবনা ওমিক্রোন ইনফেক্সন লৈরবা মীওইশিংগী হকচাংগী ফিভম চপ চানা করি ফিভম লাকপগে হায়বসি মপূং ফানা খঙবদা চয়োল খরা চঙখিগনি। ডা. পুনমনা হায়, হৌজিক ফাওবদা ওমিক্রোননা থোকহনবা লায়না লুদবগী মওং ওইরবসু ঐখোয়না মদু ইচম চম্বা লায়নানি হায়না হেক্তা খন্দোকপদি চুম্লোই। রিপোর্ট কয়ানা ভেরিয়েন্ট অসিনা থোকহনবা লায়না শাথিবগী চাং নেম্মী হায়বা তারবসু কেস মশিং য়াম্লকপা মতমদা ঐখোয়গী হেলথ সিষ্টেমশিংনা মদুগী পোৎলুম পুবা ঙম্লক্লোই। মরম অদুনা আই সী য়ু বেডশিং, অক্সিজেন এরেঞ্জমেন্ট, হেলথ কেয়ার ষ্টাফ য়াওনা হেল কেয়ার কেপাসিটি অমসুং লায়না হেনগৎপগী কেপাসিটি রিভিয়ু তৌবা অমসুং লেভেল খূদিংমক্তা হেলথ কেয়ার কেপাসিটি ফগৎহনবা মথৌ তাই।
ওমিক্রোন ভেরিয়েন্টনা ভেক্সিনশিংগী কান্নবা হন্থহল্লি হায়বসি প্রিলিমিনারি ডাটানা উৎলি। মসি ওইদুনসু ডেল্টা ভেরিয়েন্টকী মতাংদা উৎখিবগুম্না ভেক্সিনশিং অসি পেন্ডামিক অসি থেংনবদা মরু ওইবা খূৎলায় অমা ওইরি। তৌইগুম্বসুং ঐখোয়না ভেক্সিনখক্তনা পেন্ডামিক অসিদগী ঙাকথোকপা ঙমগনি হায়না খল্লোইদবনি। ঐখোয়না ভেক্সিনেশন কনখৎপগা লোয়ননা কোভিদ-১৯ শন্দোকপা অমসুং মী শিবা হন্থহনবা কান্নরে খঙলবা পাব্লিক হেলথ অমসুং সোসেলগী ওইবা চেকশিন থৌরাংশিংসু কনখৎপা মথৌ তাই হায়না ডা. পুনমনা মখা তাখি।
সোর্স: হুইয়েন লানপাউ।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু