• 637
• ১৯শে অক্টোবর ২০২৩ ইং
• Share on:

রোমী মৈতৈগী ‘ঐখোয়গী য়ুম’ অমসুং সাইখোম রতনগী ‘বিওন্দ ব্লাষ্ট’ না বেষ্ট মীতৈলোল ফিল্মগী এৱার্দ ফংলে

ইম্ফাল, ওক্টোবর ১৭ : ঙসি ন্যু দেল্লীগী বিজ্ঞান ভবনদা পাঙথেকখিবা চীং লেম্লবা থৌরম অমদা প্রেসিদেন্ট দ্রৌপদি মুরমুনা লৈবাক অসিগী ৬৮ লক শুবা নেসনেল ফিল্ম এৱার্দস-২০২১ য়েন্থোক খিবদা ময়াংলম্বম রোমি মৈতৈনা দিরেক্সন পীবা ‘ঐখোয়গী য়ূম’ অমসুং সাইখোম রতনগী ‘বিওন্দ ব্লাষ্ট’ না বেষ্ট মীতৈলোল ফিল্ম এৱার্দ অমসুং বেষ্ট বাইওগ্রাফিকেল ফিল্মগী মনাশিং ফংখ্রে।

         ময়াংলম্বম রোমি মৈতৈ

লৈবাক অসিগী কন্সটিট্যুসনগী ৮ শুবা সেদ্যুলদা শকখঙলবা লোলশিংগী মনুংদগী ‘ঐখোয়গী য়ূম’ দা খ্বাইদগী ফবা মীতৈলোল ফিল্মগী এৱার্দ পীরকখিবনি।  
অদুগা সাইখোম রতনগী ‘বিওন্দ ব্লাষ্ট’ না সোমনাথা মোন্দালগী ‘রুখু মাটির দুখু মাঝি’ গা পূন্না বেষ্ট বাইওলোজিকেল ফিল্ম/হিষ্টোরিকেল রিকন্সত্রক্সন/ কম্পাইলেসন ফিল্মগী মনা পূন্না ফংমিন্নখিবনি।

রোমি মৈতৈগী মিনিট ৮৬ শাংবা ফিল্ম ‘ঐখোয়গী য়ূম’ দা শক্তম লাংলিবশিংনা মাষ্টর প্রিয়োজিৎ, ঙান্থোইবী, ভুমেশ্বর, সোরি সেঞ্জাম, ভানু লৈমা, নুপাতোন, রাজেন, কুঞ্জে অমসুং বোজেননি। ফিল্ম অসি মহাক্না ষ্টোরি অমসুং স্ক্রিনপ্লেগী থৌদাং লৌবদা নত্তনা দিরেক্সনসু পীবনি। ফিল্ম অসিগী এদিটরনা জোনি মৈতৈনি।

            সাইখোম রতনগী ‘বিওন্দ ব্লাষ্ট’

অদুগা মিনিট ৫২ খখ্তমক শাংবা সাইখোম রতনগী ফিল্ম অসিনা চহী খরগী মমাঙদা থোকখিবা বোম পোকখায়বগী থৌদোক্তা খোঙ অনীমক ককখ্রবা আর্টিষ্ট কোন্থৌজম মাইকেল মৈতৈগী পুন্সিদা য়ূম্ফম ওইদুনা পুথোকপা ফিল্মনি। ঙসিগী থৌরম অসিদা লৈবাক অসিগী খ্বাইদগী ৱাংলবা ফিল্মগী লাইফ টাইম এচিভমেন্ট এৱার্দ ‘দাদা সাহেব ফালকে’ এৱার্দসু প্রেসিদেন্টনা খূৎশিন্নখি।

পনবা য়াবদি ঙসিগী থৌরম অসিদা ফিল্মগী নেসনেল এৱার্দি অমা ওইবদা নত্তনা জ্যুরি মেম্বার অমসু ওইখিবা মণিপুরগী শক্নাইরবা ফিল্ম মেকর বোরুন থোকচোমসু শরুক য়াখি।

সোর্স: হুইয়েন লানপাউ