রাজর্ষি ভাগ্যচন্দ্রগী ২২৫ শুবা নীংশিং থৌরম পাঙথোকখ্রে
ইম্ফাল, ওক্তোবর ১৭ : শ্রীশ্রী গোবিন্দজি তেম্পল বোর্দ, কর্তা ভাগ্যচন্দ্র পারিষ অমসুং শ্রীশ্রী রাশেশ্বরী পালা মরূপনা শীন্দুনা ঙসি রাজর্ষি ভাগ্যচন্দ্র লৈখিদবগী চহী ২২৫ শুবা নীংশিং থৌরম পাঙথোকখ্রে।
নীংশিং থৌরম অদুগা মরী লৈননা ঙসি অয়ূক রাজর্ষি ভাগ্যচন্দ্রগী পোক্নফম য়াইস্কুল জন্মস্থানদা তর্পন কৎলবা মতুং খ্বাইরম্বন্দ কৈথেলগী শামু মখোঙদা লৈবা রাজর্ষি ভাগ্যচন্দ্রগী মিতমদসু হৈকৎ-লৈকৎ তমখি। লোয়ননা শ্রীশ্রী গোবিন্দজি তেম্পলদা লূকচাও অমসুং পুষ্পাঞ্জলি কৎপনা ঙসিগী থৌরম অসিগী মপূং ওইবা থৌরম ওইখি।
থৌরম অদুগা মরী লৈননা গোবিন্দজি তেম্পল বোর্দকী বোর সেনাপতি আর কে চিরঞ্জিৎনা হায়, চহী খুদীংগী মেরাগী ৩ নি পানবা নুমিৎতা শ্রীশ্রী গোবিন্দজি তেম্পল বোর্দ, কর্তা ভাগ্যচন্দ্র পারিষ অমসুং শ্রীশ্রী রাশেশ্বরী পালা মরূপনা শীন্দুনা রাজর্ষি ভাগ্যচন্দ্রগী নীংশিং থৌরম পালন অসি লেপ্তনা পাঙথোক্তুনা লাক্লি। অদুবু হন্দক চহীগী ওইনদি পালন থৌরম অসি হৌজিক থোক্লিবা ঈরাং অসিনা মরম ওইরগা কা হেন্না পাকথোক চাওথোক্তুনা তঙায়ফদবা লাইগী ওইবা থৌরমখক্তা পাঙথোকপনি।
১৮ শুবা চহীচাদা ইনিংথৌ ওইরম্বা মহারাজ ভাগ্যচন্দ্রগী অচুম্বা ভক্তি অসি য়াওদ্রগদি খুন্নাই অসি ঈং-তপ্পা লৈরোই হায়বা ভক্ত কয়াগী ৱাখল্লোন লৈরিবনি। লমদমসিগী কলা সংস্কৃতিদা লময়ানবা অমা ওইনা ইনিংথৌ অসিনা থম্বীরম্বা মমল নাইদ্রবা কলা সংস্কৃতিগী খূদোল কয়া অসি নীংশিংবা অমদি মহাক্কী মফমদা ঙসিগী মীরোলনা ইকায়খুম্নবা ঊৎপগী থৌরম অসি চহী খুদীংগী পাঙথোকপনি হায়না ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু