আপডেট:
image

মৈরাবা লুৱাং বি দব্লিউ এফ ৱার্ল্ড রেঙ্কিংগী ৬৪ শুবা মফম কনবা ঙমখ্রে

ইম্ফাল, নভেম্বর ৯ :মালেমগী ওইনা বেদমিন্টন মশান্নগী গবর্ণিং বোদি ওইরিবা বেদমিন্টন ৱার্ল্ড ফেডারেশন (বি দব্লিউ এফ) না হৌখিবা নভেম্বর ৬ তা থোকখিবা ৱার্ল্ড রেঙ্কিংদা মণিপুরগী মৈস্নাম মৈরাবা লুৱাং ৬৪ শুবা মফম কনবা ঙমখ্রে। বি দব্লিউ এফকী মখাদা পাঙথোকখিবা ভিয়েতনাম ওপেন ২০২২ ইন্টারনেসনেল বেদমিন্টন অমসুং ইন্দোনেসিয়া মাস্টার ২০২২ ইন্টারনেসনেল বেদমিন্টন সুপার সিরিজ হন্দ্রেদতা শরুক য়ারবা মতুংদা ৱার্ল্ড রেঙ্কিং ৬৪ দা অদুগা ৱার্ল্ড তুর রেঙ্কিংগী ওইনা মেন্স সিঙ্গলসকীদা ৭৭ শুবা মফম কনবা ঙমখি।

মশাগী চহী ১৯ শুরবা মৈরাবনা মহাক্কী কেরিয়ারদা মেন্স সিঙ্গলসকী তাইটেল ১২৯ লৌবা ঙমখ্রে। ৱার্ল্ড রেঙ্কিং ৬৪ দা লৈবগা লোয়ননা নহা ওইরিবা বেদমিন্টন শন্নরোয় অসিনা পেরিস ওলিম্পিক গেমস ২০২৪ দা শরুক য়ানবগী মীৎয়েং থম্লি। মৈরাবানা থা অসিগী ২৯ দগী দিসেম্বর ৩ ফাওবা বাহারাইনগী মানামাদা পাঙথোক্কদবা বাহারাইন ইন্টারনেসনেল চেলেঞ্জ ২০২২ অমসুং বাংলাদেশকী ঢাকাদ দিসেম্বর ৭ তগী ১১ ফাওবা বি দব্লিউ এফ, বেদমিন্টন এসিয়া কনফিদারেসনগী মখাদা পাঙথোক্কদবা য়োনেক্স সানরাইজ ইন্টারনেশনেল চেলেঞ্জ ২০২২ দা শরুক য়াগদৌরি।

লৈবাক অসিগী ওইনা টার্গেত ওলিম্পিক পোদিয়াম স্কিমগীদমক ইং ২০২৮ গী ওলিম্পিক গেমসকীদমক মিনিস্ত্রি ওব য়ুথ এফেয়ার্স এন্দ স্পোর্টস অমসুং স্পোর্টস ওথোরিতি ওইবা ইন্দিয়ানা ইন্দিভিজুয়েল ইভেন্তকীদমক নোর্থ ইস্ত রিজনদগী মৈরাবা খল্লকখিবনি। মিনিস্ত্রিগী ফ্লেগশিপ প্রোগ্রাম অসিনা লৈবাক অসিগী থোইদোক হোন্দোক্না হৈথোং শিংথইরবা শান্নরোয়শিংবু লাক্কদৌরিবা ওলিম্পিক গেমসশিংদা লৈবাক অসিগী মিংচৎ পুরক্নবগীদমক অখন্নবা খুদোংচাবা কয়া অমা পীনবা থৌরম তৌরকখিবনি।

স্কিম অসিগী মখাদা লৈবাক অসিগী তোঙান তোঙানবা মশান্না ১৩গী থোইদোক হেন্দোক্না খনগৎলবা শান্নরোয় ১০৪বু কোর গ্রুপতা থম্বগী মনুঙদা মৈরাবসু য়াওবা ঙম্লি। মসিগী মথক্তা মশান্না ১২দা হেন্না ফবা শান্নরোয় ২৬৯ খনগত্তুনা দিভেলপমেন্ট গ্রুপ হায়না খায়দোক্তুনা স্কিম অসিগী কান্নবা ফংহল্লি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু