• 222
• ১৮ই সেপ্টেম্বর ২০২৩ ইং
• Share on:

মীতোপ্না ৱায়েনগদ্রা ঐখোয়না লৈঙাকচগদ্রা - তোংব্রম অমরজিৎ

লৈবাক অসিগী পার্লিয়ামেন্টকী মীফমদা মনিপুরগী মৈতৈ-কূকিগী ৱাথোক্কী ৱারোইশিন অমা পুরকনবা হায়দুনা ওপোজিসন্না থাংগৎলকপা নো কনফিদেন্স মোসনগী পাউখুম পীরদুনা লৈঙাক পায়রিবা দবল ইঞ্জিন লৈঙাকনা ইরাং অসি লোয়শিন্দুনা শান্তি পুরকনবা চপ চাবা অরেপ্পা ৱাফমদি থমখিবা লৈতে। অসুম্নদি হায়খি  মণিপুর মীয়াম্না লৈরুম ফিতনা ঙকশমদা হুক্তুনা তরাম্না হেক হেক ওকখিবা পি এম মোদিনা, “অমিত শাহনা হায়বা য়াবা হায়খ্রে, মনিপুরদা অতেনবা মতমগী মনুংদা শান্তি পুরক্লগনি”। ৱাফম অসি কয়াম চুম্লবগে অমসুং থবকনা উৎলবরা হায়বদু মণিপুর এসেমব্লি সেসন হৌখিবা অগস্ট ২৯দা মমিংতং ফমলগা অদুসু মিনিট তরাদা লোয়শিনখিবা অদুনা লেংদ্রবা খুদম ওইরি। দেল্লী পার্লিয়ামেন্টতগী হৌরগা  মণিপুর এসেমব্লি ফাওবনা মনিপুরগী কাংলুপকি ৱাথোক লান্থোক অসিগী ৱারোইশিন পুরকনবা চপ চাবা ৱারেপ লৌদুনা থবক ওইনা পাংথোকপা ঙমদ্রিবসি তশেংনা মালেমগী অচুম্বা চৎপা লৈবাক কয়াগী মমাংদা ইকায়নিংঙাইনি।    

মীয়ামগী খোল্লাউদি লাইগী খোল্লাউনি হায়নরিবনি। অদুবু অচুম্বা খোল্লাউদি তাগদবা লুচিংবশিংনা তাশিন্নদনা লৈরি। মেগী তাং ৩, ২০২৩ অসিমক তিনমু লাইমু, শারোই ঙারোই য়াম্না কনবা নুমিৎ অমা শোয়দনা ওইরম্লগনি খন্দবা ঙমদে। ফত্তবা থবক্কি শারৌ শিনবদা হৈ শিংলবা কুকি জো ফুরুপ্না, ইমিগ্রেন্ট কূকিশিংনা তোংশিন্দুনা নুমিৎ অসিবু অতমননা মৈতৈনা এস তি দিমান্দ তাল্লকপদা য়ানিংদবা ফোংদোকপগী খুদোংচাবা লৌদুনা ইন্দিয়াগী ভাইস প্রসিদেন্টনা দি এম য়ুনিভর্সিতিদা থৌরম য়াওরিঙৈদা তোর্বুংদা হেক্তা খুন তুম্না মৈ থাদুনা মৈতৈ  তুম্না হাৎলগে থৌরাংলকপা অমসুং মৈতৈ তাবা খুল কয়াদা লেপ্পা লৈতনা তেরোরিস্তকি এতেক চত্থারক্লিবসিমক পেন্নিংঙাই ওইদে। লো কোর্টতা  থেংনবা য়াবা ইসুবু নাথৈদুনা তোঙানব লৈঙাক তাল্লকপা অসিমক য়াম্না শাথিবা কন্সপিরেসি অমনি। নুমিৎ অসিদগী হৌদুনা মীওইবগী ৱাখল চেন্দবা, মীনুংশি লৈতবা, মশাগীতা খনবা, মালেমসি মখোয়তা হিংগে খনবা, কুকি জো ফুরুপনা মৈতৈগী য়ুম কয়া খুল কয়া পাকতকননা অমসুং লেপ্তনা মৈনা তুম্না থাদুনা মরাল লৈত্রবা মীচম মীয়াম, নুপী অঙাং খাক্তনা লান্দাদুনা লাক্লি মনিপুরগী লোইজীং লোয়া অয়াম্বদা। চীং লৈবা লম অদুগা মখোয়গী  য়ুম্মাক খরা লৈবা লম মখৈ মখোয়গী লম্নি হায়বা  কারাম চাওবা ৱাখলদা লম খোপচিনবা অমসুং খুল মমিং ফাওবা শেমদোক্তুনা থোনদুনা চহী লীশাং শিৎনা লাক্লি। মৈতৈশিংনা মসিদা অয়েৎপা পীখিদে। ইম্ফাল ময়োলদা ফাওবা মনিং তম্না লৈদুনা চর্স ফাওবা মরাং কায়না শাদুনা লাকখিবনি। অদুবু য়ুমদাংবশিংনা য়ূম্বুদা তমথিবা লান শিংনদুনা লান্দাবা হৌরকপদদি মীওই লীশিং কয়া মশাদা শেৎ ইননবা ফি অদুতং লোয়নদুনা য়ূম ইংখোল  থাদোক্তুনা লাঞ্জেন্নদুনা রিলিফ কেম্পশিংদা ৱানা  থৱায় হীংনবা হোৎনরি। চমজরবা মীওই কয়া লৌবূক্তা লৌ উবা চৎপদা নোংমৈ বোম কাপশিন্দুনা লান্দারি। অসিগুম্বা তেরোরিস্কি থৌওংদা লান্দারকপা অসিদা লৌমী শিন্মি, মীচম কয়া হাৎখ্রে। পুলিস্তা এফ আই আর মশিং লাকঙমদনা ফাইল তৌখ্রে। ৱাকৎ মীফম মশিং খঙদনা ইমা ইবেলশিংনা লৈকায় লৈকায় খুদিংদা ফম্লি। ৱারোইশিন অমা পুরকনবা লূপ কয়ানা খোল্লাউ কয়া চীংলৈবাক মনিপুরগী মফম পুম্নমক্তা লেপ্তনা লাউরি। লোকেল তিভি চেনেলশিংদা, পাউচেশিংদা অখঙ- অহৈ কয়ানা ওইথোকপা য়াবা সোল্যুসন কয়া ফোংদোক্লি। কুপ্না খন্নরি, নৈনরি। তৌইগুম্বসুং লান খামগদবা লৈঙাকনা অরেপ্পা ৱাফম অমসুং লৌখৎফম থোকপা থবক অমত্তা মতম চানা, মপুং ফানা লৌখত্তবনা থা মরি হেনজিল্লক্লবা মৈতৈ-কূকিগী কাংলুপকি লান অসিনা নে তাবা পুন্সি মহিং অমদা মীয়াম্বু হিংহনবদি হৌজীক্কী ওইনা ঙমদ্রি।   

মনিপুরদা লৈবাক ইরাং খরা হেক লাকপগা দেল্লিদা চার্টর ফ্লাইট তোংদুনা হেক হেক চৎলিবা লুচিংবা মিংথোল শিজিন্নরিবা মীয়ামগী মীহুৎশিংনা ফমজাও কোল্লিবা দেল্লিদা লৈরিবা মখোয়গী য়াকা হেক হেক য়েংদুনা মণিপুর লৈঙাকপা শারগা লাক্লিবসি কুমজা কুমশিং য়ামশিল্লক্লে। মচিন থিবদা হালেংবা লৈত্রবা লৈবাক্কি লন থুম হি য়াই হুবদা লমজিংলিবা মখোয়না মীচম মীয়ামগী অফবা তৌরক্কনি হায়বসি থাজবা ঙমদ্রে ঙসিদি মীয়াম্না। হায়রিবা লুচিংবা শাবা ৱাজাও ঙাংদুনা লৈবাক নুংশিবা শারিবা মখোয়না শান্নরিবা অরোনবা লীলা অসিদা হৌজীকসু মীয়াম্না পাম্বৈ লৈতনা তাকসি শোল্লগা লৈরি। মীচম মীয়ামদি খুত্তা খুৎলাই পায়দে, মিচং শংগা থোয়না লৈতে খঙনা খুৎলাই মতিক চানা পায়বশিংনা অচুম্বা অশেংবা ঙাংবশিংসু কিহন খঙহন্দুনা লৈবাক খুনাইগী য়াইফনবা ৱাফম খরা ফোংদোকপা মীওইশিংদা ফাওবা নিংতম্বা ফংহনদ্রিবা মনিপুরনি।  পোলিতিকেল পার্টি খুদিংমক্তা য়াওরিবা মেম্বর খুদিংমকনা লুচিংবদি ওইনিংই অদুগা পুকচেলদি শেংদে। চিন্থিবনা ফম্থোল কারি। নম্থাক পরেংনা ওইরোইদবা ৱারেপ লৌরগা কনানা মখোয়বু লুচিংবনি হায়গনি।  

মীয়ামদগী খোমগৎলিবা য়াম্লবা টেক্সকি শেনফম, চহী অমদা লাক্লিবা রেভেন্যু ময়াম অমসুং ঐখোয়গী লৈজরিবা হ্যুমেন রিসোর্সনা লৈবাক অসিগী শেল থুমগী পূক্কৈ অমসুং লৈঙাক অসিগী য়াংলেন ওইদুনা লাক্লি। মসিবু লান্না লান্না মশাগী মরল মথুম ওইনা শিজিন্নরিবশিংনা লুচিংবা মিংথোল শিজিন্নরিবশিংননি হায়নরক্লি ঙসিদি মীয়াম্না। ফজখ্রবা দিমোক্রেসি চৎপা লৈবাক অমদা মীয়ামগীদমকনি হায়দুনা শেম্লিবা লো অমসুং ৱেলফিয়ার স্কিম কয়া  ঙসিদি শাগুন তৌবা হৈবাশিংনা শায়েন ঙায়েন্নরি। মসিদসু পেল্লকত্রদুনা মীরমদগী মীতোপ মীয়ান কয়া পুশিল্লক্তুনা ভোট বেঙ্ক শাগৎতুনা লাক্লি, মীচং খোম্নরি হন্না হন্না পাৱার পায়নবা অমসুং চীংলৈবাক মনিপুর অসিগী লোইবী চীংশাং নাপোম ৯০%লোম পোপি থাদুনা দ্রগ শুংদুনা লূপা ক্রোরনা খুজিং ওইদুনা শেন্দাল লম্বী শেম্বদা ঙসি ঙসিমক অদুগা মমাংথক্তা লৈঙাকপদা য়াওরম্বশিং - য়াইতোং ফমদোংবা কয়া, তৌবা ঙম্বা মীওই কয়ানা লোন্না অমসুং ফোংনা শরুক য়াদুনা লাক্লি হায়বা ৱাফম ঙসিদি সোসিয়েল মেদিয়াদা শারা শন্দুনা  খঙদবা তাদবা লৈত্রে। মনিপুরদা ঙসি থোক্লিবা ইরাং অসিগী হৌরকফম, ইমু নাইমু তানরিবা অসিগী ৱাগী ৱারুদি নার্কো- তেরোরিজমগী থবক অসিননি হায়না বি বি সি নিউস্তা ফাওবা ফোংলকখিবা লৈখ্রে।  মনিপুরগী কাংলুপ অণীগী লান অসিগী পাউদম্না নেস্নেল মেদিয়া কয়াগী মরু ওইবা হেদলাইন ওইদুনা থা খরা অসি লাক্লি। উনবা য়াবা অখঙ অহৈ উনদুনা তি  ভি চেনেলশিংদা লৌরিবা ইন্তরভিয়ু কয়াদা কাংলুপ অনীগী অখঙ-অহৈ  মীওইশিংগী ফোংদোক্লিবা  পূকনিংগী ৱারোলশিং য়েংলগা তারগা নৈনরগা অয়েংবা অতাবা মীপুম খুদিংনা খঙলে ৱাথোক অসিগী হৌরকফম অমসুং করম্বা ফুরুপ্না হান্না তমথিরবা লান অসি হৌবনো, কনানা হান্না য়ূম মৈ থাখিবা, কনানা অরানবা পাউ শন্দোক্তুনা ভিক্তিম কার্দ শান্নরিবগে হায়বা পুম্নমক শিৎ নান্না খঙনরক্লে মালেমগী মীয়াম্না ঙসিদি।  

