লৈনুংশি চেল্লবা পুন্সিগী ৱারী খরা - শেরাম নিরঞ্জন
লাইরিক নৈনবা
- লাইরিক্কী মিং: হুকখিদ্রবা কুন্দো পরেং (ৱারীমচা)
- অইবী: থোকচোমওংবী কৈনাহান দেবী
- অফোঙবা: বাংলাদেশ মণিপুরী সাহিত্য সংসদ
- ফোঙবা মতম: ফেব্রুৱারি, ২০২৪
‘ৱারী’ হায়বসি মীওইবা খুন্নাইগা মমাংঙৈদগী শাগোন্ননা লাক্লবনি। অদুবু সাহিত্যগী মচল অমা ওইনদি ‘ৱারীমচা’ নৌরিবা মখল অমনি। ৱারীমচানা মীওইবা পুন্সিগী থৌদোক-ৱাথোক মচা-মচাবু পীক্তক তৌবা ক্যানভাসতা য়েক্লগা অপাবগী থম্মোয়দা কাউঙমদ্রবা মমি অমা তাহন্নবা হৌৎনৈ। চুম্না থৌদোক-ৱাথোক পাউদম্বতা নত্তনা ‘টু গিভ দিলাইট এন্ড টু টিচ সামথিং’হায়বা অপাবগী পুক্নীংদা ৱাহং পোকহন্বা অমদি তমজনিঙায় ওইবা মেসেজ অমা শাগোন্নবা অসিনসু ৱারীমচাগী মহাওবু হেন্গৎহল্লি। কলা মখল অসিনা মীওইবা পুন্সিগী থৌদোক-ৱাথোক মচা মচাবু পীক্তকপা ক্যানভাসতা য়েক্লগা অপাবগী থম্মোয়দা পেলহৌদবগী চৈথেং অমগা লোয়ননা নুংঙাইবগী মহাও পীরি।
বাংলাদেশতা মণিপুরি সাহিত্যগী খোঙচৎ হৌরকপসি ইকুই কুইদ্রি, চহি য়াঙ্খৈরোমতনি। চহি য়াঙ্খৈগী খোঙচৎসিদা শৈরেংগী ফজরবা ঈচেল মরক্তা ৱারীমচানা চিংবা ফিক্সনরোমদা খূৎ থাবা মশিং য়ামজদ্রগসু বাংলাগী মণিপুরি সাহিত্যদা অইবশিংনা শৈরেংগী মথংদা খৱাইদগী হেন্না খূৎ থারিবদি ৱারীমচানি।
থোকচোমওংবী কৈনাহান দেবী- দ্বীপান্বিতা মথংগী মতমদা খূৎলোয়না ৱারীমচা ইবিরকখিবা অইবীনি। খ্রীষ্ট চহি ২০২২গী ফেব্রুৱারিদা অইবী অসিগী অহানবা লাইরিক ‘অমোৎপা পুন্সিগী অৱাবা’ (শৈরেং) ফোঙখিবগী চহি অনি মতুংদা ফেব্রুৱারি ২০২৪ দা ফোঙলকখি অনিশুবা লাইরিক ‘হুকখিদ্রবা কুন্দো পরেং’।
ট্রেডিশনাল ওইবা স্টাইলগী মনুংদা লৈরগা খুন্নায়গী নাক-য়েৎকী থৌদোকশিং উৎননবা হোৎনবনি। লাইরিকসিগী অয়াম্বা ৱারীমচাদি নুংশি-নুংওলদা য়ূম্ফম ওইবা ৱারীনি। লোয়ননা লাইর-অনংগী পুন্সি উৎপা, বাংলাদেশকী নীংতম লান্দা য়ূম্ফম ওইনা শাগৎপা ৱারীসু য়াওরি। খূৎই অসিদা মতম মতমগী মতুং ইন্না মায়োকèরকপা থৌদোকশিংদা মীওইবগী ওইরিবা মশকশিংবু উৎনবা হোৎনৈ।
