শিলোংগী মণিপুর রাজবাড়ীগী মথংদা উত্তর প্রদেশ মথুরা ডিষ্ট্রিক্টতা লৈবা রাজবাড়ী-বড়োকুঞ্জ! — চোংথাম তোম্বা
ইনিংথৌ কুলচন্দ্রনা ইংকুমজা ১৯৩৪ জানুয়ারি ২৬তা নোঙ্গাখ্রবদা নিংথেমচা কাঙবুনা মফম অদু ঙাকশেন্দুনা লাকখি। লাইবকথিবদি, মণিপুরগী ওইনা লৈরম্বা মফম অসিবু মসিদা লেংশিল্লিবা শ্রীরাধা গোবিন্দবু শেন্নরিবা মীওইশিং অদুনা ইং ২০০৪ গী সেপ্টেম্বর ২৪ দা অতোপ্পা মীওইশিংদা শিন্নথোকখ্রে।
শিলোংদা মতম অমদা মণিপুরগী নিংথৌনা লৈরম্বা রাজবাড়ী অসি মতম কুইনা মাঙলুরবা মতুংদা হন্দক্তা মণিপুর লৈঙাক্না লৌশিন্দুনা থম্বা ঙমখিবা অসি পাল্লিবা লৈঙাক অসিগী অচৌবা এচিভমেন্ট অমনি। হৌজিক্তি মণিপুর রাজবাড়ী অসি মণিপুর লৈঙাক্কী ওইরবনিনা শেমগৎ-শাগৎতুনা মণিপুর মীয়ামদা শোয়দনা কান্নবা পীবা ঙম্লগনি থাজৈ। অমরোমদা মণিপুরগী পুৱারী তাকপদা মসিগী মফম অসিনা খুদম ওইনা লৈদুনা য়াম্না কোম্না খঙহনবা ঙম্লগনি। মসিগী দমক্তা মণিপুর লৈঙাকপু থম্মোয় শেংনা থাগৎফম থোকই। লোয়ননা মণিপুরগী পুৱারীগা শাগোন্নদুনা লাক্লবা, মণিপুর মীয়ামগা থাদোক্নবা য়াররোইদবা মফম অমসু হৌজিক অতোপ্পা লমগী মীওইশিংগী খুৎতা লৈখ্রবা মফম অমা হায়রগদি উত্তর প্রদেশকী মথুরা ডিষ্ট্রিক্টতা ‘বড়ি কুঞ্জ’ হায়না খঙনবা মৈতৈশিংনা ‘বড়ো কুঞ্জ’ হায়রিবা মফম অসিনি।
‘বড়ো কুঞ্জ’ হায়রিবা মফম অসি মীয়াম্না ‘রাধা কুন্ড’ অমসুং ‘শ্যাম কুন্ড’ হায়না খঙনরবা তীর্থস্থান অদুগা থংননা লৈবনি। মসি ইং কুমজা ১৮৩০ দা মহারাজা গম্ভীর সিংহনা পাল্লিঙৈদা বৃটিশ লৈঙাক্তগী (ইস্ট ইন্ডিয়া কোম্পানী) লুপা ১৩,০০০ পীদুনা শাখিবনি। লোয়ননা মফমদু মণিপুরগী বৈষ্ণবশিংগী য়াম্না শেংলবা লাইফমলেন অমা ওইদুনা লাকখি। অদুবু মফম অসি ইং কুমজা ১৯৯৫দগী খজিক্তং অহোংবা লাকখি। মদুদি ইংকুমজা ১৮৯১ দা বৃটিশ অমসুং মণিপুর অনীনা লান শোক্নারবা মতুংদা লানঙম ফিরাল থেৎখ্রবা বৃটিশনা মায়থিরবা মণিপুরগী মমালৈবাক নুংশিবা মীওই কয়াবু ফারগা মীরৈবাক্তা লোই থাখি। মখোয়শিংদুগী মরক্তা মতম অদুদা পাল্লম্বা মণিপুরগী ইনিংথৌ মহারাজ কুলচন্দ্রসু য়াওখি।
ইনিংথৌ অসি মরন মথুম পুম্নমক মৎলগা পুন্সিগী ওইনা আন্দামান অমসুং নিকোবরগী ঈথৎ অমদা থমখি। অদুবু পুন্সিগী লোই থাবগী মিয়াৎ অদু চহী ৩ দা ককথবিদুনা ইংকুমজা ১৮৯৪ দা আন্দামান্দগী থাদোরকখি। আন্দামান্দগী থাদোরক্নবসু মহাকপু মণিপুরদা হল্লকপদি অয়াবা পীখিদে হায়বদি মণিপুর চঙবদা অথিংবা থমখি। হাজারীবাগতা হাউস এরেষ্টকী মওংদা মহাকপু থমখি। অসুম্না হাজারীবাগতা চহী ২০ মুক লৈরক্নবদা মশাগী চহীসু ৬০ শুরকপা অদুৱাইদা মহাক রাধা কুন্ডগুম্বা মফমদা লৈনিংবগী অপাম্বা লৈরম্মী। মরম অদুনা মহাক্না বৃটিশ সরকারদা মহাকপু বৃন্দাবনদা হোংবা য়াহনবীয়ু হায়জখি।
মহাক্কী হায়জবা অদু মহাক্না করিগুম্বা মণিপুরগী লৈঙাকশাসনদা খুৎ থিংজিল্লোই অমসুং বৃটিশ লৈঙাক্না পীরিবা থাগী শেনফম অদু হেনগৎতবা য়ারগদি হোংবা য়াগনি হায়না পাউখুম ফংলম্মী। পাউখুম অদু হেক ফংবগা মহাক্না য়ারে হায়দুনা পাউ থাখি। অসুম্না, মহাক ইংকুমজা ১৯১৫ গী জুন থাগী তারিখ ১ দা হাজারীবাগ থাদোকখি অমসুং জুন ৩দা রাধা কুন্ডদা থুংখি। হায়রিবা নুমিৎ অদুদগী মহাক মহাক্কী মপু ইবুংঙো গম্ভীর সিংহনা শাবিরম্বা বড়ো কুঞ্জদা লৈবা হৌরকখি।
ইনিংথৌ কুলচন্দ্রনা ইংকুমজা ১৯৩৪ জানুয়ারি ২৬তা নোঙ্গাখ্রবদা নিংথেমচা কাঙবুনা মফম অদু ঙাকশেন্দুনা লাকখি। লাইবকথিবদি, মণিপুরগী ওইনা লৈরম্বা মফম অসিবু মসিদা লেংশিল্লিবা শ্রীরাধা গোবিন্দবু শেন্নরিবা মীওইশিং অদুনা ইং ২০০৪ গী সেপ্টেম্বর ২৪ দা অতোপ্পা মীওইশিংদা শিন্নথোকখ্রে। শিন্নবা অদুদা খুৎয়েক পীরিবশিং মখোয় অদুদি (১) শ্রী আরকে সিংহ জিৎ সিংহ, ২) শ্রী আরকে গোপীনাথ সিংহ, ৩) শ্রী আরকে ব্রজমোহন সিংহ, ৪) শ্রী আরকে সুরজিৎ সিংহ অমসুং ৫) শ্রী আরকে সনাজাওবা। মখোয়শিং অসিনা মন্দির অসিগী সেবায়েতনি। মখোয়না ফার্ষ্ট পার্টিনি।
মথক্তা পঞ্জখ্রিবা মীওইশিং অসিনা মন্দির অসি মীঙোন্দা শিন্নথোকখিবগী মরমদি অসুম্না পীবিরম্মী-চহী ২০০ শুরবা মন্দির অসি শেমজিন-শাজিনবদা শেল য়াম্না চঙলকপা, পোৎ-চৈগী মমল তাংখৎলকপনা মরম ওইদুনা লাইগী লূক চাং নাইনা নুংতিগী হৌবা ঙম্লক্তবা অসিনাচিংবা মরু ওইনা পল্লি। মন্দিরসিবু নৌনা পান্নবগী লৌরিবা মীওইশিং অদুদি ১) মিলন ভাটিয়া, ২) সঞ্জয় গোভিল, ৩) হরিবাবু শর্ম্মা, ৪) মহেন্দ্র গোস্বামী অসিনি। মখোয়না সেকেন্ড পার্টিনি।
য়ান্নচে অসি সহি তৌনখ্রবা মতুংদা সেকেন্ড পার্টিনা লাইশঙ অসিগী মপু ওইনা লৈগনি অমসুং লাইশঙ অসিগী সেবা তৌগনি লোয়ননা মসিদগী লাকপা মহৈ নত্রগা কান্নবা পুম্নমক সেকেন্ড পার্টিনা ফংগনি। মসিদা ফার্ষ্ট পার্টিনা করিগুম্বা মখল অমতদা য়েৎপা নত্রগা খুৎ থিংজিনবগী হক লৈত্রে। করিগুম্বা থিংজিল্লক্লবদি আইনগী মতেংনা মখোয়দা দন্ডি পীবা য়াবগী ৱারোলসু য়াওরি। মসিদা খ্বাইদগী লাইবক থিবদি মফম অসিদা মণিপুরগী নীংতম লান্দা লৈবাক অসিগী নিংথৌ অমা ওইনা য়াম্না মরু ওইবা থৌদাং লৌবিরম্বা ইনিংথৌ কুলচন্দ্রনা অরোইবা য়াহিপ তানখিবা মফমসি অতোপ্পনা লৌশিনখিবা হায়বসি লৈবাক অসিগী য়াম্না মায় খুবনি। মসিগী মথক্তা মফম অসি চহী ২০০ গী মমাংদগী মহারাজ গম্ভীরসিংহনা লৈদুনা থম্বীরম্বনি। মরম অদুনা মফম অসি মণিপুর মীয়ামগী ওইনা থম্বা হায়বসি লৈঙাক অসিগী য়াম্না মরু ওইবা থৌদাংনি হায়জনিংই। শিল্লোংগী রাজবাড়ী লৌশিনখিবগুম্না মসিসু অচংবা খরচ পুম্বা পুথোকপীদুনা অমুক হন্না লৌশিনবীয়ু অমসুং মণিপুর মীয়ামগী ঈজৎ কনবীয়ু হায়না লৈঙাক্কী পুক্নিং চিংশিনজরি।
সোর্স – মরূপ
0 কমেন্ট:
কমেন্ট তৌবিয়ু