এক্স সি এম অলিমুদ্দিনগী মেমোরিএল লেকচর পাঙথোকখ্রে
হৌজিক ওইরিবা মণিপুরগী ফীবম অসিদা এক্স সি এম অলিমুদ্দিনগুম্বা মী অমা মথৌ তাইঃ ও জয়
ইম্ফাল, ফেব্রুৱারী ১২: হৌজিক ওইরিবা মণিপুরগী ফীবম অসিদা এক্স চীফ মিনিস্তর মোহাম্মদ অলিমুদ্দিনগুম্বা মীওই অমা মথৌ তাই হায়না হান্না মিনিস্তর ওইরম্বা ভেতরান পোলিতিসিয়ন ওক্রম জয়না ফোঙদোকখ্রে।
ৱাফম অসি ঙসি মোহম্মদ অলিমুদ্দিন মেমোরিএল ফাউন্দেসন্না শীন্দুনা পাঙথোকখিবা এমদি অলিমুদ্দিনগী মরমদা খন্ন-নৈনবা মেমোরিএল লেকচর প্রোগ্রাম অমদা ও জয়না ফোঙদোকখিবনি।
মেমোরিএল লেকচর অদুদা হান্নগী মিনিস্তর ওক্রম জয়, ফাউন্দেসন অসিগী চীফ এদভাইজর অব্দুল হাশিম, য়ু এন এল এফকী হান্নগী চেয়ারমেন আর কে মেঘেন, রিতয়ার্দ আই এ এস আর কে নিমাইনা মথংশিৎনা অথোইবা মীথুং, থৌরম মপু অমসুং অখন্নবা মীথুং ওইনা শরুক য়াখি। মেমোরিএল লেকচর অদুদা এম য়ুগী মণিপুরী দিপার্তমেন্তকী এসিস্তেন্ত প্রোফেসার নাওরেম সনাতোম্বা, দি এম য়ুগী এসোসিএত প্রোফেসার দাঃ সয়েদ অহামদনা রিসোর্স পার্সন ওইনা ৱা ঙাঙখি।
অথোইবা মীথুংলেনগী ৱারোলদা ভেতরান পোলিতিসিয়ন ও জয়না হায়, লৈখিদ্রবা এক্স সি এম অলিমুদ্দিনগী তেনখ্রবা মতম অদুদা তৌরম্বা থবক থৌরমশিং ঐখোয়না শীংথাবগী লোইবা নাইরোই। মহাক্কী মথৌনা মরিংজেল অদুনা ঙসি মণিপুর অসি চাওখৎ খোঙথাংদা চৎপা ঙম্বনি হায়বদা হায়মনবা থোক্লোই।
ও জয়না হায়, হৌজিক্কী মতমগী রাজনীতিগী মওং মতৌ অসিগা অলিমুদ্দিনগী রাজনিতিগী মওং মতৌগা য়াম্না খেন্নবা লৈ। হৌজিক মতমগী রাজনিতি অসিদি মচানা মি হাৎলুরবসু কন্নবা হোৎনৈ, মরী মতাগী ঙাক্লৌ, মশাগী চাওখৎনবা তৌই। অদুবু অলিমুদ্দিনদি মচানা উনগে হায়বদা ক্যু লেপহনখি। হৌজিক্কী মতমগী রাজনিতি অসিদা রুল ওব লো লৈত্রে।
মতম অমদা মণিপুর শেম্নবগী মঙ অমগা লোয়ননা তুংগী মণিপুর অমগী মঙলানদা, তুম্বা চাবা খঙদনা রাজনিতিগী প্লেতফোর্মদা মণিপুরবু শক্তাক্নবা হোৎনরম্বা অলিমুদ্দিনগী মেমোরিএল লেকচর অমদা নীংতন্না ৱা ঙাঙবা ফংজবা হায়বসি মপুনা থৌজানবনি। ঐখোয় ঙসিদি অনৌবা ফীরেপ, ৱাশক, ৱাখল্লোন, মীৎয়েং অমদি অনৌবা মণিপুরগীদমক ঐখোয় চপ চানা খৌদাং লৌবগী থৌনা-লিংজেল অদু লৈমিন্নরসি। হৌজিক ওইরিবা মণিপুরগী ফীবম অসিদা এক্স সি এম অলিমুদ্দিনগুম্বা মী অমা মথৌ তাই হায়না ও জয়না মখা তানা ফোঙদোকখি।
থৌরমগা মরী লৈননা য়ু এন এল এফকী হান্নগী চেয়ারমেন আর কে মেঘেননা হায়, কুমজা ১৯৬৮ দা লিংখৎখিবা পান মণিপুর য়ুথ লিগনা ১৯৬৯গী অগস্ত ১৩ দা পেত্রিওতস দে থৌরম পাঙথোকপা হৌখি, মসিগী মমাঙদা পেত্রিওতস দেগী থৌরম অসি পাঙথোকপা ঙন্নরমদে। নুমিৎ অদুদা অলিমুদ্দিনবু চীফ গেস্ত ওইনা শরুক য়ানবা হায়জখি। নুমিৎ অদুদা মহাক্বী মাইথোংদা তাখিবা মণিপুরবু নুংশিবা পোজিতিব ওইবা মওং মতৌ অদু ঙসিসু মীৎতা উরি। নুমিৎ অদুদনি পেত্রিওতস দেবু মহাক্বা ছুতি লাউথোক্লম্বসু।
অলিমুদ্দিননা লমদম অসিগীদমক্তা তৌরম্বশিং পল্লুদ্রবসু খঙনরবা ৱাফমনি। মণিপুরগী মৈতৈ পাঙলশিংনা মণিপুরগীদক্তা করি করি থৌদাং লৌই হায়বসি ঐখোয় খুদিংমক্না খঙলবনি। হৌজিক ওইরিবা মণিপুরগী ফীবম অসিদা অলিমুদ্দিন গুম্বা মশাগী খনদবা, কম্যুনিতিগী খন্দবা থম্মোয় শেংবা মণিপুরগীদমক্তা কথোকপা থৌনা ফাবা, মরিংজেল লৈবা মীওইশিং থোরকপা অদুগা নাগাগীসু য়াংমাসো শাইজাগুম্বা লুচিংবশিং থোরকপা মথৌ তাই হায়নসু আর কে মেঘেননা মখা তানা ফোঙদোকখি।
সোর্স : পোক্নফম
0 কমেন্ট:
কমেন্ট তৌবিয়ু