• 464
• ১২ই সেপ্টেম্বর ২০২২ ইং
• Share on:

মণিপুরী লোল ক্লাসিকেল লেঙ্গুয়েজ চন্নবা ওনশিনমিন্নদুনা মায় পাক্নবা হোৎনমিন্নসি: ৱামা

ইম্ফাল, সেপ্টেম্বর ১১ : ঐখোয়গী মাঙদা তাদুনা লৈরিবা মণিপুরী লোলবু ক্লাসিকেল লেঙ্গুয়েজ চন্নবা হোৎনবদা পুম্নমক্না মায় ওনশিনমিন্নদুনা মায় পাক্নবা হোৎনমিন্নসি হায়না ৱাখল্লোন মান্নবা অপূনবা (ৱামা) কংলৈপাক্কী সেক্রেটারি পাব্লিসিটি এম দেবেশ্বরনা থাদোরকপা চেরোল অমনা ফোঙদোরক্লি।

ৱামা কংলৈপাক্না লমদম অসিদা মীয়ামগীদমক তৌরকপা থবক্কী মনুং চন্না মণিপুরী লোল/মীতৈ লোলনা ক্লাসিকেল লেঙ্গুয়েজ চন্ননবা লেঙ্গুয়েজ দিপার্টমেন্টতা মরী লৈনবা চে-চাং খূদিংমক অথুবদা থাবীগদবনি হায়না তক্নদুনা লাকখিবা অদুগী মহয় ওইনা সেপ্টেম্বর ৯দা লেঙ্গুয়েজ দিপার্টমেন্টনা মতম চানা মরী লৈনবা চে-চাং খূদিংমক য়েংশিনবীদুনা মণিপুরগী ইনিংথৌ লৈশেম্বা সনাজাওবা এমপি রাজ্য সভাদা শীন্নবীরকখিবগীদমক লেঙ্গুয়েজ দিপার্টমেন্টকী দিরেক্টর টি ঐচ চিত্রা অমদি ইনিংথৌ লৈশেম্বা সনাজাওবা লোয়ননা মণিপুরগী সী এম বিরেননা অতেনবা মতমগী মনুংদা লোইশিন্নবা অকনবা পাউতাক পীবীখিবা অমদি ক্লাসিকেল লেঙ্গুয়েজ ওইননবা মচাক তাশিন-খোমজিনখিবা ওজাশিং অমদি লেঙ্গুয়েজ কম্মিটিগী ইচিং-ইনাও খূদিংমকপু ৱামাগী থৌমীশিংনা থাগৎপা ফোঙদোকচরি।

ৱামা কংলৈপাক্না লেঙ্গুয়েজ দিপার্টমেন্টকী মথক্তা মতম চানা ইন্দিয়াগী মনুং চন্না মণিপুরী লোল/মীতৈ লোল অসি ক্লাসিকেল লেঙ্গুয়েজ চন্ননবা মতম চানা থবক লৌখৎপীখিদে হায়দুনা মমাঙদা অকনবা ৱাফম কয়া থমখিবা অদু থবকশিং অসি মায় পাক্ননবা হোৎনবদা তঙাইফদনা ৱাফমশিং অদু ফোঙদোকচখিবনি। ঙসিদি মতম চানা চে-চাং খূদিংমক লোইশিনবীদুনা অথুবদা মরী লৈনবা লোয়শঙশিংদা থাননবা তৌরবনিনা মমাঙগী ৱাফমশীং কাউথোক্নদুনা মাঙদা তারদুনা লৈরিবা মণিপুরী লোলবু ক্লাসিকেল লেঙ্গুয়েজ চন্নবা হোৎনবদা ঐখোয় পুম্নমক মায় ওনশিনমিন্নরসি।

লোয়ননা ৱামানা লমদম অসিদা অইবশিংনা পুথোক্লিবা লাইরিকশিং, শুমাং কুহ্মৈ, ফম্বাক কুহ্মৈ অমদি ঈশৈ ময়েক ইরিবশিং অসিনা শীজিন্নরিবা ৱাহৈশিং য়াম্না কুপ্না য়েংশিল্লি। মসিগী মনুং চন্না হৌজিক হৌজিক ইবোয়ইমা শঙলেনদা শান্নরিবা ৫০রক শুবা ওল মণিপুর শুমাং লীলা ফেষ্টিভেল, মণিপুর ষ্টেট কলা একাদেমী অনীনা খুৎশম্নরগা পুন্না শীল্লিবা অসিদা লোলয়ান শীজিন্নবরা হায়দুনা ৱামাগী ইচিল-ইনাও তরারোমনা য়াম্না কুপ্না য়েংশিল্লি।

মসিগীদমক মণিপুর ষ্টেট কলা একাদেমীগী মায়কৈদগী ৱামাদা কমপ্লিমেন্টরি কার্দ পীরকখিবনি। অদুবু হৌজিক্তি শুমাং কুহ্মৈ অয়াম্বা চাদা ৯০ দি লোলয়ান শীজিন্নবগী চাংদি হন্থরে হায়না লৌবা য়ারে। মসিগীদমক ওল মণিপুর শুমাং লীলা কাউন্সিল অমদি মণিপুর ষ্টেট কলা একাদেমীগী ইচিল-ইনাওশিংবু থাগৎপা ফোঙদোকচরি। লোয়ননা অইবশিংনা পুথোক্লিবা লাইরিকশিংদা লোলয়ান য়াওব্রা হায়বদুসু মখা তানা মীৎয়েং চঙবা হৌরগনি। মসিদা মীয়াম্নসু মতেং পাংবীয়ু হায়না চেরোলদুনা মখা তানা ফোঙদোরক্লি।

সোর্স: হুইয়েন লানপাউ