লৈবাক অসিগী পার্লিয়ামেন্টকী মীফমদা মনিপুরগী মৈতৈ-কূকিগী ৱাথোক্কী ৱারোইশিন অমা পুরকনবা হায়দুনা ওপোজিসন্না থাংগৎলকপা নো কনফিদেন্স মোসনগী পাউখুম পীরদুনা লৈঙাক পায়রিবা দবল ইঞ্জিন লৈঙাকনা ইরাং অসি লোয়শিন্দুনা শান্তি পুরকনবা চপ চাবা অরেপ্পা ৱাফমদি থমখিবা লৈতে। অসুম্নদি হায়খি  মণিপুর মীয়াম্না লৈরুম ফিতনা ঙকশমদা হুক্তুনা তরাম্না হেক হেক ওকখিবা পি এম মোদিনা, “ অমিত শাহনা হায়বা য়াবা হায়খ্রে, মনিপুরদা অতেনবা মতমগী মনুংদা শান্তি পুরক্লগনি”। ৱাফম অসি কয়াম চুম্লবগে অমসুং থবকনা উৎলবরা হায়বদু মণিপুর এসেমব্লি সেসন হৌখিবা অগস্ট ২৯দা মমিংতং ফমলগা অদুসু মিনিট তরাদা লোয়শিনখিবা অদুনা লেংদ্রবা খুদম ওইরি। দেল্লী পার্লিয়ামেন্টতগী হৌরগা  মণিপুর এসেমব্লি ফাওবনা মনিপুরগী কাংলুপকি ৱাথোক লান্থোক অসিগী ৱারোইশিন পুরকনবা চপ চাবা ৱারেপ লৌদুনা থবক ওইনা পাংথোকপা ঙমদ্রিবসি তশেংনা মালেমগী অচুম্বা চৎপা লৈবাক কয়াগী মমাংদা ইকায়নিংঙাইনি।    

