মায়চৌ থৌকাচানপাগী মীতম মায়খুম হাংদোক্তুনা ১০০ শুবা মপোক কুমওন পাঙথোকখ্রে
‘ঐখোয়গী ইরোল ইয়েক্কীদমক চাওথোক্না হিংগদবনি’ - এমএলএ সাপম কুঞ্জকেশ্বর
ইম্ফাল, জানুয়ারি ২২ : লৈবাক অসিগী অৱাং নোংপোক ষ্টেটশিংগী মনুংদা মশাগী ময়েক লৈবা ফুরুপ মশীং য়ামদে হায়রদুনা পীক্লবা মণিপুরগীদি পুক্কৈ ওইরিবা ইরোল ইয়েক অসিগীদমক কংলৈচা খুদিংমক্না চাওথোক্না হিংগদবনি হায়না এমএলএ সাপম কুঞ্জকেশ্বরনা ফোঙদোকখ্রে।
ৱাফম অসি ঙসি মায়চৌ থৌকাচানপা নীংশিং থৌশিল লূপ অমদি কুরাও মখোং য়ানাইটেদ ক্লাব অনীনা শীনমিন্নদুনা কংলৈ ইয়েক্কী লময়ানবা মায়চৌ থৌকাচানপাগী মীতম মায়খুম হাংদোকপগা লোয়ননা লোল অমসুং ময়েক্কী লময়ানবা অসিগী চহী ১০০ শুবা মপোক কুমওন নীংশিং থৌরমদা শরুক য়ারদুনা ফোঙদোকখিবনি।
কুরাও মখোংগী য়ুনাইটেদ ক্লাবদা পাঙথোকখিবা থৌরমদা এমএলএ না মখা তানা হায়, ইশাগী ময়েক তম্বদা চাথোকচবা ফাওরবদি মালেমগী থাক্তা ময়েক অদু পুখৎপা ঙমগনি। মৈদিংঙু পামহৈবগী মতমদা বেঙ্গলি ময়েক অসি মণিপুরদা চৎনহল্লকখিবনি। মতম অদুগী পুয়াশিং মৈ থাদোকখিদুনা ঐখোয়গী ইয়েক লৈজৈ হায়বসি মীপূম খুদিংমক্না খঙনরমদে। অদুবু ইয়েক অসিবু কন্নবা হোৎনবদা মশাগী ওইজবা কয়া থাদোকখিবা মায়চৌ থৌকানচানপাগুম্লবা মীওই কয়া থোরকপদগী ঙসিদি মাষ্টার ডিগ্রী ফাওবা ময়েক অসি তম্বা ফংলে হায়খি।
মায়চৌ অহল অসি ময়েক্কী মাঙজিল থাবা লময়ানবা অমনি হায়বদা হায়মনবা থোক্লোই হায়রদুনা ঐখোয়গী ইয়েক লৈ হায়না কত্থোকপা অমগা লোয়ননা অহল ইবুংঙো অসিনা হোৎনরকপদগী ময়েক অসিগী ক্রেদিট পূম্নমক মঙোন্দা পীফম থোকই হায়খি। লোয়ননা ঐখোয়গী ইয়েক অসি নোংমদি মশেক মঙাল থোক্না মারেম পূম্বগী মমাঙদা উৎপা ঙম্লক্কনি। ময়েক অসিবু মীয়ামগীদমক খোমজিন তাশিনবীরম্লিবা অহল ইবুংঙো অসিগী মতিক ময়াইদি চহী য়াম্ল য়াম্লগা হেনগৎলক্কনি হায়খি।
থৌরম অসিদা মায়চৌ থৌকাচানবা নীংশিং লূপকী সেক্রেটারি সুরেস সাইখোম্না ফোঙদোকখিবদা মণিপুরগী ইরোল ইয়েক্কী অচৌবা থৌদাং লৌখিবগীদমক কুমজা ২০০৭ তা কংলাদা পাঙথোকখিবা মায়চৌ অসিগী ৮৪ শুবা মপোক কুমওন থৌরমদা নিংথৌ লৈশেম্বা সনাজাওবনা মহাকপু কংলৈ ইয়েক্কী লময়ানবা হায়দুনা মীংথোল পীদুনা ইকায়খুম্নবা উৎখিবনি হায়খি।
মায়চৌ অসিনা কুমজা ১৯৫০দগী লেপ্তনা মীতৈ ময়েক লেপ্নবগী য়ূম্ফম ওেইবা পুয়া‘ৱাকোকলোল থিলেন সলাই অমাইলোন পুকোক পুয়া’ মীয়অমদা পুথোকখি। কুমজা ১৯৬৯ দা পুয়া অসিদা য়াওরিবা মপুং ওইবা মীতৈ ময়েক ১৮ অমসুং অতোপ্পা ময়েক ৯ পূন্না ময়েক ২৭ কা লোয়ননা চৈতপ ইয়েক অমসুং চৈশিং ইয়েকপু ময়েক অসিগী মরু ওইবা শরুকনি হায়না জজশিংনা লৈঙাক্তা রেকমেন্দ তৌখিবনি। লোয়ননা ষ্টেট লৈঙাক্না ময়েক ২৭ অসিবু চৎননবা অয়াবা পীরকখিবনি। ঙসিদি ময়েক অসি মাষ্টার ডিগ্রীগী থাক ফাওবা তম্লে হায়খি।
ঙসিগী থৌরম অসি পেনা য়াকাইরোল শক্তুনা হৌদোকখিবগা লোয়ননা ক্লাব অসিদা মায়চৌ অসিগী মীতম অমা মায়খুম হাংদোক্তুনা হৈকৎ লৈকৎ তমখি। লোয়ননা কুমজা ২০২২ গী কোসেমনা লৌবা এগজামিনেসনদা মীতৈ ময়েক (এম আই এল) দা মার্ক খ্বাইদগী য়াম্না ফংখিবী মহৈরোয় তরুক্তা মনা পীদুনা পূক্নিং থৌগৎখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু