এপ্রিল ২৩: মণিপুর পুৱারীগী তাঙ্কক অমা — ডা. রোসন তেকচম
নুমিৎ অসিদা লৈখিদ্রবা অথৌবশিং অদুগী মফমদা হৈ-লৈ কত্তুনা ইকাই খুম্নবা উৎপগী থৌরম পাঙথোক্লী। কল্লবা লানফম অদুদা ঈরৈবাক্কীদমক থৱায় কৎখ্রবা ইপা-ইপুশিং অদুগী মফমদা মখোয়গী চাদা নাউদা ওইরিবা মৈত্রবাকচাশিংনা ইকাইখুম্নবা উৎপা, মখোয়বু নিংশিংবনা হৌজিক্কী অমদি তুংগী মীরোন্দা মরৈবাক মজাতি নুংশিবা অমদি মরৈবাক্কীদমক কাত্থোক্নীংবগী ৱাখল পোকহনবনা নিংশিং থৌরম অসিগী নুংগী ৱাহন্থোক্নি।
The battle of Khongjom @RKCS. [ কর্টেসি: RKCS Gallery ]
এপ্রিল ২৩ অথৌবশিংগী নুমীৎ হায়না শকখঙনরিবা নুমিৎ অসিনা লকপসিদা নীঙশিং য়ুখল মরুমদগী চোঙথোরক্লি মৈত্রবাকচাশিংগী থম্মোয়দা মণিপুর পুৱারীগী তাঙ্কক অমা। সাউথ ইষ্ট এসিয়াদা চহী লিশাং শিৎনা নিংথৌগী লৈঙাক মখাদা মনীং তম্না পাল্লকখিবা পীক্লবা মৈত্রবাক অসিনা মতৌ করম্না নীংতম্বগী নুমিৎ তাখিবা? মীশিং য়ামদ্রবা মীতৈ খুজোক খরনা মশীং য়াম্লবা পাঙ্গল্লবা বৃটিশ লৈঙাক্কা করম্না নীংতম্বগী অরোইবা লান শোক্নখিবা? অদুগুম্বা ১৮৯১ দা বৃটিশ অমদি মীতৈ অনীগী মরক্তা শোক্নখিবা মৈত্রবাক্কী নীংতম্বগী অরোইবা লান অদুগী অরোইবা লানফম ওইখিবা খোংজোমগী লানফম, লানফম অদুদা শোক্নখিবা লান অমদি লানফম অদুদা থৱায় কৎখ্রবা অথৌবশিং অদুবু নৌহৌনা নিংশিংলক্লী ঙসি এপ্রিল ২৩ না য়ৌরকপসিদা।
অমরোমদা এপ্রিল ২৩ বু মতৌ করম্না অথৌবশিংগী নুমিৎ নৎত্রগা খোংজোম নুমিৎ হায়না শকখঙনদুনা মণিপুর পুৱারীগী লামায়দা সনাগী মচুনা হক্তুনা লৈখিবনো হায়বসিদি মৈত্রবাক অনীগী মরক্তা শোক্নখিবা মৈত্রবাক্কী নীংতম্বগী লান অদুগী শরুক অমা ওইনা খোংজোমগী লানফমদা শোক্নখিবা লান অদুনা খ্বাইদগী কনবা অমদি অরোইবা লান ওইখিবনি।
অদুঙৈ সুরচন্দ্র মহারাজনা মণিপুরগী নিংথৌ ওইনা পানবা মতমদা নিংথৌ মচা মশেলগী মরক্তা নুংশিনদবা অমদি রাজনিতিগী মুক্নবা কয়া থোরকপদগী মদুনা মৈরী ওইনা চাকখৎলক্তুনা ১৮৯০ গী সেপ্টেম্বর ২১ দা কোনুং মনুঙগী লান থোকখি। লান অদুদা কুলচন্দ্রগী মীচংনা ঙমদুনা কুলচন্দ্রনা মণিপুরগী নিংথৌ ওইখি। অদুগা লান অদুদা মায়থিবা ফংলবা সুরচন্দ্র মহারাজনা মণিপুরগী মপান্দা চেন্দুনা বৃটিশ লৈঙাক্কী মফমদা চংজফম নিজখিবগা লোযননা মাগী মাঙখ্রবা নিংথৌ খুভম অদু হঞ্জিন্নবা হায়জখি। মসিনা মণিপুর লৌশিন্ননবা খুদোংচাবা ঙাইরিবা বৃটিশ লৈঙাক্কী মফমদা হেন্না মতোই হাপখি। মসিদগী বৃটিশ লৈঙাক্না মণিপুর লৌশিন্ননবা খোঙথাং অমা ওইনা মখোয়গী পাখোল্লোই আসামগী চীফ কমিশনার জে দব্লিয়ু কুইন্টনবু গুর্খা সিফাই ৪০০ পুদুন মণিপুরগী যুবরাজ টিকেন্দ্রজিৎপু ফাননবা ইম্ফালদা থারকখি।
চীফ কমিশনার কুইন্টন অমদি মহাক্কী লীচিং মখাদা লাকখিবা বৃটিশ অফিসারশিং অদুনা য়ুবরাজ টিকেন্দ্রজিৎপু ফাননবা থৌরাং কয়া থৌখি অদুবু মায় পাকপা ঙমখিদে। মসিগী মমৈথংদা বৃটিশশিংনা মণিপুরগী সনা শঙ্গাইদা অহিংদা লোন্না লান্দারকখি। লান অদুদা মীতৈ লান্মী কয়া নুপী অঙাং কয়া শিখি, য়ুম কয়া মৈনা চাকখি। বৃটিশ অমদি মীতৈ অনীগী মরক্তা অকনবা মওংদা লান শোক্নখি। মদুবু ‘চৈথারোল কুম্বাব’দা অসুম্না ফোঙদোক্লি, “…নোং ঙানগদবা পুং ১ লৈরিঙৈদা সাহেবনা সিফাই লোয়নদুনা নোংমৈ কাপ্নরে। নোংমৈ মখোন তারবদা নুপী নহা য়াম্না কায়দুনা চেন্নরে। অমসুং পুখ্রনবা তংকোনা চোংথোক্তুনা চঙলিবা সাহেবকা খুৎনা ফংনা য়ান্নদুনা ২ মা শিমিন্নৈএ।” (চৈ:কু:, লা-৪৮৪)
লান অদু লোইরগা অহিংদা লোন্না লানহৌবা, মরাল লৈরবা বৃটিশ সাহেবমঙা কংলা উত্রা মাঙদা হাৎতুনা চৈরাক পীখি। পাউ অসি তাবদা বৃটিশ লৈঙাক্না অশাউবগা লোয়ননা মণিপুরবু লাকশিন্ননবগীদমক গুর্খা সিফাই চেঙ্গোল অহুম থারক্তুনা তুমু, কাছার, কোহিমা মায়কৈ অহুমদগী অকনবা মওংদা লাঞ্জংলকখি। মায়কৈ অহুমদগী চংশিল্লকখিবা বৃটিশশিংগী অকনবা লাঞ্জং অদু খুৎলাই মতিক চানা পায়দ্রবা মশিং য়াওদ্রবা মীতৈশিংনা মতম খরখক্কী ওইনা থিংবা ঙম্দ্রবসু মতম পুম্বগী ওইনা থিঙবা ঙম্বা হায়বদুদি ওইখিদে। মসিনা, করাম চাওরবা বৃটিশ লৈঙাক্না ঈরমদম মণিপুর অসিবু লৌশিন্দুনা চহী লীশাং শিৎনা মনিংতম্বা লৈবাক অমা ওইনা লৈরকখিবা মৈত্রবাক অসিগী নীংতম্বা নুমীৎ তাখিদুনা মীখা পোনবগী মায়খুম উপখি।
