হোজাই অমদি কাছারদা নুপী লাল নীংশি থৌরম পাঙথোকখ্রে
ইম্ফাল, দিসেম্বর ১২ : মনিপুরী উইমেন এসোসিয়েসন আসাম, হোজাই অমদি উমা হেন্দলুম কমিটি হোজাইনা শীন্দুনা মণিপুর সাহিত্য পরিষদ ভবন হোজাইদা ৮৩শুবা নুপী লাল নীংশিং কুমওন পাঙথোকখ্রে। থৌরম অদুদা প্লান্নিং দিবেলপমেন্ত অথোরিটি মণিপুরগী চেয়ারমেন লৌরেম্বম রামেশ্বর, পোরৈ লৈমরোল মৈরা পায়বী অপুনবা মণিপুরগী প্রেসিদেন্ত লোংজম মেমচৌবী, ওল মণিপুর উইমেন্ ভলুন্তরি এসোসিয়েসন মণিপুরগী প্রেসিদেন্ত ফুমখাইবম কুঞ্জরানি চনু, অমুকোগী ভাইস প্রেসিদেন্ত কে হেলেন, মণিপুরী শোর্ত স্টোরি সোসাইতি ইন্দিয়াগী প্রেসিদেন্ত লাইশোম গোলাপ, মণিপুর ষ্টুদেন্টস ফেদারেসনগী প্রেসিদেন্ত মাইবম জুলেস, ইমা হোজাই কমিটিগী দেবসিদ দত্ত অমদি সোসিয়েল এক্টিভিস্ট হোজাই জিবোননা শরুক য়াখি।
থৌরম অদুগা মরী লৈননা ফিরাল চিংখৎতুনা নুপীলালদা শরুক য়াখিবী ইমাশিংগী মফমদা হৈকৎ লৈকৎ তমখি। তুংদা মণিপুর সাহিত্য পরিষদ ভবন হোজাইগী নৌনা শাগদৌরিবা শঙলেন অমদি লাইব্রেরিগী ওফিস শান্নবগীদমক এম এল এ লৌরেম্বম রামেশ্বর অমদি পোরৈ লৈমারোল মৈরা পায়বী অপুনবা মণিপুরগী প্রেসিদেন্ত লোংজম মেমচৌবীনা মায়খুম হাংদোকখি।
থৌরম অদুদা এম এল এ. এল রামেশ্বরনা হায়খি, আসামদা খুন্দারিবা মৈতৈশিংনা মণিপুরী ইমাশিংনা বৃটিশকী মায়োক্তা থৌনা ফনা থেংনখিবা থৌদোকশিংবু নীংশিংদুনা চহী খুদীংগী লেপ্তনা নুপী লালগী থৌরম পাঙথোক্তুনা লাক্লিবা অসিমক থাগৎলি। মসিনা মালেমদা লৈরিবা মৈতৈ পুম্নমক অমত্তনি। ঐখোয়গী হৌরকফম অমত্তনি হায়বা অদুসু তাক্লিবনি। আসামদা খুন্দারিবা মৈতৈশিংনা শান্ন-খোৎনবদা হেন্না থৱায় য়াওশিন্নবসু হোৎনবীয়ু। মৈতৈ হায়রিবা ফুরুপ অসি শান্ন-খোৎনবদা হেন্না চুশিন্নবা অদুগুম্বা কাঙলুপ অমনি। মণিপুরী কয়া অমা মালেমগী থাক্তা শান্নবা মশান্না কয়াদা মিংচৎ পুরকখ্রবনি। আসামদা লৈরিবা মৈতৈশিংনসু হায়রিবা মিংচৎ অসি করিগী পুরকপা ঙম্লোইদৌরিবনো।
অমরোমদা, ওল আসাম মণিপুরী মৈরা পায়বী লূপ অমদি ওল মণিপুরী মুসলিম মৈরা পায়বী সংস্থান অনীনা শীন্দুনা পৈলাপোল কম্যুনিটি হোল কাছারদা ৮৩ শুবা নুপী লাল থৌরম পাঙথোকখ্রে। থৌরম অদুদা ওল আসাম মণিপুরী মৈরা পায়বী লুপকী প্রেসিদেন্ট টি ঐচ সনাথোই দেবী, ওল মণিপুরী মুসলিম মৈরা পায়বী সংস্থানগী প্রেসিদেন্ট সঙ্গিতা বেগম, ওল আসাম মণিপুরী মৈরা পায়বী লূপকী প্রেসিদেন্ট ওইরম্বা বিনি মিশ্রা, আর কে গোপালসনা, য়ুসিএমগী জেনারেল সেক্রেটারি এন দেব, যুসিএমগী খোমদ্রাম রতন, য়ুসিএমগী সেক্রেটারি ওইরম্বা ৱাই সিকন্দরনচিংবশিংনা শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু