শক্নাইরবী অইবী ক্ষেত্রিময়ুম সুবদনিগী ৭০শুবা মপোক নুমিৎ থৌরম পাঙথোকখ্রে
ইম্ফাল, সেপ্টেম্বর ১৫: ক্ষেত্রিময়ুম য়াইমা মেমোরিএল ট্রষ্টনা শিন্দুনা ক্ষেত্রিময়ুম সুবদনিগী চহী ৭০ শুরকপগী প্লাটিনম জুবিলি থা অহুম চুপ্না পাঙথোক্কদবগী অহানবা হৌদোকপগী থৌরম ঙসি ক্বাকৈথেল মোইরাংপুরেল লৈকাইদা লৈবা দোসুয়ালি হোলদা সি এল পি লিদর কৈশাম মেঘচন্দ্রনা অথোইবা মীথুং ওইদুনা হৌদোকখ্রে।
থৌরম অদুদা সৌবাম তোম্বা সিংহ, প্রসিদেন্ত ইসক্বাদ রাইটর্স মোইরাংনা থৌরম মপু, মণিপুর ষ্টেট সোসিএল ৱেলফিয়ার বোর্দকী হান্নগী চেয়ারপারসন ডাক্তর আরকে নয়নসনা দেবী অমদি ইম্ফাল কলেজগী হান্নগী প্রিন্সিপাল লাইশ্রম রন্ধোনি দেবীনা অখন্নবা মীথুংলেন ওইনা শরুক য়াখি।
থৌরমগা মরী লৈননা মনিপুর য়ুনিবর্সিটিগী প্রোফেসর ৱাহেংবম কুমারী চনুনা ক্ষেত্রিময়ুম সুবদনিগী চহী ৭০ গী পুন্সি খোঙচত্তা খুন্নাইগীদমক খোরিরোল হায়বা হিরমদা য়ুমফম ওইরগা অখন্নবা ৱা ঙাঙখি।
থৌরমগী শরুক অমা ওইনা ক্ষেত্রিময়ুম য়াইমা মেমোরিএল ট্রষ্টনা ফোংবা আরকে তম্ফাসনানা মৈতৈলোন্দা থম্মোয়গী থাওমৈ মীংথোনবা লাইরিক অমসু ফোঙখি।
থৌরমগী অথোইবা মীথুংলেন ওইনা শরুক য়াখিবা সি এল পি লিদর কৈশাম মেঘচন্দ্রগীনা ফোঙদোকখিবদা মনিপুরী লিটরেচর এন্দ কলচরগীদমক লমদমসিগী অইবা অইবীশিংনা লৌরিবা থৌদাংশিং থাগৎনিংঙাইনি। ঙসি লমদম অসিগী শক্নাইরবী অইবী ক্ষেত্রিময়ুম সুবদনিগী চহী ৭০ শুরকপা প্লাটিনম জুবিলি সেলেব্রেসন অসি ফেষ্টিবল অফ লিটরেচরগা চপ মান্নবা থৌরম অমনি হায়না লৌজে। মরমদি থৌরম অসিগী মনুং চন্না শৈরেং পাবা, লাইরিক ফোঙবা, অইবীগী মরমদা স্কলোরশিংনা ৱা ঙাঙবা অমদি লোন অমদি লিটরেচরগী মরমদা খন্না নৈনবা মায় পাক্না পাঙথোকপা ঙম্বা অসিনি।
কৈশাম মেঘচন্দ্রনা হৌজিক ওইরিবা মনিপুরগী ফীবম অসিগী মতাংদা নুংনাংবা ফোঙদোক্লদুনা হায়খিবদা কুমজা ২০২৩ গী মে ৩ দগী থোরক্লিবা ইরাং অসিগী ৱারোইশিন ঙমদনা লৈপাক মীয়াম অসিবু খম থেংনা ৱাহন্দুনা থম্লিবসি অসিনা তাকই মদুমদি হৌজিক পাল্লিবা বিজেপি লৈঙাক অসিদা মীয়াম্না থাজনিংঙাই করিসু লৈত্রে। লৈঙাক অসিনা মীয়ামগী পুন্সি অমসুং লন থুম ঙাকপা ঙমদবা হায়বসিমক লৈপাক মীয়ামগী অচৌবা নিংবা কায়নিংঙাইগী মশক্নি।
ক্ষেত্রিময়ুম য়াইমা মেমোরিএল ট্রষ্ট অসিগী সেক্রেটরি রাকেশ নাওরেমনা থৌরমগী নুংগী ওইবা ৱারোল থম্লদুনা ফোঙদোকখিবদা কুমজা ২০২৩ গী জানুয়ারি ২১ দা শেমখিবা ট্রষ্ট অসিনা তোল্ল তারবা মীওইশিংদা মতেং পাংবা, হৌজিক হৌজিক লাঞ্জেংদুনা লৈরিবা ইচিন ইনাওশিংগী অৱাবদা শরুক য়াবা, লাইরিক ফোঙবা ঙমদ্রবশিংগী লাইরিকশিং চহী খুদিংগী ফোঙবা অমদি চহী ২/২ কান্নরগা ক্ষেত্রিময়ুম য়াইমা অমসুং থম্বাল মেমোরিএল লাইফটাইম এচিভমেন্ট এৱার্দশিং পীবনা ইকায়খুম্নবা উৎপনা ট্রষ্ট অসিগী মরূওইবা থৌরমশিং ওইদুনা লাক্লি। ট্রষ্ট অসিগী চেয়ারপারসন ওইরীবি শক্নাইরবী অইবী ক্ষেত্রিময়ুম সুবদনিগী চহী ৭০ শুরকপগী মপোক নুমিৎ থৌরম থা অহুম চুপ্না পাঙথোক্নবগী হৌদোকপগী থৌরম অসি ঙসি মায় পাক্না পাঙথোকপা ঙম্বা অসিমক ট্রষ্ট অসিগী অচৌবা মায় পাকপা অমনি।
ট্রষ্ট চেয়ারপারসন ওইরীবি ক্ষেত্রিময়ুম সুবদনিনা ফোঙদোকখিবদা লমদম অসিগী ওইবা অইবীশিংগী তুংগী মরাইবক খল্লুবদা অৱাবা ওই। অইবা অইবীশিংবু লৈঙাক অমদি মীয়াম্না থাক ৱাংনা থম্বীরবা মতমদা মনিপুর খুন্নাই অসি চাওখৎ লমজেলদা য়াওবা ঙমগনি। ঐহাক্কী চহী ৭০ শুরকপগী থৌরম ট্রষ্ট অসিনা শিনবিবা অসিমক পুক্নিংদা আপেনবা অমদি নুংশিবা ফোঙই। ইবগী লমদা চহী ৫০ রোম খোংদারক্লবা ঐহাক্কী ইবগী খোংচৎ লেপখিরোই। দিসেম্বর থাবুম অসিগী মনুংদা লামাই লীশিং ২০০০ রোম পানবা অচৌবা লাইরিক অমসু থৌরাং তৌজরে। লোয়ননা ট্রষ্ট অসিনা লৈবাক মীয়াম অমদি লমদম অসিগী অইবা অইবীশিংগী য়াইফ থৌরাং কয়াসু পাঙথোক্নবা থৌরাং তৌরি।
ঙসিগী থৌরম অদুগী মনুং চন্না শক্নাইরবা অইবা এনবি কোঞ্জেংবমগী মফমদা শকখঙচে অমদি শাল খুদোল তমুদুনা ইকায়খুম্নবা উৎখি।
সোর্স - সঙাই এক্সপ্রেস
0 কমেন্ট:
কমেন্ট তৌবিয়ু