আপডেট:
image

সঙাই ফেষ্টিভেলদা ত্রিপুরাগী মণিপুরী ট্রুপবু বার্তোন তৌবিরমদ্রে হায়না নুঙাইতবা পেন্দবা ফোঙদোক্নরক্লে

আগরতলা, নভেম্বর ২৫: মণিপুর লৈঙাক্কী ট্যুরিজম দিপার্টমেন্টনা শীল্লাংদুনা নুমিৎ তরানি চুপ্না চত্থরিবা পাক চাওরবা হন্দক চহী সঙাই ফেষ্টিভেলদা থংননা লৈবা রাজ্য ত্রিপুরাগী মণিপুরীবু বার্তোন তৌবিরমদ্রে, মীরাইবিরম্লে হায়না নুঙাইতবা পেন্দবা ফোঙদোক্নরক্লে। ময়াম্না মশক খঙবা ত্রিপুরাগী কালচার লুপ অমত্তন বার্তোন ফংবা য়াওদে হায়রি।

নভেম্বর ৩০ ফাওবা পাঙথোক্কদৌরিবা ফেষ্টিভেল অসি তোঙান তোঙানবা মফম কয়া ইম্ফাল ইষ্ট ডিষ্ট্রিক্ট মনুং চনবা হপ্তা কাংজৈবুং, ইম্ফাল এম. এফ. ডি. সি সিটি কনভেন্সন, হৈঙাংগী ইবুধৌ মার্জিং অমদি খুমন লম্পাক্তা চত্থরি। চৎখিবা নভেম্বর ২১, মোইরাং খুনৌদা লৈবা সঙাই ইথনিক পার্কতা মালেমগী লৈবাক কয়াদগী লাকপা মীওই কয়া য়াওনা হন্দক চহীগী ১১রক শুবা মণিপুর সঙাই ফেষ্টিভেলসি কেন্দ্রগী ট্যুরিজম, কালচার এন্ড নর্থ ইস্ট রিজন ডেভেলপমেন্ট মন্ত্রী গঙ্গাপুরম কিষন রেড্ডিনা থৌরম অমদা মৈরা চুখত্তুনা মণিপুর অসি অৱাং নোংপোক রাজ্যশিংগী মনুংদা হেরিটেজতা ইনাক খুল্লবা ষ্টেটনি, পোলো মশান্না মণিপুরদগী হৌরকপনি ভারতকীনি হায়না ফোঙদোকপীরমখি।

থৌরম অদু রাজ্যসভাগী এম. পি লৈশেম্বা সনাজাওবানা থৌরম মপু ওইরগা মণিপুর মুখ্যমন্ত্রী এন বীরেননা চীফ হোষ্ট ওইনা শরুক য়াখি। মুখ্যমন্ত্রীনা ঐখোয় অমত্তনি হায়বা ৱাখল্লোনগী থিমদা হন্দক্কী ফেষ্টিভেল অসি পাঙথোকপনি হায়খি। থৌরম অদুদা মিনিষ্টার, এম.এল.এ শিং, মকোক থংবা অফিসিয়েলশিং নচিংবা কয়াসু শরুক য়াখি।

করোনা লাইচৎনা মরম অইদুনা চহী অনী লেপ্পুরবা মতুং মণিপুর নেশনেল পার্ক কৈবুল লমজাউ নত্তনা মালেমগী অতৈ মফম কদায়দসু উবা ফংদ্রবা সঙাইবু মশক খঙহনবগা লোয়ননা সঙাইবু কনমিন্নসি হায়বা পাউজেল পীদুনা হন্দক চহী পাক চাওনা পাঙথোক্নরক্লিবা ১১ শুবা সঙাই ফেষ্টিভেল অসি য়াম্না শীংথানিঙাইনি অমদি মপুং ওইনা পাঙথোকপা ঙম্নননবা ভারতকী ৱাংমদা থাইল্যান্ড, ইজিপ্ট, ঘানা নচিংবা লৈবাক কয়াদগী বার্তোন ফংদুনা শরুক য়ারি। বাংলাদেশ অমসুং মণিপুর মপান্দা আসাম নচিংবা অৱাং নোংপোক্কী অতৈ অতৈ তোঙান তোঙানবা রাজ্য কয়াদগী কালচারেল টিম, এন.জি.ও, আর্টিষ্ট অমসুং অখন্নবা মীওই কয়া বার্তোন তৌদুনা ফেষ্টিভেলদা শরুক য়াহল্লবসু ত্রিপুরাবু মীরাইবিরম্লে।

ঐখোয় অমত্তনি হায়না ইতৎ তত্তনা ত্রিপুরাদা লীক্লম থীবনি হায়বা ঈ-গী মরীদা লাক্তুনা মশক খঙলিবা ইচিল ইনাও মণিপুরীশিংবু করম্না মীরাইবিরম্লিবা। মণিপুর লৈঙাক্না মপান মণিপুরদা খ্বাইদগী মণিপুরী মশীং য়াম্বদা অনীশুবা রাজ্য অমা ওইরিবা ত্রিপুরাগী মণিপুরীবু খঙদ্রবা জাৎলা? অদুবু পেন্দবা নুংঙাইতবা কয়া লৈদুনসু মপান মণিপুরদা খুন্দানা লৈবা মণিপুরীশিংগী হৌরকফম মণিপুরনা পাঙথোক্লিবা সঙাই ফেষ্টিভেল অসি মায় পাক্না পাঙথোকপা ওইসনু হায়না ফোঙদোক্নবসু য়াওরি।

সোর্স: মরূপ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু