য়ু লিগেলাইজ তৌবগী মায়োক্তা খোঙজং : ৩শুবা নুপী লালগী শেম শারে: কাদা
ইম্ফাল, অক্টোবর ০১ : কোএলিসন এগেনষ্ট দ্রাগ এন্দ অলকোহোল (কাদা) অমদি কোংবা রোদ অপূনবা নুপী লূপকা খুৎশম্নদুনা মণিপুর লৈঙাক্না য়ু লিগৈলাইজ তৌরগনি হায়ান থৌরাংলিবা অসিগী মায়োক্তা ৱাকৎ মীফম অমা শীংজমৈ কোংবা রোদতা চত্থখ্রে।
ৱাকৎ মীফম অদুদা শরুক য়াখিবা কোংবা কাদা য়ুনিটকী অমদি কোংবা রোদ অপূনবা নুপী লূপকী জেনারেল সেক্রেটারি খাঙেম্বম প্রেমিলানা হায়, মণিপুরদা লৈরিবা লম-লমগী নুপী ময়াম্না ময়াই কাবা চিঞ্জাক থিংবগী মায়োক্তা চহী ৪৫ রোম মশাগী অচিনবা থবক কয়া কায়থোক্তুনা কন্না হোৎনদুনা লাক্লি। ময়াই কাবা চিঞ্জাক্কী ঈপাক্তা তুংগী তুংগী মীরৈালশিং লূপখিদনবা কন্না হোৎনরিঙৈ চৈরকসিদা সী এমনা য়ু লিগেলাইজ তৌরকপা অসি য়ানীংদে হায়না ফোঙদোকখি।
মহাক্না মখা তানা হায়, হৌজিক হৌজিক অহুম শুবা নুপী লালগী শেম শাদুনা লৈরে। য়ু লিগেলাইজ তৌবা অসি য়াম্না ফৈ অদুবু অতোপ্পা মপান লৈবাক কয়াগা চাংদমনবদি খক য়ারোই। লমদম অসিগী মীয়াম য়ু থকপা মতমদা ইমুংদা করি চারি, করি থক্লি খঙদবা মীওইনা অয়াম্বনি। অদুক্কী মতিক করাম চাওবা ঙাক্তনি। য়ু লিগেলাইজ তৌবা হায়বসি মরম চাদে। লমদম অসিগী নুপী খুন্নাইদা অদুক্কী মতিক অৱাবা পীগদৌরিবনি। মসি মুন্না খন্থবীরগা লৈঙাক্না থবক পায়খৎপা চুমগনি হায়খি।
লমদম অসিদা পাক্তক্ননা য়ু অসি অদুমক থিংদুনা লৈরিবনি। সী এমনা য়ু লিগেলাইজ তৌরকপদা লমদম অসিগী মীয়াম হেল্থকী মতাংদা হকচাং ফনা লৈনি হায়বা অদু ওইথোক্লোই। লমদম অসিগী মীয়ামদি য়ু থকপা মতমদা মবুক থন্না থকপগী হৈনবী লৈ। অদুনা লৈঙাক্না অমুক্তং গ্রাউন্ড রিয়েলিটিদা কুমথরক্তুনা মুন্না য়েংবা অমা মথৌ তাই হায়খি।
অমরোমদা, হৌখিবা সেপ্টেম্বর ২০দা মণিপুর লৈঙাক্কী কেবিনেট মীফমনা মণিপুরগী মফম খরদগী য়ু শুংবা, য়োনবগী লৈরম্বা অথিংবা লৌথোকখিবা ৱারেপ অদু হন্দোক্কদবনি হায়না কোএলিসন এগেনস্ট দ্রগ এন্দ অলকোহোল (কাদা) অমদি লমদম অসিগী তোঙান তোঙানবা ইমা লুপশিংনা চত্থরকপা দেমোক্রেটিক ওইবা খোঙজংশিংগী শরুক অমা ওইনা ঙসি তোঙান তোঙানবা দিষ্ট্রিক্টশিংদা ৱাকৎ মীফম পাঙথোকখ্রে হায়না কাদাগী সেক্রেটারি ইনফোর্মেসন এন্দ পাব্লিসিটি খুন্দোংবম আনন্দগী চেরোল অমনা হায়রি।
চেরোল অসিনা হায়, থৌবাল দিষ্ট্রিক্টকী মনুং চনবা ৱাংখেম বাজারদা ৱাংখেম মৈরা পায়বী, দি থৌবাল দিষ্ট্রিক্ট য়ুনাইটেদ উইমেন্স দিভেলপমেন্ট ওর্গানাইজেসন (থৌবাল ইমা) অমসুং কাদাগা পূন্না খূৎশম্নদুনা ‘লৈঙাক্না য়ু শুংবা অমদি য়োনবগী অয়াবা পীখিবা ৱারেপ হন্দোকউ’ হায়না মীয়ামগী ওইবা ৱাকৎ মীফম অমা পাঙথোকখি।
ৱাকৎ মীপম অদুদা শরুক য়াখিবা মীয়াম্না য়ানীংদবা খোল্লাউ কয়া লাওখিবগা লোয়ননা ৱাংখেম মৈরা পায়বীগী সেক্রেটারি লাইরেল্লাকপম বিমোলনা হায়, মণিপুর লৈঙাক্কী ৱারেপ হন্দোকউ, করিগুম্বা মীয়ামগী খোল্লাউ তাবীদবা তারবদি ঐখোয়গী মীয়াম য়ুদগী কঞ্জনবা অকনবা ঈহৌ কয়া চঙশিল্লকপা য়াই হায়খি।
ৱাংখেম মৈরা পায়বীগী এদভাইজর সিঙ্গাম ইবেতোম্বীনা হায়, ঐখোয়গী ৱাংখেম খুল অসিদা নুপা মশীংদগী য়ুগী চৈথেংদগী অৱাবা কয়া মায়োক্নদুনা হিংলিবা লুখ্রাবী মশীংনা হেল্লক্লে হায়বা য়াই। লোয়ননা হৌজিক লৈহৌরিবা নুপাশিং অসিনা য়ু থক্নবা শেল পীয়ু য়াদে হায়দুনা য়ূমগী নুপী অঙাংদা ফুবা চৈবা কয়া তৌরি হায়না ফোঙদোকখি।
অমরোমদা মণিপুর লৈঙাক্না হৌখিবা সেপ্টেম্বর ২০দা য়ু লিগেলাইজ তৌনবা লৌখিবা ৱারেপ অদু হন্দোক্কদবনি হায়না মণিপুরগী তোঙান তোঙানবা মফমশিংদা কোএলিসন এগেনষ্ট দ্রগ এন্দ অলকোহোল (কাদা) অমসুং তোঙান তোঙানবা লূপশিংনা চত্থরকপা খোঙজংশিংগী শরুক অমা ওইনা হৌখিবা সেপ্টেম্বর ৩০গী নুমিদাংৱাইরম পুং ৭ তাবা মতমদা হিয়াংথাং মৈরা পায়বী, কোদোমপোকপী মমাঙ লৈকায় মৈরো পায়বী, কোদোমপোকপী মনীং লৈকায় মৈরা পায়বী, নিঙোম্বম কাদা য়ুনিট অমসুং লংথবাল লেপ মখা লৈকায় মৈরা পায়বীগা পূন্না খূৎশম্নদুনা ইম্ফাল ওয়েষ্ট দিষ্ট্রিক্টকী মনুং চনবা নিঙোম্বমদগী হৌদুনা লংথবাল লেপ মখা লৈকায় ফাওবা মীয়ামগী ওইবা মৈরা খোঙচৎ অমা চৎতুনা য়ানীংদবা ফোঙদোকখ্রে।
মৈরা খোঙচৎ অদুদা শরুক য়াখিবা মীয়াম্না ‘মণিপুরদা য়ু লিগেলাইজ তৌবা য়ারোই’, ‘কেবিনেটকী ৱারেপ হন্দোকউ’ অমসুং ‘মণিপুর মীয়াম য়ুদগী কল্লু’ হায়বা খোল্লাউ লাউখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু