• 112
• ১০ই অক্টোবর ২০২৫ ইং
• Share on:

মণিপুরী শৈরেংগী নুমিৎ পাঙথোকখে

অশৈবা অনী-ৱাই ইবোমচা অমসুং লানবোন কবুই ইকায়খুন্নখে

ইম্ফাল, ওক্তোবর ৭ঃ ফিক্সন এন্দ পোইত্রি ক্লব, মণিপুরনা শীন্দুনা ঙসি নুংথিল পূং ১ তাবদা কৈশাম্পাৎতা লৈবা স্তেত সেন্ত্রেল লাইব্রেরিগী ওদিতোরিয়মদা মণিপুরী শৈরেংগী নুমিৎ ২০২৫ পাঙথোকখে।

থৌরম অদুদা মণিপুরী সাহিত্য পরিষদ ইম্ফালগী প্রসিদেন্ত লোংজম জয়চন্দ্রনা চীফ গেস্ত, মণিপুরী লেংগ্বেজ এদভাইজরি বোর্দ, সাহিত্য একাদেমিগী হান্নগী কনভেনর নোংমাইথেম কিরনকুমার, প্রোফেসার এসঐচ শান্তিবালা, প্রিন্সিপাল এনজি কলেজনা গেস্ত ওব ওনর অমদি ফিক্সন এন্দ পোইত্রি ক্লব মণিপুরগী প্রসিদেন্ত থৌদাম নেত্রজিৎনা প্রসিদেন্ত ওইখি।

ঙসিগী থৌরম অদুদা লাইওইখ্রবা মণিপুরী লোলগী অশৈবশিংগী মফমদা ইকায় খুম্নবা উৎপা, ক্লব অসিনা থা ৬। ৬ লৈরগা পুথোকপা মপাও-২৩ শুবা মশিং ফোঙবা, ফিক্সন এন্দ পোইত্রি ক্লব, মণিপুরগী ৱেবসাইত হাংদোকপা অমদি মণিপুরগী শক্নাইরবা অশৈবা অনী- য়ুম্লেম্বম ইবোমচা অমদি লানবোন কবুইবু ইকায় খুম্নবা উৎপা, মশিং য়াম্নবা অইবা কয়ানা শৈরেং পাথোকপনা মপূং ওইবা থৌরমশিং ওইখি।

ফিক্সন এন্দ পোইত্রি ক্লবকী সেক্রেতরি লেনিন খুমনচানা থৌরম অদুদা হায়, চহী খুদীংগী মেরাগী থানিলদা পাঙথোক্লিবা 'মণিপুরী শৈরেংগী নুমিৎ ইহান হানবা ওইনা কুমজা ২০১৭, মহাকবি হিজম অঙাং হলগী ১২৫শুবা মপোক কুমওন চহী অসিদগী হৌদোরকখিবনি। হৌদোকপা চহী অসিদা ইম্ফাল অমসুং লক্ষিপুর (আসাম) দা মায় পাক্না পাঙথোকখি।

মসিগী মখা তারকপা চহীশিং হায়বদি কুমজা ২০১৮ দগী থৌরম অসি জিরিবাম, ককচীং য়াওনা মণিপুরগী তোঙান তোঙানবা মফমশিং দা সাহিত্যগী লুপশিংনা পাঙথোক্তুনা লাক্লি। ইন্দিয়াগী তোঙান তোঙানবা মফমশিং খুদম ওইনা নিউ দিল্লী,গুৱাহাতি, কোলকাতা, লক্ষিপুর, অগরতালা, দিমাপুরনচিংবদসু পাঙথোকখে। কানাদাদা লৈরিবা মণিপুরীশিংনসু মখোয়না ঙমজবা থাক, মওংদা পাঙথোকপীদুনা

মণিপুরী তাবা মালেমগী মফমশিং ফাওবা শন্দোকপখ্রবা থৌরম অমসু ওইরবনি হায়না ফোঙদোকখি। মহাক্লা মখা তানা, ঐখোয়গী লাই ওইখবা অশৈবশিংনা
শেমগৎপীরম্বা মণিপুরী শৈরেংগী শাংলবা লীক্লম অমা লৈজরি। অদুবু, ঙসিগী মালেমগী শৈরেংগী ফস্বাক্তা মশাগী চপ চাবা ফীদা অমা ফংদুনা লৈজরবা ঐখোয়গী শৈরেংগী লীক্লম শৈরেংগী কলা অসি মীয়াম হুপ্না পাম্না  লৌনবগী মহুত্তা কলা অসিদা লুপচবা মীওই খরদংগী ওইদুনা দিকেদ কয়া চথদুনা লাক্লি।

মণিপুরী লোলগী লাইওইখ্রবা অশৈবশিংবু ইকায় খুম্নবা উৎপা, শৈরেংবু থম্মোয়নুংদা ইরাৎপা, মণিপুরী শৈরেংবু মীয়ামগী ওইহন্নবা অমদি মী পূম্বর্গী থাদোক্নবা য়াদ্রবা পুন্সি শরুক অমা ওইহন্নবা পান্দম থম্বগা লোয়ননা মণিপুরী শৈরেংবু মালেমগী ফম্বাক্তা পুখৎনবা হোৎনবা হায়বসিদা মিৎয়েং থমদুনা পাঙথোকপনি হায়নসু যোঙদোকখি।

সোর্স - পোক্নফম