স্কুলদা মণিপুরী তম্বী তাকপীদ্রে হায়বসি সরকারগী মকোক মরু ওইরিবশিংনা খঙদে। মখোয়না খঙলিবদুদি থা-থাগী মান্থলি ষ্টেটমেন্ট রিপোর্ট অদু য়েংলগা মণিপুরী তম্বী তাকপীরি হায়বসিনি। স্কুল অয়াম্বদা মণিপুরী তম্বীদ্রে হায়বসি ডাইরেক্টরেট অব ককবরক এন্ড আডার মাইনোরিটিস ল্যাঙ্গুয়েজ মখাদা মণিপুরী বিভাগসু খঙদবা নত্তে, অদুবু চে-চাং মান্থলি রিপোর্ট অদু য়েংলগা তম্বী তাকপীদে করম্না হায়গনি। মরমদি চে-চাংদা মহৈরোই লৈ ক্লাস চত্থরি হায়দুনবু টেক্সবুক (তম্না-লাইরিক) সাপ্লাই তৌরিবনি। টেক্সবুক ইবগী থবকসু লেপ্পা নাইদে সরকারগী য়াথংসু ইন্দবা য়াদে হায়রি। ইংকুমজা ২০১৮ সরকারনা শেম্বা লোলগী এডভাইজরি কমিটি মীফমসু ফমদবা ঙসি চহী মরি মখায় শুখ্রে। তশেংনা হায়রবদা মণিপুরী স্কুলগী দশা অমসুং মণিপুরী ওজা লৈতবগী অৱাবসি পরিষদনচিংবা অতৈ মণিপুরী লুপশিং খঙদবা নত্তে। অদুবু হীরম অসিদা করি তৌবা য়াই হায়বসি খন্নবগী য়াম্না মথৌ তারবনি হায়রি। মসি সরকারগী থবকনি হায়না মখাতানা ইন্থোক্না থম্বা য়াদ্রে। পরিষদ অমসুং অতৈ লুপশিং পুন্না ফম্মিন্নদুনা ওজাগী মতাং অসি খন্নফম থোক্নবনি।

অসোমদা টেট পরীক্ষাদা পাশা তৌদনসু ওজাগী পোষ্টিং ফংগদ্রা ফংলোইদ্রা হায়বসিদা মতম চুপ্পদা নুংনাংদুনতা লৈরিবা মতম অসিদা চৎখিবা টিচার্স ডে নুমিৎতা ওজা রিক্রুট তৌবগী দাবীদা অফিস লেনগী শিক্ষা ভবন মমাংদা লুপ কয়ানা চত্থরকপা খোঙজংদা পুলিশনা শক্তি শীজিন্নদুনা মহৈরোয়শিংবু অৱাবা নংহনখ্রে। পনবা য়াবদি ত্রিপুরাদা ইমালোল মণিপুরীনা লাইরিক তমগে হায়বা খোল্লাও অসি মণিপুরী সাহিত্য পরিষদ য়াওনা লুপ খুদিংগী কমন ওইনা দাবী অমা ওইদুনা লাকখি।

ইনফাস্ট্রাকচার য়াওদনা ইং ১৯৯৮ দগী মণিপুরী তম্বী তাকপীবা হৌখি। অদুবু ঙসি চহী ২৪ শুখ্রবা ফাওবদা মণিপুরী স্কুলদা মণিপুরী লোলগী ওজা অমা ফাওবা হাপত্রি। অঙকপা থৌওং অমনি। বাংলা মিডিয়াম স্কুলদগী তম্লকপা মণিপুরী নোইং মীওইনা মণিপুরী স্কুলদা মণিপুরী তম্বী তাকপীদুনা লাকখি। মরক মরক্তা ওরিয়েন্টেশন প্রোগ্রামসু চত্থখি। মণিপুরী লোলগী ওজা রিক্রুট তৌবগী দাবীদা ত্রিপুরা মণিপুরী ষ্টুডেন্ট ইয়ুথ কোঅর্ডিনেশন কমিটিনা ঈহৌ অমা শাগৎলম্লগা তুমিন্না লৈখ্রে। ঙক্লিবদি মণিপুরী ওজা রিক্রুট তৌবগী দাবী ঙসি ফাওবদা ত্রিপুরা সরকারগী মনাকোংদা য়ৌহনবা ঙমদ্রি, অদুনা সরকারসু খঙদে। সরকারগী মীৎয়েং চঙশিনবগী থৌদাং ঙসি ফাওবদা লুপ অমত্তনা লৌবা ঙমদনা লৈরিবসিনি।

সোর্স: মরূপ