লোয়ননা তুমু, কাছার, কোহিমা মায়কৈ অহুমদগী চংশিল্লকখিবা মশিং য়াম্লবা বৃটিশশিংগী লাঞ্জং অদুদা তুমুরোমদগী চংলকখিবা তেঙ্গোল অদুনা খ্বাইদগী মপাঙ্গল কনবা তেঙ্গোল ওইখি। অদুগুম্বা, মপাঙ্গল কল্লবা তুমুরোমদগী চংলকখিবা তেঙ্গোল অদুগা মীতৈ লন্মীশিংগা খোংজোমগী লানফমদা শোক্নখিবা খোংজোম লান অদুনা খ্বাইদগী কনবা লান ওইখি অমদি মণিপুরগী নীংতম্বগী অরোইবা লামায় খুমজিনখিবা লানসু ওইখি। লানফম অদুদা পাউনা ব্রজবাসি, চিংলেন সনা, হৈরাং খোংজানচিংবা মীতৈগী থৌনা ফরবা লান্মী কয়ানা মরৈবাক্কীদমক থৱায় থাখি।
‘১৪ নি শগোলশেন্দা নোংঙাল্লকপদগী হৌনা শোক্নবা নুমিদাং য়ুথক্কী মতম ওইরক্লবদা সাহেবনা চীনথংনা শগোলতোংবা ময়াম্না মীতৈবু কোয়রে। অদুদা পাউনা মেঞ্জোর, চোংথা মেঞ্জোর, সুরদার পুম্নমা মপা মপা চোংশিন্দুনা য়ান্নরে। গুলিনা পান্দুনা মী য়াম্না শিরে। সাহেবনা চীনথংদুনা অতৎপা নাইদনা তকশিল্লকএ। অদুদা মাঙাগী তেঙ্গোন মুৎএ। শিবদি পাউনানচিংবা-হিংবদি চোংথা মেঞ্জোরনচিংবা মী ১০০ রোম থাঙনা তেন্না শোকপা খরগা হিংখিএ। (চৈঃকুঃ লা ৪৯২-৪৯৩)
অসুম্না খোংজোমগী খেব চীংগী চীংখোংদা মীতৈশিংগা বৃটিশকা অকনবা লান শোক্নখি। অমদি লান অসিদা মনিপুরনা মায়থিবা ফংদুনা মণিপুরগী নীংতম্বগী নুমীৎ তাখি। অদুগা ‘চৈথারোল কুম্বাব’গী মতুংইন্না ১৮৯১ গী এপ্রিল ২৫ দা মায়কৈ অহুমগী বৃটিশ তেঙ্গোলশিংনা মণিপুরগী কোনুং য়ৌরক্তুনা মণিপুরবু খুদুম চনখি। ‘উৎসব কৎপদগী হৌবা ১৬ নি থাঙজদা মায়কৈ তমগী তেঙ্গোন কারকপা কোনুং য়ৌরকএ’ (চৈ:কু: লা ৪৯৩-৪৯৪)
পাউনা ব্রজবাসি
অসিগুম্বা মণিপুরগী নীংতম্বগী অরোইবা খোংজোম লান অদুবু নীংশিংদুনা চহী খুদিংগী এপ্রিল ২৩ দা অথৌবশিংগী নুমিৎ হায়না শকখঙনদুনা নীংশিং থৌরম পাঙথোক্তুনা লাক্লি। নুমিৎ অসিদা লৈখিদ্রবা অথৌবশিং অদুগী মফমদা হৈ-লৈ কত্তুনা ইকাই খুম্নবা উৎপগী থৌরম পাঙথোক্লী। কল্লবা লানফম অদুদা ঈরৈবাক্কীদমক থৱায় কৎখ্রবা ইপা-ইপুশিং অদুগী মফমদা মখোয়গী চাদা নাউদা ওইরিবা মৈত্রবাকচাশিংনা ইকাইখুম্নবা উৎপা, মখোয়বু নিংশিংবনা হৌজিক্কী অমদি তুংগী মীরোন্দা মরৈবাক মজাতি নুংশিবা অমদি মরৈবাক্কীদমক কাত্থোক্নীংবগী ৱাখল পোকহনবনা নিংশিং থৌরম অসিগী নুংগী ৱাহন্থোক্নি।
