সনাজাওবনা লোক্তাক অমসুং কৈবুল লমজাও কন্নবা পার্লিয়ামেন্ততা পুখৎখ্রে
ইম্ফাল, দিসেম্বর ২০ : মণিপুরগী লোক্তাক পাৎ অমসুং কৈবুল লমজাও নেসনেল পার্ক অনীবু ইন্দিয়া গভর্ণমেন্তনা অখন্নবা মীৎয়েং চঙলগা য়োকখৎনবা রাজ্য সভাগী এম পি মহারাজ সানজাওবা লৈশেম্বনা পার্লিয়ামেন্ত হাউসতা পুখৎখ্রে। মহারাজ সনাজাওবা লৈশেম্বনা হৌজিক চত্থরিবা পার্লিয়ামেন্তকী নিংথম মীফম অসিগী ঙরাং নিঙথৌকাবা নুমিৎতা ফমখিবা মীফমদা লোক্তাক পাৎ অমসুং কৈবুল লমজাও নেসনেল পার্ককী মতাঙদা পুখৎলদুনা হায়খি।
লোক্তাক হাইদ্রো প্রোজেক্ত অমসুং ইথায় দাম অনীগী কান্নবা লৈরবসু মসিগী মাঙজবা কয়া অমসু লৈ হায়বসি ককপা য়ারোইদবা ৱাফম্নি। লোক্তাক হাইদ্রো প্রোজেক্তকী কান্নবা ফংলিবা স্তেতশিং অসি মণিপুর, নাগালেন্দ, আসাম অমসুং মিজোরামনি। এম দব্লিউ (মেগাৱাট) ১০৫ পৱার জেনরেসনগী মনুংদা মণিপুরগী ওইনা শিজিন্নরিবদি মেগাৱাট ৩৫ খক্তনি। অদুগা লেমহৌবা মেগাৱাত ৭০ না মণিপুরগা য়ুমথংনরিবা স্তেতশিং অসিদা য়োন্থোক্লি।
লোক্তাক হাইদ্রো প্রোজেক্ট অমসুং ইথায় দামগী মাঙজবশিং খরা পল্লবদা, লৌউ-শিংউ চত্থনরম্বা লৈহাও চেনবা লম হেক্টর ৮৩,৪৫০ রোম অসি ঈশিং থুমজিন্দুনা মাঙদুনা লৈরি। পাৎ অসিগী অকোইবদা তারিবা মীয়ামগী সোসিও ইকনোমিক অমসুং কালচারেল লাইফতা শোকহল্লি। পাৎ অসিগী মহৌশাগী ফীবম অদুগী ইখঙ খঙহৌদনা কা হেন্না অহোংবা লাকহনখ্রে। নোংম-নোংমগী পাৎ অসি থেনগৎলক্লি। মসিনা কৈবুল লমজাও নেসনেল পার্ককী ইকোসিস্তেম অমসুং অকোইবগী ফীবমদা য়াম্না চাউনা শোকহল্লি।
এম পি অসিনা মখা তাখিবদা, কৈবুল লমজাও নেসনেল পার্ক অসি মালেমগী মফম অমক্তদা লৈবা ফ্লোটিং পার্ক অমনি। মসিগী মথক্তা খ্বায়দগী হেন্না মরু ওইরিবা পার্ক অসি মালেমগী মফম অমত্তদা ফংদবা মণিপুরগী স্তেত এনিমেলসু ওইরিবা ‘সঙাই’ হায়রিবা শা মখল অসিগী অমত্তা ঙাইরবা য়ূমনি। পার্ক অসিগী ইকো-সিস্তেম অমসুং অকোইবগী ফীবমদা শোকহল্লকপা অসিনা মমল নাইদ্রবা শা অসি মুৎশিল্লক্লি। হৌজিক সঙাই মশীং ২৫০দগী হন্থখিদুনা মাঙখিবা য়াবগী অকিবা অদু লৈরি।
মরম অদুনা লোক্তাক পাৎ অমসুং কৈবুল লমজাও নেসনেল পার্ক অসি য়োকখক্তুনা থম্নবা লৌখৎপা য়াবা খোঙথাংশিং লৌখৎনবা মহারাজ সনাজাওবা লৈশেম্বনা হাউসকী খুত্থাংদা ইন্দিয়া গভর্ণমেন্ততা তকশিনখি। নিঙশিংবা য়াবদি, চত্থরিবা পার্লিয়ামেন্তকী নিংথম মীফম অসিদা এম পি মহরাজা সনাজাওবা লৈশেম্বনা ইন্দো-মায়ানমার ঙমখৈগী লৈরিবা ইসু অসি দিপ্লোমেটিক ওইনা ৱারোইশিন অমা পুরক্না হাউসতা পুখৎতুনা ইন্দিয়া গভর্ণমেন্ততা তকশিনখিবসু লৈখ্রবনি।
সোর্স: পোক্নফম
0 কমেন্ট:
কমেন্ট তৌবিয়ু