কুকি এম এল এ ১০ না ফোংনা শৌগত্তুনা তেরোরিসকি থৌওং চত্থদুনা লাক্লিবা কুকি জো লালহৌবগা পূল্লগা তোখায়বা লৈঙাক শেমগে, মখোয় তোঙানবা এদমিনিস্ত্রেসন অমা পীয়ু হায়না   মনিপুরগী অপূনবগী শক্তম অমসুং ঙমখৈদা শিংনরক্লবা অসি ফাওবদা লৈঙাক অসিবু লুচিংলিবনা এক্সন লৌবা ঙমদবা, ৱায়েনবা ঙমদবা হায়বসি মতিক চাদ্রে হায়বনি। মসিদা মীয়াম্না হংনরক্লিবদি কুকি জোগী তৌবা ঙম্বশিংদগী লৈঙাক অসি শেম্নবা অমসুং পাৱার পায়নবা হোৎনবদা মখোয়গী মরল কয়াম চারুরবগে অমসুং কয়াম কুইনা তম্বা ঙমদবা পুন্সি মহিং অমদা লৈখিগদগে হায়বসিনি। কাংলুপকি ইরাং অসি হেক লাকপদগী ফূরুপ অনীগী লৈরিবা মীওইশিংনা সেন্তরদা অমসুং মরি লৈনবদা পীশিল্লিবা মেমোরেন্দম ময়ামসি মশিং থিঙমদ্রে হায়বা য়াই। লূপসু মথং মথং থোক্লক্লি মণিপুর কনগনি খন্না। অদুবু লৈঙাকনদি চৌক্রি তুদনবা ওইনা থৌশিল্লিবগুমনা শান্তি পুরকনবা হোৎনরি হায়না ইতৎ তত্তনা পাউখুম পীরি। রিলিফ কেম্পতা য়েংশিল্লি, অৱাৎ অপা পিরি, য়ুম শারনি, কমপেন্সেসন পিনবা হোৎনরি অসিনচিংবা চিনফা পুরবা ৱাহৈ খরা পাউচেশিংদা মেদিয়াদা ফোংদোকলি। ইমুংদা তুম্লিঙৈদা তমথিবা হাৎখ্রবা মৈতৈ নহা অদুগী লুখ্রা ওইহৌরবী চানু নীঙোল অদুনদি লমন খুমনিংলমলোইদ্রা টেরোরিস্তশিং অদুগী মথক্তা? কনানা পীগদৌরি অচুম্বা ৱায়েল অসিগুম্বা মীচম মীয়াম কয়া তমথিরবা লান অসিদা লৈখিদ্রবশিংদা? ৱাহং চাম্ম চাম্মা হংনরক্লি ঙসিদি মীয়াম্না। মীচম মীয়াম ঙাকনবা লৈরিবা লৈঙাক্কী ফোর্সশিংসু লৈবাক কায়নবা ফত্রবা শারৌ লাং থাক্লিবা ইমিগ্রেন্ট কুকি জোনা হুইগং তাংবদা য়াওখ্রবজাৎলা হায়না। চাওখ্রবা ইন্দিয়াগুম্বা লৈবাক অসিগী খ্বাইদগী মরু ওইবা লৈঙাকলোন্দা থৌদাং লৌরিবা নেস্নেল মেদিয়া হাউস, রিজনেল মেদিয়া হাউস অয়াম্বা হন্দক নাকল নাম্মগীতা ওইবা পাউ ফোংনরকপা মীপুম খুদিং থেংনরি। মসিফাওবা মনিপুরগী ঙমখৈদা শিংনরকপশিংনা শারেং মতুপ মতুপ পিজখ্রবরা হায়না হংনরক্লি মীয়াম্না। মরমদি অচুম্বা পাউ ফোংবগী মহুৎতা প্রোপেগন্দা ওইনা মেজোরি মৈতৈনা মাইনোরি ত্রাইভেলদা ইথনিক ক্লিন্সিং তৌরে হায়না অরানবা পাউ শন্দোকপদা মতেং পাংলি। সোমদনা লৌবূক্তা, চীংয়াগী খুলশিংদা কুকি টেরোরিস্তশিংনা লেপ্তনা বংকর শাজিল্লক্তুনা, লৌবুক্তা কুমলকলগা  লুমদুনা নোংমৈ কাপশিন্দুনা বোম পোকখায়হন্দুনা লেপ্তনা মীচম হাৎলি। মনিপুরসি ইন্দিয়াগী অফগানিস্নঠান ওন্থোক্লি। লোইজিং লোয়াদা মীচম মীয়াম্না নে তাদনা অহিং মিংশেল খাংদুনা য়েকনবগা লান্থেংনরক্লিবসি থাবুম মরি হেল্লক্লবনি। অচুম্বা অশেংবা ৱাফম খরা নেস্নেল মেদিয়াদা ফোংদোক্লুবা আর পি আইগী নেস্নেল সেক্রেটরি মাহেস্বর থৌনাওজমদা এ আরনা লেগেল নোটীস থারকখিবসিমক অমুবা আইন্না কুমশিল্লগা মনিপুরসে ওৎলগে খনবা থৌওংনি হায়নরক্লি মীয়াম্না। শকনাইরবা জর্নেল্লিস্ট ফানজৌবম তরাপোৎনা মহাক্কী লাইরিক “ঐখোয়গী ঈরৈবাক” তা মনিপুরগী হৌজীক থোক্লীবা কাংলুপকি ইরাং অসিগী প্রেদিক্সন কয়া ফোংদোক্লমখি। ইনসরজেন্সিগী ইরাংগী হৌরকফম, কাংলুপ ফুরুপ কয়াগী থোক্লক্লিবা খুৎলাই পায়বশিংগী ইসুশিং, জিও পোলিতিকেল ইসুশিং। মসিনা ওইহল্লকপা য়াবা মনিপুরগী তুংগী লাইবক। পাউখুম কয়া থিরি অমসুং ৱাহং কয়া হংলম্মি। ৱাহংশিং অসিগী মরক্তা অসিমদি য়াম্না নুংঙাইতনা হংলি, “ করিগীনো হৌজিক্কী “লুচিংবশিংনা” অসুক্কী মতিক লিরবা লৈবাক অসিগী মশাগী ওইবা শক্তমদা শীংনরক্লবা ফাওবদা ঙাকথোকপা ঙমদ্রিবা? করিগীনো শেমজিন শাজিনবা পাও শন্দোক্লগা চীংগী ইচীল ইনাও খরনা লৈবাক অসিবু লেপ্পা লৈতনা থুগায়নবা হোৎনরিবা? ৱাহংশিং অসিগী পাওখুম কনানা পীগনি।” (লাঃ ৪৯) ঙসি মনিপুরগী মীয়ামনা পাউখুম ফংদ্রবা ৱাহং কয়ানি হংনরক্লিবা। অমরোমদা মীয়াম্না ইতৎ তত্তনা হংনিংলিবদি, পাল্লিবা লৈঙাক অসিনা কনাবুনো ঙাইরিবসি।  শান্তি হঞ্জিল্লকনবনি হায়দুনা সেন্তরগী য়াকা য়েংদুনা মীতোপ্না অসুম ৱায়েনদুনা নখোয় অদু তৌ, অদু তৌগনু, দেল্লীদা লাকউ, অসিদা ফম্মু, অদু থিংজিল্লু, মীদু মচিন মেনশিল্লু, বফর জোণ খায়দোকসি, চীংদা ঐনা য়েংশিল্লগে, তম্না নঙনা য়েংশিল্লু হায়দুনা  ইপু ইবেন্না ঙাকলম্বা “চীংলৈবাক্কি ঈমা মনিপুর” গী ঙমখৈদা শিংচেপ মথং মথং থাজিনখিবা তারিবরা?  মনিপুরগী অপুনবগী শক্তম কায়বা য়ারোই হায়না খোল্লাউ কয়া লাওরিবশিংদা মোব বোম কাপশিনখিগদৌরিব্রা? কৌব্রু লাইফম্লেনগী চীংদোল তেমথোক্লগা পোপি ফার্ম ওন্থোকপদা ঐখোয় য়েংদুনা পাংদবা অমগুম্না লৈখিসিরা? থাংজিং চীংশাংনা কুকিলেন্দ শেম্বদা খোপচিনখিবদা বফর জোননি চংবা য়াদে হায়দুনা খা চিক্লগা অদুমক ইম্ফাল ময়োলদা মথংগী মীখলদা মায় পাকলগা মীনিস্তর ওইখিগে খল্লিব্রা লুচীংবা মিংথোল পামজরিবশিংনা। ৱাহং চাম্ম চাম্মানি ঙসি হৌরক্লিবা মীরোল হংলিবা। পাউখুম চাম্মা চাম্মা পীনবা, থবকনা উৎনবা, ইমা লৈবাক মনিপুরগীদমক ঐখোয় লৈরি হায়না থৌনা লৈনা থম্মোয় শেংনা চোংথোক্লকপা মতম থেংমনদ্রিবরা? ঐখোয়না লৈঙাকচদুনা য়াইফবা তুংগী মনিপুর অমগী লম্বী শেম্বা ঙমখিরোইদ্রা ঙসিগী মীরোলনা?    

ৱারেপ অমসুং লৈঙাক  

ইরৈবাক নুংশিবনা থুমহৎখিদুনা

ৱারেপ্না লেপ পৌ থুম্লে লৌরিবা লূপশিংনা

ফক্লাংদা থেৎপা নাকোংনদি তাশিন্নদে,

উচি ময়ামগী ৱারেপ ওইদুনা লৈরে ঙসি।

হাঙোইনা ফমলি মরুম কোক্লদুনা

ঈশিং কংলবা লাইজ কোমদা।

হৌদোং লম্বোইবনা কৈথেল কারি দেল্লীদা

খৌগংনরি নোংজু মরক্তা

তংদু লৈতাবা কৌরৌ অমা মীয়াম্না!