১৬ শুবা মণিপুর ম্ভেত ফিল্ম এৱার্দ- ২০২৪ লান্থোকখ্রে
মণিপুরী সিনেমাগী হৌরকফম্না মণিপুরী ফিল্মগী মহাও মালেমগী ভাবোকশিংদা পাক-চাউনা য়ৌহনবা ঙমগনিঃ গবর্নর
ইম্ফাল, মে ২৮ঃ মণিপুরী সিনেমাগী মপাঙ্গল অসি হৌরকফমদা লৈ। মসিগী হৌরকফম অসিনা ইন্দিয়া অমদি পৃথিবীদা লৈরিবা ভাবোকশিংদা মণিপুরী ফিল্মগী মহাও অসি পাক-চাউনা য়ৌহনবদা অচৌবা মতেঙ ওইগনি হায়না মণিপুরগী গবর্নর অজয় কুমার ভল্লানা ফোঙদোকখ্রে।
ৱাফম অসি মণিপুর স্তেত ফিল্ম দিবলপমেন্ত সোসাইতি (এম এস এফ দি এস) না শীন্দুনা ১৬ শুবা মণিপুর স্তেত ফিল্ম এৱার্দস, ২০২৪ লান্থোকপগী থৌরমদা গবর্নরনা ফোঙদোকখিবনি।
ঙসি পেলেস গেত্তা লৈবা এম এস এফ দি এসকী ওদিতোরিয়মদা পাঙথোকখিবা থৌরম অদুদা চীফ গেস্ত ওইনা শরুক য়াখিবা মণিপুরগী গবর্নর অজয় কুমার ভল্লানা হায়, মণিপুরী সিনেমাগী থোইদোক হেন্দোকপা, তোপ-তোপ্পা ক্রিএতিভিতি অমদি কমিতমেন্তপু শকখঙবা ওইনা পাঙথোক্লিবা ১৬লক শুবা মণিপুর স্তেত ফিল্ম এৱার্দস, ২০২৪ লান্থোকপগী থৌরম অসিদা মহাক্না শরুক য়াবা ফংবা অসিগীদমক
নুংঙাইবা ফাওই। ফিল্ম হায়বসি চুম্নগী এন্তরতেনমেন্ত অমখক নত্তে। ফিল্মগী খুত্থাঙদা ঐখোয়না অনীংবা অপাম্বা, স্ত্রগল, হিস্তরি অমদি মীয়ামগী ইমোসন কয়া অদু উবা ফৎই। মণিপুরী সিনেমানা মণিপুরগী তোপ-তোপ্পা কলচরেল হেরিতেজ অমদি লাইব এক্সপরিএন্স অদু প্রিজার্ব তৌবগা লোয়ননা মদু উত্থোকপদা মরু ওইবা খৌদাং লৌই। ফিল্ম ক্রিতিক্স, রিসার্ছর অমদি অইবশিংনা মণিপুরী সিনেমাগী জর্নি অসিবু দোকুমেন্ত, স্তদি অমদি এনালাইজ তৌদুনা য়াম্না মরু ওইবা আর্ত ফোর্ম অসিগী লৌশিং জ্ঞান হেনগৎনবা পীরিবা কন্ত্রিব্যুসন অসি খঙই।
মহাক্লা মখা তানা হায়, ফিল্মনা হিস্তরি, সোসিএল রিলেতিব, হ্যুমেন রিজিলিএন্স, ইন্দিজিনস ত্রেদিসন এন্দ ভেল্যুশিং প্রিজার্ব তৌবা য়াওনা পাক-চাউবা থিম রিকগনাইজ অমদি রিফ্লেক্ত তৌই। হায়রিবা থবকশিং অসিনা স্তেত অসিদা লৈরিবা ক্রিএতিভিতি, সেন্সিতিভিতি অমদি স্তোরিতেলিং তেলেন্তকী দেপ্্ফ অদুসু দেমোন্সত্রেত তৌই। লোয়ননা মণিপুর স্তেত ফিল্ম এৱার্দস হায়বসিনা আর্তিস্তিক এক্সলেন্স রিকগনাইজ তৌবা, হৌগৎলক্লিবা ফিল্মমেকরশিংদা থৌনা হাপ্পা, স্তেত অসিগী ফিল্ম কলচর মপাঙ্গল হেনগৎহনবগা লোয়ননা রিজনেল বাউন্দরিজগী ৱাংমদা মণিপুরী সিনেমাবু প্রমোত তৌই।
