শক্নাইরবা লাইয়েকপা লৈখিদ্রবা রাজকুমার চন্দ্রজিৎ সনা সিংহ (আরকেসিএস) গী ৯৮ শুবা মপোক নুমিৎ থৌরম পাঙথোকখ্রে
ইম্ফাল, অক্টোবর ১৪ : মতমগী মতুংইন্না পুথোক্নরক্লিবা ফ্লেক্স প্রিন্টিনচিংবা অনৌবা টেক্নোলোজিনা কৈদৌনুংদা ওইল পেন্টিংগী মহুৎ শিনবা য়ারোই হায়না কৈশামথোং এসেমব্লি কন্সটিটুয়েন্সিগী এমএলএ নিশিকান্ত সিংহ সাপমনা ফোঙদোকখ্রে। শক্নাইরবা লাইয়েকপা লৈখিদ্রবা রাজকুমার চন্দ্রজিৎ সনা সিংহ (আরকেসিএস) গী ৯৮ শুবা মপোক নুমিৎ থৌরমদা চীফ গেষ্ট ওইনা ৱা ঙাঙলদুনা এমএলএ নিশিকান্ত সিংহ সাপমনা মথক্কী ৱাফম অসি ফোঙদোকখিবনি।
আরকেসিএস ম্যুজিয়াম ওফ আর্টস এন্দ ক্রাফ্টসনা শীন্দুনা ঙরাং নুংথিল কৈশামথোংদা পাঙথোকখিবা থৌরম অদুদা মহাক্না হায়, আরকেসিএসকী অয়েকপা লাইশিং অসি মণিপুরগী কালচার, পুৱারিগী শরুক অমনি অমদি শক্তম তাকপনি। মপান লমদগী মশক নাইবা মীওইশিং মণিপুরদা লাকপদা আরকেসিএসকী গেল্লরি অসিদা শোয়দনা চঙগনি অমদি অয়েকপা লাইশিং লৈরগা পুখিবা কয়ানি।
অদুগা আরকেসিএসকী আর্ট গেল্লরি লৈরিবা বিল্ডিং অসি খ্বাইদগী অতাংবা অমনি মরমদি মসিদা মমল নাইদ্রবা অয়েকপা লাই কয়া লৈরি। খুনাই অমগী চাওখৎপগী থাক অসি লৈরিবা আর্টিষ্টশিংনা লেপ্পগা লোয়ননা মতি ময়াইসু হাপ্পী। আরকেসিএস আর্ট গেল্লরি তুং কোইনা লৈহৌবগা লোয়না মণিপুরগী পুৱারি অমদি কালচারগী মশক তাকপা ওইসনু মহাক্না মখা তাখি।
থৌরম অদুদা আরকেসিএস ম্যুজিয়ম ওফ আর্টস এন্দ ক্রাফ্টসকী চিয়ারপার্সন ডা: কে সোবিতা দেবী অমদি মনিপুর য়ুনিভার্সিটি ওফ কালচারগী ভাইস চাঞ্চেল্লর ডাঃ পি গুনিন্দ্রোসু মথংশিৎনা প্রেসিদেন্ট অমদি গেষ্ট ওফ ওনর ওেইনা শরুক য়াখি। থৌরম অদুগী শরুক অমা ওইনা আরকেসিএসকী মীতমদা তিল্লিবা মীয়াম্না হৈকৎ লৈকৎ তমখি। তোংব্রম অমরজিৎনা আরকেসিএসকী পুন্সি ৱারি মীয়ামদা শম্লপ্না লিখি। লোয়ননা ১২ শুবা আরকেসিএস মেমোরিয়েল লিদ্রেন পেন্টিং কম্পিটিসনগী মকোক মথং তারবা মহৈরোয়শিংদা প্রেসিদিয়াম মেম্বারনা মনা য়েন্থোকখি।
শক্নাইরবা লাইয়েকপা আরকেসিএস কুমজা ১৯২৪ গী অক্টোবর ১৩ দা তাইংবদা খোংদারকখি অদুগা কুমজা ২০০৪ গী নভেম্বর ২০দা নোঙ্গাখি। শক্নাইরবা অসিগী পুন্সিদা চাওরাক্না লাই ১০,০০০ রোম য়েক্লমখি। মণিপুরী সাহিত্য পরিষদনা চিত্রকলা রত্ন (লৈখিদ্রবা মতুংদা) হায়না মীংথোনবা মনা পীখি। কুমজা ২০০৪ দা সোলো একজিবিসন্দগা লাই খ্বাইদগী য়াম্না উৎপগী লৈমা বুক ওফ রেকোর্দসতা আরকেসিএসকী মমিং চনখ্রে। লৈখিদ্রবা অসি লাই য়েকপগী মরমদা অতৈ অমদি মীংথোল কয়া ফংখ্রবা মীওইনি হায়রি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু