থিয়েটরগী লমদা শক্নাইরবা রতন থিয়াম লৈখিদ্রে
ইম্ফাল, জুলাই ২৩: মালেমদা থিয়েটরগী লমদা শক্নাইরবা প্লেরাইটস, দাইরেক্তর, দিজাইন্নর, ম্যুজিসিয়ান, পেন্টিং এন্দ এক্টর, লোয়ননা সঙ্গিত নাতক একাদেমি এৱার্দি রতন থিয়াম ঙসি নোংঙাল্লমদাই পুং ১.৩০ রোম তাবদা রিমস হোস্পিটালদা মশাগী অনাবা অমনা মরম ওইরগা লৈখিদ্রে। মশাগী চহী ৭৭ শুখ্রে। মহাক্না লৈখিদবদা মণিপুর অমদি মপাল লমদা লৈরিবা মৗওইকয়ানা অৱাবা অমদি নুংঙাইতবা ফোঙদোরক্লি।
লৈকায়গী মীয়াম্না নুংশিনা ‘নিমাই’ হায়না কৌবা শক্নাইরবা রতন থিয়ামগী লৈখিদ্রবা হকচাং ঙসি মহাক্কী পোক্নফম ইম্ফাল ওয়েস্টকী উরিপোক হাওবম দেবা লৈকায়দগীনি। মহাক্না কুমজা ১৮৭৬ দা লিংখৎলম্বা উরিপোক কাংচুপ রোদ, শমুশঙদা লৈবা কোরস রিপেটরি থিয়েতরদা পুরক্তুনা লৈ-শু কৎতুনা ইকায় খুম্নবা উৎখি। অৱাবা ফোঙদোকপা অমদি লৈশু কৎপগী থৌরম অদুদা হান্নগী চীফ মিনিষ্টর ওক্রম ইবোবি, হান্নগী আর্ট এন্দ কলচর মিনিষ্টর জয়েন্তকুমার, সিভিল অমদি পুলিসকী মকোক থোংবা ওফিসার, শক্নাইরবা ফিল্ম, থিয়েটর অমদি দ্রামাগী আর্টিষ্ট অমদি ইমুং মনুং অমসুং শাগৈ নাতৈগী মীওই কয়ানা শরুক য়াখি।
হান্নগী আর্ট এন্দ কলচর মিনিষ্টর ওইরম্বা এল জয়ন্ত কুমারনা হায়, রতন থিয়াম্না লৈখিদবা অসি মণিপুর অমদি মালেমগী ওইনা খ্বাইদগী অচংবা মীশক অমা মাঙজবনি। থিয়েটরগী লমদা অমদি থিয়েটরবু নুংশিজবা চেন-চোংলিবা কয়াদা রতন থিয়াম্না লৈখিদবদা অচৌবা অৱাৎপা মেনবা ঙম্লরোইদবা অহাংবা অমা ওইহৌরগনি।
লৈ-শু কৎতুনা অৱাবা ফোঙদোক অদুদা শরুক য়াখিবা সিনিয়র জর্নেলিস্ট এন ইবুংঙোচৌবীনা হায়, রতন থিয়ামগুম্বা থিয়েটরগী লমদা হৈথোই শিংথোইবা মীশক্তি চহী লিশিং কয়াগী মতুংদা তাইবংপাল অসিদা অমুক হন্না খোদারক্কনি হায়না শিংথাখি। মহাক্না মখা তানা হায়, লৈখিদ্রবা রতন থিয়ামগী মমিং লৈরবা প্লে চক্রব্যহু, উরুবাগাম, উত্তরপ্রিয়দর্শিনী, ঋতুসংহরাং অমদি অন্ধায়ুগনা ইন্দিয়ান থিয়েটরদা অচৌবা মফম কল্লিঙৈ থেংনখিবা অৱা নুংঙাই কয়া হৌননা নুংশিংদুনা ৱাফম কয়াসু ফোঙদোকখি।
শক্নাইরবা থিয়েটর আইকোন রতন থিয়াম্না হিংলিঙৈ কুমজা ১৯৮৭-১৯৮৮ ফাওবা নেসনেল স্কুল ওফ দ্রামাগী দাইরেক্তর ওইনা থৌ পুরমখি। কুমজা ১৯৮৭ দা সঙ্গিত নাটক একাদেমি এৱার্দ, ১৮৯৮ দা পদ্মশ্রী এৱার্দ, ১৯৯৯ দা কালিদাস সম্মান এৱার্দ, ২০০৮ তা ইন্দিরা গান্ধী এৱার্দ ফোর নেসনেল ইন্টিগ্রেসন, ২০১২ দা সঙ্গিত নাটক একাদেমি ফেলোশিপনচিংবা এৱার্দ কয়াসু ফঙখি।
সোর্স: পাউজেল
0 কমেন্ট:
কমেন্ট তৌবিয়ু