মসিগুম্বা প্লেতফোর্ম অসিনা এচিবমেন্তশিংবু ওনর তৌবদা নত্তনা তুংগী জেনেরেসন্দা ফিল্ম পুথোক্নিংবগী থৌনা হেন্না হাপকনি। লোয়ননা অনৌবা ফিল্মমেকরশিংনা অনৌবা ৱারী, অনৌবা পর্সপেক্তিব অমদি ইনোভেতিব ওইবা সিনেমাতিক তেক্নিকশিং লেপ্তনা এক্সপ্লোর তৌনবা পুক্নীংসু থৌগৎলি। মসিদা লোকেল স্তোরি, লোল, ত্রেদিসন অমদি ভেল্যু প্রিজার্ব তৌবা য়াম্না মরু ওই। ঙসি এৱার্দ ফংলিবা খুদীংমকপু মহাক্কী থম্মোয়দগী থাগৎচরি। নখোয়গী এচিবমেন্ত অসি ফিল্ম ফ্রেতরনিতি খক্তগী চাউথোকচবা নত্তে। অপূনবা স্তেত অসিগী চাউথোকচনিংঙাইনি। নখোয়গী থবকশিং অসিনা লেপ্তনা ইন্সপয়র, এদুকেত অমদি মীয়াম্বু পূনশিনবা ওইরসনু হায়নসু গবর্নর অজয় কুমার ভল্লানা মখা তানা ফোঙদোকখি।
থৌরম অদুবু প্রিসাইদ তৌখিবা মণিপুরগী চীফ মিনিস্তর যুন্নাম খেমচান্দনা হায়, সিনেমা হায়বা অসিনা মীওইববু মোতিভেসন পী। মসিগী ইচম চম্বা খুদম অমা ওইনা ইং ১৯৭৮-৭৯ অদুৱাইদা 'এন্তর দ দ্রেগোন' হায়বা ফিল্ম অসি লাকপা মতমদা ব্রুসলীগী মতৌ অদু পাম্বদগী মহাক মশামক লক্ষনৌ তান্না কোয়চৎ চৎলগা তাইক্কান্দো তম্লুই। ফিল্ম খুদীংমত্তা অফ-ফত্তবা য়াওরগসু য়েংলিবা ঐখোয়না ফত্তবা অদু লৌদনা অফবা অদুখত্তমক লৌশিল্লগা লোইরে। মণিপুরী ফিল্ম ইন্দস্ত্রি অসি ইক্যুপমেন্ত ৱাৎপা অমদি তোঙান-তোঙানবা ফেসিলিতি কয়া ৱাৎপদগী হেন্না চাউথোকহনবা ঙমদে হায়না হায়রিবা অসি থোইদোক্না লাল্লোই হায়না খল্লি। মসি খরা হেন্না খুমাঙ চাওশিন্নবা হোৎনবদা মহাক্কী মায়কৈদগী অঙম্বা মতেঙ পাংজগে হায়না ফোঙদোকখি। থৌরম অদুদা আর্ত এন্দ কলচরগী মিনিস্তর কেঐচ লোকেনসু শরুক য়াবগা লোয়ননা মহাক্না ওফিসিএল এৱার্দ কেতলোগ রিলিজ তৌখি।
ঙসিগী থৌরম অদুদা ইং ২০২৪ গী এম এস এফ দি এস লাইফতাইম এচিবমেন্ত এৱাদ ঙাংবম স্বর্নজিৎতা লান্থোক্তুনা ইকায়খুম্নবা উৎখি। লোয়ননা ফিচর ফিল্ম কেতেগোরিদা 'মরৈবাক নীংবা হেরাচন্দ্র' অমসুং নন-ফিচর ফিল্ম কেতেগোরিদনা 'অন্দ্রো দ্রিম্স' না বেস্ত ফিল্মগী মনা ফংখি।
নন-ফিচর ফিল্ম কেতেগোরিদা 'দ অনতায়রিং রুমেন' ফিল্মগী অমরজিৎ মাইবমদা স্পিসিএল জুরি মেন্সন, 'কাথা ফম কাবা' ফিল্মগী খাবা মাইমোমদা বেস্ত ফিল্ম ওব এ দেব্যু দিরেত্তর, 'অশে দ্রা দ্রিম্স' ফিল্মগী সংখজিৎ বিশ্বাসতা বেস্ত এদিতর অমসুং ফিল্ম অসিমক্কী সন্নি সারুংবমদা বেস্ত সিনেমাতোগ্রাফর অমদি ফিল্ম অসিগী দিরেক্তর মীনা লোংজমদা বেস্ত নন-ফিচর ফিল্ম দিরেক্তরগী এৱার্দ লান্থোকখি।
ফিচর ফিল্ম কেতেগোরিদা 'মরৈবাক নীংবা হেরাচন্দ্র' ফিল্মগী কোস্ত্যুম দিজাইনর ময়াংলম্বম রতনদা স্পিসিএল জুরি মেন্সন, 'জোসেফ্স সন' ফিল্মগী গুরু রুবেন মাশাংভা (পদ্মশ্রী) দা বেস্ত লিরিসিস্ত, বেস্ত স্কৃনপ্লে রাইতরনা 'জোসেফ্স সন' হায়রিবা ফিল্মগী অইবা সুধির নাওরোইবম অমসুং ফিল্ম অসিমক্কী হাওবম পবনকুমারনা বেস্ত স্কৃনপ্লে (এদাপ্তেদ) কী মনা ফংখি।
বেস্ত মেল প্লেবেক সিঙ্গরনা 'তম্ফামনি' ফিল্মগী অর্বিন সোইবম, বেস্ত ফিমেল প্লেবেক সিঙ্গরনা 'থম্বাল' ফিল্মগী ঙন্থোইবী নিংথৌজম, 'মরৈবাক নীংবা হেরাচন্দ্র' ফিল্মগী হুইদ্রোম অনিলদা বেস্ত ম্যুজিক দিরেক্তর অমসুং বেকগ্রাউন্দ স্কোর, ফিল্ম অসিগী অবুজম রাগিনী অমসুং ৱাংজম চন্দ্রিমা চনুদা বেস্ত মেকঅপ, 'থম্বাল' ফিল্মগী এস ঐচ ইনাওচা শর্ম্মাদা বেস্ত আর্ত দিজাইনর, 'জোসেফ্স সন' ফিল্মগী সব্যাসচি পালদা বেস্ত ওদিওগ্রাফর লোকেসন সাউন্দ রেকোর্দিস্ত, 'মরৈবাক নীংবা হেরাচন্দ্র' ফিল্মগী লোইতোংবম সুনিল অমসুং বোনি নিংথৌজাদা বেস্ত সাউন্দ দিজাইনর, 'জোসেফ্স সন' ফিল্মগী সংখজিৎ বিস্বাস অমসুং 'মরৈবাক নীংবা হেরাচন্দ্র' ফিল্মগী য়োইময়াই মোংশাবদা বেস্ত এদিতর, 'জোসেফ্স সন' ফিল্ম গী জয়দিপ বোসতা বেস্ত সিনেমাতোগ্রাফর, 'থম্বাল' ফিল্মগী লমঙানবী লাইশ্রমদা বেস্ত চাইল্ড আর্তিস্ত, 'থম্বাল' ফিল্মগী রিনা নিংথৌজমদা বেস্ত সপোর্তিং এক্তর (ফিমেল), 'মরৈবাক নীংবা হেরাচন্দ্র' ফিল্মগী য়েংখোম ইঙোচাদা বেস্ত সপোর্তিং এক্তর (মেল), 'থম্বাল' ফিল্মগী পিঙ্কি সাইখোমদা বেস্ত এক্তর (ফিমেল), 'মরৈবাক নীংবা হেরাচন্দ্র' ফিল্মগী নাওরেম পাইলোতনা বেস্ত এক্তর মেল অমসুং 'জোসেফ্স সন' হায়রিবা ফিল্ম অসিগী দিরেক্তর হাওবম পবনকুমারদা বেস্ত দিরেক্তরগী মনা লান্থোক্তুনা ইকায় খুম্নবা উৎখি ।
সোর্স - পোক্নফম
0 কমেন্ট:
কমেন্ট তৌবিয়ু