ইম্ফাল, জুলাই ০৮ : হৌজিক হৌজিক মণিপুরদা থোক্লিবা কাঙলুপকী ঈরাংনা তংদু লৈতদ্রবা পুন্সি মহিং অমা লাক্তুনা অৱা-অনা তারবা ইমুংশিংদা ত্রিপুরা মৈতৈ খুন্নাইগী মায়কৈদগী সাহিত্য একাদেমী, নিউ দিল্লীগী মেম্বার খোইস্নাম বিরোলানা লুচিংবা মণিপুরী লিটরেরি এন্দ কালচারেল ফোরাম, ত্রিপুরাগী মীহুৎ মরিগী টিম অমা ইম্ফালদা লাক্তুনা অৱাবা তারবা অমদি অশোক-অপন নংলবা ইমুং কয়াদা শেলগী তেংবাঙ পীখ্রে হায়না ফোরাম অসিগী জেনারেল সেক্রেটারি খোইস্নাম মঙ্গোলনা থাদোরকপা চেরোল অমনা ফোঙদোরক্লি।

ত্রিপুরাদগী লাকপা ফোরামগী টিম অসিনা রিমসতা চৎতুনা ঙরাং ঈরাং অশিদা অশোক-অপন নংলবা লায়েং চত্থরিবশিং য়েংশিন্দুনা মপাও হংখি অমসুং ইবুং-ইপ্বা, ইচে-ইচল ময়ামগীদমক্তা চিরবা মতমসিদা ত্রিপুরাদা ঐখোয় লেপ্লি হায়দুনা মখোয়বু পূক্নিং থৌগৎপীখি। মথংদা রিমসকী হেল্প য়ুনিট টিমদা লায়েংলিবা মীয়ামগী শেলগী তেংবাঙ খুৎশিন্নখি।

ত্রিপুরাদগী টিম অসিনা মণিপুরগী রিলিফ কেম্প কয়াদসু চৎতুনা হকথেংননা য়েংশিনখি অমসুং শেলগী অঙম্বা মতেংসু পাংখি। ত্রিপুরাদগী মণিপুরদা লাক্তুনা লৈখিবা ঈরাং অসিদা ময়ুম-মকৈ মৈনা চাক্তুনা লৈফম চাফম মফম খঙদ্রবা সেরৌ অমদি তোর্বুংগী ইমুং কয়াদসু টিম অসিনা শেলগী মতেং পীখ্রে। ত্রিপুরাগী মীহুৎ মরিগী টিম অসিদা ফোরামগী অচঙবা থৌবু মাইথাম প্রদিপ সিংহ, হিজম ওংবী সরিকা অমসুং এন যমুনা সিংহসু য়াওরি।

ওল মণিপুর য়ুনাইটেদ ক্লাবস ওর্গানাইজেসন (অমুকো) গী প্রেসিদেন্ট ফৈরোইজম নন্দো লুৱাং অমদি মহাক্কী অমুকো টিমনা ফোরামগী তেংবাঙ খোঙচৎ অসিদা অচৌবা মতেং পাংখি। নীংশিংবা য়াবদি, মণিপুরগী অৱা-অনা তারবশিংদা মতেং পাংনবগীদমক ফোরাম অসিনা শেমখিবা মণিপুর তেংবাঙ পুকৈদা ত্রিপুরা মৈতৈ খুন্নাইনা কৎপা শেনফম অদু মণিপুরদা হকথেংননা অৱাবা তারবশিংদা রিলিফ ওইনা য়েন্থোকপনি হায়রি।

সোর্স: হুইয়েন লানপাউ