লাইরিক অসিগী মরিশুবা ৱারীমচা ‘নুমিৎনা চায়থখ্রবদা’অসি পলেম-পন্থৌ অমসুং মচে কায়নখ্রবা নুপীমচা অমাগী তমথিরবা পুন্সিনা ৱারীমচাসিগী মরু ওইবা প্লোটনি। মমা-মপা লৈখিদ্রবা নুপীমচা অমানা নোংমা নোংমগী অৱাবা নঙলকখিবা মতৌসিবু ইচম চম্না লৌথুপ লৌকোয় লৈতনা লিথরকপা ওইরবসু ফাওরক্লিবা পূক্নীংগী ঈহুল অমদি খুন্নায়গী শক্তম অমা য়েকপা ঙমখি। মহাক্কী অতোপ্পা ৱারীমচাশিংদসু খুন্নায়গী অৱাবা শক্তম অমদি লাইরবনা ফঙলিবা চৈথেংবু ট্রেডিশনাল স্টাইলদা উৎননবা হোৎনবা থেংনৈ। ৱারীমচা অসিগী মরূ ওইবা কারেক্টার ওইরিবা ‘মিৎলু’সোশিয়েল রিয়েলিটিরোমদা চঙশিন্দুনা থিরুবদা থেংনরকপা সমস্যা অমগী চপচাবী চরিত্রনি।
অসিগী মমাংথংবা ৱারীমচা ‘নুমিত্তুগী খোঙচৎ’কৌবা অসি পাবদা নুংঙায়, অপাবগী থম্মোয়বু নৌথহল্লি, কপহল্লি। ৱারীমচা অসি থোকখিবা থৌদোকতা য়ূম্ফম ওইরগা শাগৎপনি, হৌখিবা পুন্সিগী থৌদোক অমবু তুং হন্না য়েংবনি। বাংলাদেশ থাদোক্তুনা জিরিদা লাইরিক তম্বা চৎখ্রবা মৌপ্বা বুঙোচাবু মচে ওইরিবী গম্ভিনীনা উন্নবা চৎপা অমসুং চৎথোক চৎসিন লম্বীদা থেংনখিবা অৱাবা ময়াম, খুদোং থীবা ময়াম গম্ভিনীনা ফার্স্ট পারসোনদা ঐ ওইরগা লিথরকপনি। মরকসিদা থাবুম অনী চুপ্না মচিন মৌপ্বা পুন্না লৈমিন্নখিবগী ৱারী শিংবুল ময়াম অমসু ৱারীসিনা পাউদম্বীরকই। ময়ুমদা লৈরিঙৈ কেনা-মৌনা হৌজরকপা মৌপ্বানা মনেচৌবীগী য়াথং ইন্দুনা শিং খায়বনাচিংবা থবক অৱাবা ময়াম তৌবা উবদা মপূক্নীংদা পেন্দবা-নুংঙাইতবা ফাউজরবসু মচে ওইবীগী হৌনবী মৌপ্বাবু থেমজিল্লি অসুম্না- ‘পুন্সিদা অৱাবা কয়া মায়োক্নরগা তুংদা নুংঙাইনা মহৈ চাদৌরিবনি।’ৱারীমচাসি পারুবদা মচিন মৌপ্বাগী কায়না মৈচাক্না অপাববু পিরাং শিন্থহনগনি, অদুগা লম্বীগী তমথীরবা খোঙচৎনা অপাবা থম্মোয়বু লাংতক্নহনগনি।
অইবীগী ৱারীমচা খরদা মতমগী মতুং ইন্না মীওইবগী লনাইগী নুংগী ৱাখল, শাজৎ-লীচৎকা লোয়ননা ময়ামগী ওইবা মওংদগী লন্নায়তগী ওইবা শক্তম উৎপগী হোৎনবা উবা ফঙঙি। মপানগী ফিজেৎ লৈতেং য়াওরবা মীওইবগী মশক অগিসী মনুংগী অশেংবা শক্তম করি ওইরি হায়বসি থিরকপনি। খুদম ওইনা ‘থাজরুবনা মাঙহনলম্বনি’হায়বা ৱারীমচাসি লৌখৎপা য়াই।
মীওইবা সমাজনা ৱানোম তুনোমবা পৈশা পীথোক পীশিন তৌবসি লোন্না নৎত্রগা ফোঙনা মমাংঙৈদগী অসুম চৎনরকই। থবক মচা নৎত্রগা য়াম্না চাউবা অমগীদমক অঙম্বা থাক্তা ৱাচৎ ৱানোম্বগী চৎনবীগা লোয়ননা লোন্না শেল পীনবগী করপসন অসি হৌজক্কী মতমদা য়াম্না কা হেন্না পাকচাউনা চৎনরক্লি। অসিগুম্বা শেঞ্জা থুমজাগী লাংদা থুরবা থৌদোক অমনা সরকারগী থবক তৌবা অমগী পুন্সিদা কয়াম্না মাং-তাকপা মওং ওইরকই হায়বসি অইবীনা থাজরুবনা মাঙহনলম্বনি কৌবা ৱারীমচাদা য়েক্লকখি। পীক্লবসু চাওরবসু করপসন য়াওদ্রবদি হৌজক্কী মতমসিদা থবক চংবা য়াদ্রে হায়বসি ৱারীমচা অসিনা ফোঙনা তাক্লি।
অইবী অসিনা ৱারীমচা খরদা নুপীগা মরী লৈনবা সমস্যা কয়া উৎননবা হোৎরকই। নুপী অইবী অমা ওইনা নুপীগী সমস্যাবু হেন্না লুনা লৌরগা খূৎথারকপা থিমেটিক ট্রিটমেন্ট অসি থোইদোক হেন্দোক্না শিংথানিঙায়নি। খুদম ওইনা ‘অসুম্না তমখ্রবোইরে’ হায়বা ৱারীমচাসিগী ৱাফম পনবা য়ায়। ৱারীমচাসিগী অহানবদা অসুম্না পাউদমলকখি- “যুগ যুগ কয়া হৌনা চৎনদুনা লাক্লিবা, অচুম্বা-অরান্বা ইখন খন্দনা, ইথি থিজিন্দনা অশোয়-অরাল, অফা-ফত্তা পূম্বা অশোনবদা হেক্তা তাইনশনবসে হৌনবী, চৎনবী ওইনা তৌরদুনা লাক্লিবনি। মমাঙঙৈদগী হৌজিকèাদি খরা ফবা ওইনা তৌরে। লাইরিক লাইশু হৈগৎলকপগী মতুঙ ইন্না অচুম-অরান লেপ্পা য়াবগী খুদমগা লোয়ননা হায়বা, ঙাঙবদা অচুম্বগী ৱাখল পোকহন্বা ঙম্বা কয়াসু উবা ফঙলে।”
নুপী ওইবীগী পুন্সিবু অইবীনা য়েক্লকখি অসুম্না- “মমাঙঙৈদগী ঙাঙনদুনা/থাজনদুনা লাকপগী মতুঙ ইন্না ইমুঙ মনুঙদা থোক্লিবা ৱাথোক-নুংথোক পুম্নমক নুপী অয়াম্বনা তুমিন্না লোনথোক্তবগুম অৱা-মৈশা কয়া খাঙনরি। ইমুঙ-মনুঙ মনিন নাইননি, ইচা-ইরা কায়ননি, সংসার কায়রনি, অৱাবা তারগনি খন্থদুনা নুপী ওইবী কয়ানা মখোন থোক্তনা তুমিন্না লেন্নবসু য়াওরিবনি। মচা য়াওদ্রবসু নুপীদা হেক তাইনবিবা, মচানিপা য়াওদ্রে নুপীদা তাইনবিবা, মচা ওকত্রে নুপীদা তাইনবিবা, মৱা-মপুরোইবা ওকত্রে নুপীদা, অৱা-অনা নংলে নুপীদা তাইনবিবা। মসি পুম্নমকসে খুন্নায়গী চৎনবি অমা ওইনা লাক্লবনি।”
ৱাহৈশিংসি অইবীনা য়াম্না তরাই তরাইনা হায়রবসু য়াম্না লূমখ্রবা, ৱাখল খন্থনিঙায় ওইবা ৱাহৈশিংনি। চৎনবীদা পেন্দবগী ৱাকৎনি, চৎনবীবু শিংনরকপনি। মথক্তা পনখিবা ৱাহৈ খরসিদা ফেমিনিজমগী মমি ময়েক শেংনা তারে হায়জনিংঙি। ফেমিনিজম হায়বসি চৎনলোন মনুংদা লৈরিবা নুপীনা মশাগী শক্তম অমসুং ফীবম্বু নৌহৌনা থিরকপা অমসুং য়েংলকপগী মীৎয়েং অমনি।
