উমংলাই হরাওবগী মতাংদা পাক শন্না মীফম পাঙথোক্কনি
ইম্ফাল, জানুয়ারি ২৩ : লমদমসিদা নত্তনা তোঙান-তোঙানবা মৈতৈ-শিংনা খুন্দারিবা লৈকাই/খুল কয়াদা পাঙথোক্নরিবা উমংলাই হরাওবগী মতাংদা উমংলাই কনবা অপুনবা লুপ (উকল) না লাই থৌগল লুপশিংগা খুৎশম্নদুনা খন্ন-নৈনবগী মীফমশিং পাক-শন্না পাঙথোকপা হৌরগনি হায়না উকলনা চেরোল অমদা ফোঙদোরক্লি।
লাইফম কয়াদা খন্ন-নৈনবগী মীফমশিং অসি পাঙথোক্তুনা মতৌ করম্না লাই হরাওবগী থৌরম লিক্লম কাংলোন কায়দনা পাঙথোক্কদগে, লাই হরাওবনা মীওইবা খুনাইদা তাক্লিবা মরু ওইবা পাউতাকশিং মপুং ফানা লৌশিন মিন্নগদগে, লৈকাই অমা, খুল অমা নৎত্রগা লৈবাক অসি করম্না তংদু লৈতানা পানগদগে অমদি মীওইবা খুনাই অসি নুংশি চান্ননা হিংমিন্নদুনা করম্না চাওখৎকদগে হায়বনচিংবা লাই হরাওবনা তাক্লিবশিং মীফম অসিদা নৈনদুনা খঙমিন্ননবা হোৎনগনি।
ঐখোয়না মতম শাংনা, শেল তিংনা লাই হরাওনরবসু মসিগী কান্নবা অমদি মরু ওইবা শরুকশিং থৈদোক্তুনা থম্বগী মওং অমা চত্থনবগুম তৌনরি। লাই হরাওবগী লিক্লম-কাংলোন পুম্নমক নাথৈরগা লাই হরাওবনা কয়া অমসু য়াওদবা নত্তে। পুম্নমক অসি লাই হরাওবনা মশাগী অশেংবা লিক্লমদগী থৈদোক্লুবনা ওইরম্বসু য়াই। তৌবতবু লাই হরাওবা শিল্লি-লাংলিবশিংনা লাই হরাওবগী মরু ওইবা ৱাখল্লোন খরদংদা ওইরবসু খঙমিন্নদনা শিনবা লাংবনা মরম ওইদুনা পংয়া-য়াবা থৌরম অমা ওইনা উনরক্নবগী মচাক অমসু ওইরকই। মসি থোক্তনবা লাই হরাওববু শিল্লি-লাংলিবশিংনা লাই হরাওবগী মরু ওইবা খরমখৈদি খঙমিন্নরগা লাই হরাওবগী থৌরম শিনবীয়ু। মসিগীদমক লাই হরাওবা শিন-লাংগদৌরিবশিংনা ইশা-ইশাগী লাইবুঙদা লাই হরাওদ্রিঙৈগী মাঙওইননা লাই হরাওবগী মরমদা অখং-অহৈশিং য়াওনা খন্না-নৈনবগী মীফমশিং মাঙজৌননা তঙাইফদনা পাঙথোক্নবা হোৎনবীয়ু। খন্ন-নৈনবা অদুদা মথৌ তাবা অখং-অহৈশিং উকলনা মতেং পাংনবা থৌরাং তৌদুনা লৈরে হায়বসিনি।
নাকল অমরোমদসু, লাই হরাওবগী থৌরম অসিদা ঙাওশিন-ফৈজিন্নবা পাম্বা মীওই কয়া চঙশিল্লক্তবা নত্তে। মখোয়গী ঙাওশিন-ফৈজিন্নবা থৌওং কয়া অদুনা চুম্না লাইথৌ তৌজরিবা মাইবা, মাইবী কয়াবুসু মীয়ামদা লান্না উহন্দুনা ফজদবা ফিবম কয়া সোসিয়েল মিডিয়া নচিংবদা উৎথোরকই। মসিগী অৱাবা নৎত্রগা ফজদবা কয়া অদুনা মাইবা, মাইবীশিংনা থেংনহৌই। মখোয়দা নত্তনা লৈবাক্কী লৈরিবা লোয়শঙশিং ফাওবা চেন্থরক্লি।
পুম্নমক অসি লাই হরাওরিবা লৈকাই, খুল অদুগী মীয়ামদা লাই হরাওবগী মরু ওইবা অমদি তঙাইফদবা কয়া খঙমিন্নবা ৱাৎপদগী থোকহল্লকপা কয়া য়াওরি। মসিনা মরম ওইদুনা লৈকাই, খুলগী মীয়াম লোইনা নৎত্রবসু খরমখৈদি লাই হরাওবগী মরু ওইবা, তঙাই ফদবা অমদি কান্নবনচিংবশিং অসি খঙমিন্ননবা হোৎনমিন্নবা মথৌ তারে। মসিগীদমক লাই থৌগল লুপশিংনা শিল্লগা লাই হরাওবগী মাঙওইননা লাই হরাওবগী মতাংদা খন্ন-নৈনবা মীফমশিং শিনবীয়ু হায়রি।
মমাং চহিগী মেরা থাদা পাঙ-থোকখিবা মেরা মীফমনা লৌখিবা ৱারেপকী মতুং ইন্না কনাগুম্বা লাইফম অমদা থোকহন্নিংদবা থৌদোক থোকহল্লকপা লাইফম অদু লাক্কদবা চহিশিংদা লাই হরাওবা য়াহন্দবা হায়বা ৱারেপশিং লৈখিবনা লাক্কদৌরিবা চহি অসিগী লাই হরাওবগী থৌরমশিংদদি ঐখোয় পুম্নমক্না চেকশিন্না লাই হরাওবগী থৌরমশিং শিনমিন্নবগী তঙাই ফদবা কয়া লৈ। মসিদসু নত্তনা ঐখোয়গী লৈরিবা লাইবুংশিং থা অমগী মনুংদা নোংমা পানবা অমদি থানিল নুমিৎশিং লাইবুং কাগদবা লৈবনা মদুগী তৌগদবা কয়া অদু লাই হরাওরিঙৈদা তৌহৌগদবা কয়া অমসু লৈবনা পুম্নমক খন্নরগা লাই হরাওবীনবা উকলনা আপিল তৌরি।
চহি অসিগী লাই হরাওগদৌরিবা পুম্নমক তেক্ত-কাইদনা অশোয় অঙাম য়াওদনা হরাওদুনা নুংঙাই য়াইফবা লৈকাই খুল অমমম ওইবগা লোয়ননা তংদু-লৈতাবা, নুংশি চান্নবা অমদি চাওখৎপা ওইরসনু হায়নসু উকলনা অরোয়বদা থম্লক্লি।
সোর্স: সঙাই এক্সপ্রেস
* Cover Photo @ Yenshembam Lanthoiba Mangang (Facebook)
0 কমেন্ট:
কমেন্ট তৌবিয়ু