ইম্ফাল, আগস্ট ২০ : মীতৈলোল অসি মীতৈ খক্তগী নত্তে, মণিপুরদা লৈমিন্নরিবা পূম্নমক্কীনি হায়না অদুঙৈ কুমজা ১৯৯২দা মণিপুরী লোলনা লৈবাক অসিগী ৮ শুবা সেদ্যুলদা চনখিবগী চহি ৩২রক শুরকপগী ‘মণিপুরী লেংগ্বেজ দে’ গী থৌরমদা থৌরম অসিগী সেলেব্রেসন কম্মিটিগী কনভিনর লৈহাওথাবম সরতচন্দ্রনা ফোঙদোকখ্রে।

মহৌশাগুম্না ঙসিসু মণিপুরী লেংগ্বেজ দে ষ্টেট লেভেল সেলেব্রেসন কম্মিটিনা শিন্দুনা থৌরম অসি ইবোয়াইমা লীলা শঙলেন্দা পাঙথোকখিবদা মহাক্না নুংগী ওইবা ৱারোল পীরদুনা হায়, মণিপুরী লোল অসি ক্লাসিকেল লেংগ্বেজগী মনুং চন্নবা হৌজিক অকনবা প্রোসেস চত্থরি।  লোল অসি য়াম্না মতিক চারবা লোল অমনি। করিগুম্বা ক্লাসিকেল লেঙগ্বেজ ওইরক্লবদি হেন্না নুংঙাইগদৌরিবনি। 

ঐখোয়না মণিপুরী লোল চাওখৎহন্নবা হোৎনরি অদুবু মীয়াম্নদি পেন্নদ্রিবনি। চীংগী দিষ্ট্রিক্টশিংদসু লোল অসি পাক শন্না তমহন্নবা হোৎনগদবনি। থবক অসি পায়খৎলুবদা অপনবা মায়োক্নরক্কদ্রা হায়বগী মীপাইবদি লৈ অদুবু লোল অমসুং ময়েক হায়বসিদি খঙদবা য়াদে। মমা মপানা মচা কোন্দুনা য়োক্লকপগুম্না ঐখোয়না লোল অমসুং ময়েক য়োক্কদবনি। চীংগী লোলসু ঐখোয়না খঙগদবনি। তৌবদবু ইমালোল নুংশিবা হায়বসিমদি মথৌ তাই। ইমালোলবু ঐখোয়না ঙাঙদনা কনানা ঙাঙগেদৌরিবনো হায়বসি কাউথোক্লোইদবনি।

থৌরমগী মীফমলোই ওইখিবা নহারোল সাহিত্য প্রেমি সম্মিটিগী প্রেসিদেন্ট নাওরোইবম ইন্দ্রমনিনা হায়, চুম্নতগী মীতৈ খক্তনা লোল অসি ঙাঙবা নত্তে। চীংগী ফুরুপশিংগীসু অমগা অমগগী মরক্তা ফাওনলোল ওইরিবনি অমসুং ষ্টেট লেঙগ্বেজনি। হৌজিক্তি লোল অসি ইন্টারনেসনেল লেঙগ্বেজ ওইরক্লবনি। ম্যান্মার, বাংলাদেশ য়াওনা লৈবাক অসিগী ষ্টেটশিং ওইরিবা ত্রিপুরা অমসুং আসামনচিংবদসু ঙাঙনরিবনি হায়খি।

ঙসিগী থৌরমদা মণিপুর সাহিত্য পরিষদকী প্রেসিদেন্ট এল জয়চন্দ্র, কলচারেল ফোরাম মণিপুরগী প্রেসিদেন্ট ঐচ বিহারি, মণিপুর ষ্টেট শুমাং লীলা কাউন্সিলগী লাইফ টাইম প্রেসিদেন্ট পি ঐচ গুনচন্দ্র, ফিল্ম ফোরাম মণিপুরগী চেয়ারম্যান এল সূর্যকান্ত অমসুং রাইটারস য়ুনিয়ন ইম্ফালগী প্রেসিদেন্ট সৈয়দ আহম্মদসু শরুক য়াখি।

সোর্স: হুইয়েন লানপাও