অমনা, অশেংবা লানফম ওইখিবা খেব চীংখোঙ অমদি মদুগী অকোয়বশিং অদু লৈঙাক্না নিংথিজনা শেমগৎতুনা টুরিষ্ট স্পোট অমা ওইহন্দুনা লময়েংবা লাকপশিংগী পুক্নীং চিংশিল্লিবা অসিমদি য়াম্না লাইবক ফবনি। অদুবু ৱাখল য়াওদ্রবা পাখং লৈশা কয়ানদি শেংলবা মফম অসিবু ঈরাং কৈথেল কাফম অমা ওইনা লৌনরকপগী মমি তারক্লী। মসিমক্তী লাইবক থিবনি। ঈরৈবাক্কীদমক থৱায় কৎখ্রবা ইপা-ইপুশিং অদুগী থৱায়না লানফম অসিদা পাখং-লৈশাশিংগী নুংশি য়াকাবু ওইনা শেম্লম্বা নত্তে। অদুবু ঙসিগী লমকেৎ-লমহাইবী শাবী শানৌশিংনদি নুংশি য়াকাবুং ওইনা লৌনরক্লী। মসিনা মৈত্রবাক্কী শেংলবা মফম অসিবু তুংগী মীরোন্দা লান্না উহন্ননবা হোৎনরি। অদুগা অমন, মতম অমদা মীতৈগী লানবন শারম্বা মফম অসি অখং অহৈশিংনা বর্ম্মা রোডকী নোংচুপ্তনি হায়না মত পী। অদুবু হৌজিক বর্ম্মা রোডকী নোংচুপ থংবদা মীতৈগী লানবন শারম্বা খুভম মচেৎ অমত্তা লৈতে। মসিনা মখা তানা থিজিনবা মথৌ তারি।
অমরোমদা, হৌখিবা চহী অমা অনীসিদা কোবিদ-১৯ না মরম ওইরগা খোংজোম লানগী নিংশিং থৌরম চাওনা পাঙথোকপা য়াখিদ্রবসু হন্দক্কী ওইনদি নিংথিজনা পাঙথোকপা য়ারনি। অদুগা, কোবিদ-১৯ লাক্ত্রীঙৈ মমাংদা খোংজোম দে নুমীত্তা মণিপুরগী মফম কয়াদা হরাও-কুহ্মৈ কয়া পাঙথোক্নখিবা কয়া ঐখোয়না থেংনখ্রে। মদুদি অচুম্বা নত্তে। করিনা? নুমীৎ অসি মৈত্রবাক্কী নুংঙাই য়াইফবা ওইখিবা নুমীৎ নত্তে। মীখা পোনবগী মায়খুম উপখিবা, নীংতম্বগী নুমীৎ তাখিবা নুমীৎনি, ইপা-ইপু কয়ানা থৱায় কৎখিবা…। মসিনা নুমীৎসিদা হরাও কুহ্মৈ পাঙথোকপা হায়বসি ৱাখল য়াওদবগী থৌওংনি। অদুনা নুমীৎসিদা মৈত্রবাক্কী মীয়াম্না থম্মোয়শেংনা ইরৈবাক্কীদমক থৱায় কৎখ্রবা ইপা-ইপুশিং অদুগী মফমদা ইকাই খুম্নবা, তৌবিমল খঙবা উৎপগা লোয়ননা ইরৈবাক ইরমদম নুংশিবগী ৱাখল্লোন তুংগী মীরোন্দা শন্দোক্লম্বা অমদি হিংবগী হক মাঙশিল্লকপা মমি শাম্লক্লবা খুন্নাই অসিবু কন্দুনা মীপান তাংদবা মরোমদোম লেপচবা ঙম্বা মনীংতম্বা লৈবাক অমা ওইননবা থৌদাং পাঙথোক্লম্বা অদুনা অচুম্বা ওইগনি নীংই।
কর্টেসি : সঙাই এক্সপ্রেস।
0 কমেন্ট:
কমেন্ট তৌবিয়ু