ফেমিনিজমগী মিৎয়েং অসি নোংচোপলোমদগী হৌরকপা ওইরগসু মফম মফমগী ওইবা চৎনরোল খেন্নবনা নোংচুপকী মীৎয়েং অদুমক চপচানা লৈগনি হায়বা লৈতে। মৈতৈশিংগী মৈহৌরোনদগী ঐখোয়গী নুপীগী ইমেজ করম্না শাগৎলকপগে হায়বদু ৱারীমচা অসিনা অমুক মীৎতা খুদোম্বী থিন্দুনা য়েংহল্লি। মৈতৈ ঐখোয়গী মীথতাÑ পান্থোইবী, লেজেন্দদা থোইবী, ইতিহাসতা লিন্থোইঙম্বীনাচিংবা শক্তমশিং অসি মৈতৈনুপীনা লংনা ঙাল্লিবা থৌনাগী সিম্বোলনি। অমরোমদনা নুপীবু থৱায় পান্দবা পোৎকুম্না শীজিন্ননিংবা মওংদা শিজিন্নবগী ওইবা য়াইথিংকোনু, ঙাঙ্খরৈমাগী ৱারী, ফাদুনা-মুন্দুনা গোমতী লৌবগী ৱারীসু লৈরি। অদুনা নুপী ওইবীগী থম্মোয়দা খুন্নায়গী চৎনবীদা শিংনরকপা, ৱাহং হংলকপা নোংমা নোংমগী হেনগৎলকই। চাকখুমদা, ইমুংদা, কৈথেলদা, লৌবুক্তা পাঙ্গল পুথোক্তুনা থবক শুরিবী থৌনাফবী মৈতৈ নুপীগী পেন্দবা লৈ। মপান থোকপা শেল তাল্লবসু মখ্বাংদা য়াথংগী লংশুং অমনা কিরি। ইমুং মনুংগী নত্রগা খুন্নাইগী ওইবা ৱারেপ লৌরকপা মতমদা ‘নুপী অঙাংনি’হায়দুনা মখোয়গী মৱাবু থৌশাবিদে। অসিগুম্লবা নুপী ওইবীগী পুন্সিদা পেন্দবা ফোঙদোকপা ৱারীমচাসিগী মরু ওইবা পান্দমনি।
অৱাবা হায়বসি নংঙাইবগী হেক তুংদা লৈরিবা পুন্সিগী তৎনা থানবা য়াদ্রবা কয়াৎ অমা ওইরিবনি। লাইরিকসিদা হিংনবা লানফমদা মায়োকèরকপা অৱা চৈথেংনা পুন্সিগী মায়ওন থৈখিবা মতৌ উৎলিবা ৱারীমচা খরসু য়াওরি। তৎখ্রবা মরী মপুরোয়বা কায়নদুনা লুখ্রা ওইহৌরবী নুপী অমগী পুন্সিদা লৈত লাইরবগী চৈথেংনা পীরকপা সমস্যাদা ওইরক্লিবা পুন্সিগী মশকনি। হিংবগী কল্লবা লান্থেংদা ফীভম অমদি মতমনা নাকয়েৎতগী পীরকপা চৈথেং কয়াগা মায়োক্নরদুনা অখাঙ কনবী, ট্রেদিশনাল ভেল্যুজতা চেৎনা থাজজরিবী মৈতৈ নুপী অমগী শক্তম য়েকপনি। তমথীরবা পুন্সিগী ঈরৈ অমদা লাকশিন্দুনা মপুরোয়বা কায়নরবসু নুপী অমা ওইবগী হৌনবী পূকচেল লেপ্তুনা মশাগী আদর্শ ঙাকচবতা নত্তনা মমা অমা ওইবগী চপচাবী মথৌদাং অদুতবু পামজবীনি। মতমগী পুন্সিগা চাশিন চুশিন্ননা হিংনবা হোৎনবদা শেলথুমনা পীরকপা চৈথেংনা কদায়ফাওবা শোকহনবগে হায়বদু মীৎয়েং কুপ্না অইবীনা য়েংলি। ৱারীমচাসিনা মশাগী পূক্নীংগী ফিভমনা থাকচবা লাংদগী নান্থোকপা ঙমদ্রবা মীওইবগী মশকপু সিম্বোলিক ওইনা উৎনবসু হোৎনরকই।
