আগরতলাদা অহানবা ওইনা অৱাং নোংপোক্কী 'মণিপুরী নেশনেল ডাইস্পোরা মীট'
আগরতলা, ফেব্রুৱারী ১২ : অৱাং নোংপোক্তা হৌজিক হোংলক্লিবা জিও-পোলিটিক্স অসি য়েংদুনা লমদম অসিদা চোইজাইননা খুন্দা লৈতানা লৈরিবা মণিপুরীশিংগী পুন্সী মহিং অমদি তুংদা ওইরক্কদবা ফীভম মতৌ করম্না থেংনবা য়াগনি হায়বসিদা ইউনাইটেদ কমিটি মণিপুর (ইউ সি এম) না ত্রিপুরা গী মণিপুরী কাউন্সিল ত্রিপুরা অমসুং ত্রিপুরা মণিপুরী ষ্টুডেন্ট-য়ুথ কো-অর্ডিনেশন কমিটি অনীগী মতেং লৌরগা 'মণিপুরী নেশনেল ডাইস্পোরা মীট ২০২৬' থৌরম পাঙথোকখ্রে।
ইউ সি এমগী চহী অমা চুপ্পা পাঙথোকপা সিলভর জুবিলি থৌরমগী শরুক অমা ওইনা ফেব্রুৱারী ১০, আগরতলা শহীদ ভগৎ সিং যুব হোস্টেলগী হোলদা পাঙথোকপা থৌরম অদুদা ত্রিপুরা খক্তগী নত্তনা আসাম, মণিপুর, মিজোরাম, অরুনাচল প্রদেশ, মেঘালয় নচিংবা অৱাং নোংপোক্কী ষ্টেটশিংদগী মণিপুরী ডায়াস্পোরাশিং অমসুং রিসোর্স পার্সন শিং য়াওনা থৌরম অদুদা মীওই চাম হেন্না শরুক য়াখি। ইউ সি এমগী প্রেসিডেন্ট ৱাই কে ধীরেননা থৌরম মপু ওইরগা সাহিত্য একাডেমি, নিউ দিল্লী মণিপুরী লোলগী এডভাইজরি বোর্ডকী মেম্বর ড. কে এন চান্দনা মোডেরেটর ওইখি। খন্ন-নৈন থৌরম অদুদা মণিপুরদগী ইউ.সি.এম ফাউন্ডার মেম্বর এন.জি নোংয়াই, এডভাইজর খোমদ্রাম রতন, ভাইস প্রেসিডেন্ট খুরাইজম অথৌবা, আসামদগী মণিপুরী কনবা লুপগী শেরাম হেরাজিৎ, অরুনাচল প্রদেশগী এম.ডব্লিউ.এস.এপি চীফ এডভাইজর এস দেবেন শর্মা, মিজোরাম ষ্টেটদগী ওল মিজোরাম মণিপুরী এসোসিয়েশনগী সেক্রেটারী কে প্রদীপ কুমার, মেঘালয় মণিপুরী ফোরামগী থোকচোম সুরজিৎ অমসুং ত্রিপুরাদগী মণিপুরী কাউন্সিল ত্রিপুরাগী কে ধীরেন সিংহ, ত্রিপুরা মণিপুরী ষ্টুডেন্ট-যুথ কোঅর্ডিনেশন কমিটিগী এস বিমল অমসুং ৱাই প্রবীন অদুগা ইন্টরেকশন্দা আরকে তরুনজিৎ সিংহ শরুক য়াদুনা তোঙান তোঙানবা মীৎয়েংদা নৈনদুনা ৱা ঙাংখি।
নৈন থৌরম অদুদা মণিপুরী অটনোমাস কাউন্সিলগী ৱাফম, মীশিং গী চাংদা রিজার্ভেশন থম্বা, ত্রিপুরাদা মণিপুরী লোলবু শক খঙবা, 'মণিপুরী' হায়রগা মীতৈ খক্তবু খঙবা নত্তে, 'মণিপুরী' হায়বসি তাঙ্খুল, কবুই, মাও নচিংবসু কোল্লিবনি, পাঙলশিংসু মণিপুরী জাতি মনুং চল্লিবনি হায়বা ৱাফমদসু নৈনদুনা ৱা ঙাংখি। তোঙান তোঙানবা ষ্টেটশিংদা তারিবা মণিপুরী শিংনা মশক থোক্না হিংনবা হোৎনবদা অমনা অমগী মতেং পাংবা মথৌ তায়। লমদম অসিগী তোঙান তোঙানবা মফমদা খুন্দারিবা মণিপুরীশিংনা করম্বা পুন্সি মহিংদা লৈরি অমদি মখোয়না লৈরিবা ষ্টেটশিংদুগী পোলিটিকেল, সোসিয়েল ইকোনোমিদা অকায়বা পীদনা মতৌ করম্না পাও ফাওনদুনা খুদোংথিবা খুদিংমক অমত্তা ওইনা থেংনবা অমদি পেরেন্ট মণিপুর ষ্টেট অমসুং ডায়াস্পোরা মণিপুরীশিংগী মরক্তা সোসিও কলচরগী অকনবা মরি লৈবগা লোয়ননা মালেমগী জাতিশিংগী মরক্তা মীরক মীচিনথিদবা মতিক লৈনা ইজ্জৎ লৈনা জাতি কাঙলুপ ওইনা হিংমিন্নবা থৌদাং লৌমিন্নবা হায়বসিদা নৈনখি।
সোর্স : মরূপ
0 কমেন্ট:
কমেন্ট তৌবিয়ু