“নুংঙাইরে হায়না হায়রিবা মীপুং খুদিংমক্কী মরুমদাসু অসুম অৱাবসে লোৎতুনা লৈরম্মি, লাইরবগীদমক মী অমগী নীংতম্বা পুন্সিবু লৈবা য়ারিবনি। ইনে সালমানদি ইকায়-নুংশি য়ান্ননা ময়ামগা হরাও তয়াম্না তিন্নবা তোৎনবা ঙমদ্রি। চীম্বানথোংদা ৱাহং কয়া হংলকত্রবসু মীগী মিৎয়েংগী ৱাহংদুদি ইচম চম্না লৌশিন্বা ৱারি। নীংঙমদবা পেনদবগী চৈনাদুনা থম্মোয়নুংদা ইকায় নুংশি য়ান্নদুনা অৱাবা মপৈ মপৈ ওইনা হাপচিনবিররি।”পঞ্জরিবা মতেক অসি য়েন্নীংথাদসু য়েন্নীং হুনখিদ্রবা হায়বা ৱারীমচাগী অরোয়বা ৱাহৈ খরনি। অইবীনা মচানুপী স্কুলদা থিন্দোক থিন্দোক-থিঞ্জিন তৌবদা মচানুপীগা তম্বীনবী সাদিয়া কৌবী নুপীমচা অমবু স্কুল পুথোক-পুশিন তৌবা চহী হুম্ফুতরামুক শুরবা অহল অমবু উরুবদা ফাওরকখিবা ৱাহং কয়াদগী শাগৎলকপা ৱারীমচানি।
‘ইমাগী ঝুমকা’ শেল থুমগী ফীভমনা তপ্না তপ্না লাকশিল্লক্তুনা হিংবগী অরুবা তানফম লাক্লবদা ওইরক্লিবা অচৌবা লানফম অমগা মায়োকèরকপগী শক্তম উৎপনি। বাংলাদেশকী নীংতম লান্দা লাজেন ওইদুনা ইন্দিয়াগী ইছামতি শরণার্থী ক্যাম্পতা লৈবা তাখিবা খম্বা তোম্বীমচাগী ইমুং মনুঙগী অৱাবা পুন্সিগী ৱারীনি। নুংঙাইনা য়ূম্বান পুন্সি লেঞ্জরম্বা খম্বা-তোম্বীমচানা রিফিউজি ক্যাম্পতা থা নিপাল সনা লিকোন য়োন য়োন্দুনা হিংননবা লানফম মায়োক্নরকপদা সনা লিকোননা লোয়শিল্লকপগা লোয়ননা মচানিপা অহল মখোং হাম্বগী লৈনানা লৈখিদবা অসিনাচিংবা অৱাবা মতমদুবু অইবীনা মরিক চুম্না উৎলকখি।
‘অমম্বা অহীং’ হায়বা ৱারীমচাসিমসু বাংলাদেশকী নীংতম লানদা প্লোট ওইরগা শাগৎপনি। লানগী মতমদা অহীং অমমম মীচমশিংনা লেনখিবা অৱাবা মতমদুবু অইবীনা য়েকখি অসুম্না “নুমিদাং য়াচংখিদুনা মালেম পূম্বা অমম্বা ইন্নফিনা কুপশিনখ্রবদা পাখৎপা মিপাইবনা মীৎ কক্লামা উইশিনবা য়ানরমদে, অহিংদা অমুক করিবু থোক্লগবা, করিবু তৌরগবা খনবদা। অহিং হেক ওইবগা মীহুন-থাহুন থকৎনবা হৌই।”
অদুগা লানগী মতমদা কামাশ্বরা আর্মি ক্যাম্পদা মীওৎ মীনৈ তৌবা অদুগী মওংবু অইবীনা পনখি অসুম্না- “লীচৈ চানীংলবদি কামাশ্বরাদা চৎলু অদুগা কিহোম চানীংলবদি কোনাগাও চৎলু।” কামাশ্বরাদা পুখ্রবদি য়াম্না পাখৎনৈ, নুংশা থীনৈ করিবু তৌরগবা হায়দনা। নুপী-নহা কায়তংসু ফাদুনা পুবিরিবনি। মীমতনা ঙাঙলুবগী মতিক লৈতে মদুদা। ঙাঙলুবা মহাক্তুদি অসুম থৱায় মাঙজরে।”ৱারীমচাসি ট্রেজিক আইরনিগী মওংদা ইবানি হায়বা য়ায়।
খূৎই, খূৎফোঙদোক, লোন অমদি মীৎয়েং:
থোকচোমওংবী কৈনাহান দেবীগী লাইরিক অসিদা শিজিন্নরিবা লোন চম্না ফজৈ। তরু তনাল্লি। অয়াম্বা ৱারীমচাশিং অচম্বা শৈলীদা শেমনীংলিবা ৱারীদু অসুম লীথরগা ফঙনিংলিবা পান্দম অদু য়ৌননবা হোৎনবা থেংনৈ। ৱারীমচাগী অনৌ-অনৌবা টেক্নিকশিং শিজিন্ননবা হোৎনবা থেংনদে। কনাগুম্বনা ৱারী লীবগুম থৌদোকনা মাঙদা থাংদোক্তুনা মফম চানা ডাইলোগ শিজিন্নদুনা থীম অমদা শাফু পীদুনা লান্থোকখি। ৱারীমচাগী থীম অয়াম্বা লৈত লাইর পুন্সিগা মরী লৈনরবসু তোঙান তোঙানবা সিচুয়েশন্দা শাগত্তুনা দিসক্রিপটিব ওইবা খূৎইদা ৱারীগী খোঙজেল তহা তহাদে। লাইরিক অসিদা ৱারীমচা অইবী অমা ওইনা থোকচোমওংবী কৈনাহান দেবীগী মীৎয়েংদা মীনুংশিগী মফম অমা চাউনা লৈবা থেংনৈ।
মতাংসিদা পঞ্জনিংবা অমনা, অইবী থোকচোমওংবী কৈনাহান দেবীগী ৱারীমচাগা কবি থোকচোমওংবী কৈনাহান দেবীগী শৈরেংগা য়াম্না নক্নবা মরী অমা উবা ফঙঙি। অইবীগী শৈরেং লাইরিক ‘অমোৎপা পুন্সিগী অৱাবা’দা ফোঙখিবা অয়াম্বা শৈরেংগী প্লোট অমদি কোন্টেন্ট ৱারীমচাগী লাইরিক অসিদসু থেংনখি। পুন্সিগী চেনা ফাক্তোক্লুবদা লোইবা নাইদ্রবা ৱাহং কয়ানা ওমচাক্নদুনা পোইটিক ভিজন অমদি পোয়েটিক টোনদা ফোঙদোরকখিবা শৈরেংগী সুর কয়া অমসুং মীৎয়েংশিং পোত্থাফম খঙদ্রবা পূক্নীংগী মৈশাগা লোয়ননা ৱারীমচাগী শক্তমদা অমুক ফোঙদোরকই।
থোকচোমওংবী কৈনাহান দেবীগী লাইরিক অসিদা এবস্ট্রেক্ট ওইবা খূৎফোঙদোক নত্রগা সিম্বোলিক ওইবা খূৎ্ই থেংনদ্রবসু মহাক্না য়েক্লকলিবা খুন্নায়গী নাক-য়েৎকী শক্তমশিংগা লোয়ননা মতমনা পীরকপা চৈথেং কয়া অমদি ফোংদোক্লিবা ইচম চম্বা মফোঙদোক অসিনা অপাবশিংদা নুংঙায়বা পোকহনগনি। মহাক্কী ৱারীমচাদা পুশিল্লক্লিবা শক্তমশিং অসি অইবীনা অকনবা শাফু চেনবা শক্তি অমা য়াওনা য়েক্ননবা হোৎনবনা অপাবগী থম্মোয়দা পেলহনবা ঙম্মি।
থোকচোমওংবী কৈনাহান দেবীগী সহিত্যগী ঈচেল অরেপ্পা লেতনা চেন্থবা ওইসনু।
0 কমেন্ট:
কমেন্ট তৌবিয়ু