বংলাদেশকী ভানুবিলদা খিল্লিবা লময়ানবা হিজম ইরাবতকী মীতমদা হৈকৎ লৈকৎ তমদুনা ইকায় খুম্নবা উৎখ্রে
ইম্ফাল, সেপ্টেম্বর ০১ : লময়ানবা হিজম ইরাবত নিংশিং থাবুম হৌদোকপা নুমীৎ ঙসি সেপ্টেম্বর ১ গী অয়ুক পুং ১১ তাবা মতমদা বংলাদেশকী ভানুবিল মীতৈ খুলগী ইন্টিগ্রেটেদ মণিপুরী এসোসিএসন (ইমা) - কমপ্লেক্সতা খিল্লিবা লময়ানবা হিজম ইরাবতকী মীতমদা মণিপুর অমদি বংলাদেশকী - ইরৈচাশিংনা হৈকৎ লৈকৎ তমদুনা লময়ানবা অসিবু ইকায়খুম্নবা উৎখ্রে।
হৈকৎ লৈকৎ তম্বা অদুদা মীতৈ ইরোল ইয়েক লোইনশিল্লোন অপুনবা লুপ (মীলাল) কংলৈপাক্কী লুচিংপুরেল নাওরেম নোংমাইলেম্বী, থৌপুরেল পাওনম ইবোমচা, এদুকেসন সেক্রেটরি মাইবম ইন্দজিৎ, পেত্রিওতিক রাইটর্স ফোরম মণিপুরগী সেক্রেটরি রাকেস নাওরেম, ইরাবতকী লেন্দ দোনর কৈশাম মঙ্গোলজাও, ইমা কমপ্লেক্সকী জেনরেল সেক্রেটরি লৈচোম্বম রাজকুমার অমদি কমপ্লেক্স অসিগী লাইব্রেরিয়ান থাংজম নোবিননচিংবা শক্নাইরবা মীওইশিং শরুক য়াখি।
হৈকৎ লৈকৎ তম্বগী থৌরম অদুগা মরি লৈননা মীলালগী লুচিংপুরেল নোংমাইলেম্বীনা হায়খিবদা, বংলাদেশকী ইরৈচাশিংগী মফমদা মীতৈ ময়েক তন্বীবা লাক্লিবা মীলালগী থৌমীশিংনা ঙসি অসি লময়ানবা হিজম ইরাবতকী নিংশিং থাবুম হৌদোকপা নুমীৎ অসিদা লময়ানবা অসিগী মফমদা হৈকৎ লৈকৎ তমদুনা ইকায়খুম্নবা উৎপা ফংবসি য়াম্না নুঙাইবা ফাওই। বংলাদেশতা খুন্দারিবা ইরৈচাশিংনা নুমীৎ ১০ নি চুপ্পা মণিপুরী কলচরেল কমপ্লেক্সতা চত্থগদৌরিবা মীতৈ ময়েক তন্বীবগী থৌরম অসিদা ইরৈচাশিংনা - শুকশোই শোইদনা শরুক য়াদুনা ঐখোয়গী ইয়েক অসিবু ইবা পাবা হৈনবা হোৎনমিন্নসি হায়খি। থৌরম অদুদা শরুক য়াখিবা মীলালগী সেক্রেটরি পাওনম ইন্দজিৎনা হায়খিবদা, লময়ানবা হিজম ইরাবতকী মীতম অমা বংলাদেশকী ভানুবিলদা খিল্লম্বা অসি উবদা পুক্লিংদা নুংশিবা ফাওই। মণিপুরগী হিরম কয়াদা লমজিংবীরম্বা ঐখোয়গী লময়ানবা ইরাবতকী মীতম অসিদা মীলালগী থৌমীশিং অমদি পেত্রিওটিক রাইটস ফোরম মণিপুরগী থৌমীশিংনা হৈকৎ লৈকৎ তমদুনা ইকায়খুম্নবা ফংজবসি য়াম্না চাওথোকপা ফাওই। বংলাদেশকী পুৱারিদা ইহান হানবা ওইনা মীতৈ ময়েক তন্বীবা লাকপগী খোঙচৎ অসিগী মনুং চন্না লময়ানবা হিজম ইরাবতকী মীতম অসিদা হৈ লৈ কৎপা ফংবসি থোইদোক্লা অপেনবা পোকই হায়খি।
বংলাদেস খোঙচৎ অসিগী লুচিংবসু ওইরিবা পেত্রিওটিক রাইটর্স ফোরম মণিপুরগী সেক্রেটরি রাকেস নাওরেমনা ৱাফম কয়া ফোঙদোক্লদুনা হায়, বাংলাদেশকী ভানুবিল মীতৈ খুল অসিদা লময়ানবা হিজম ইরাবতকী মীতম অমা কুমজা ২০০৬ কী সেপ্টেম্বর ৩০ দা মণিপুরগী ফাদর ওফ সোসিএল ৱার্কর হায়না থোইদোক্বা শিংথানরিবা লাইওইখুবা থৌনাওজম ইবোয়াইমনা লুচিংদুনা পুরক্লগা খিল্লম্বা অসিমক্না বংলাদেসকী মরু ওইনা নহাশিংদা ইরৈবাক ইরমদম নুংশিবগী ইনোৎ অমা পিদুনা লাক্লি। চহি ২০ মপুং ফাজিল্লুক্লবা মীতম অসিগী শক্তম অসি মচু খরা কোকথরক্লিবসি রিপেইন্ট তৌবগী তঙাইফদবা লৈরে। ঐখোয়গী লময়ানব অসিবু ঐখোয়না ইকায় খুম্নবগা লোয়ননা লময়ানবনা পামজরম্বা অপুনবা অমদি মান্নবা খুন্নাই শেম্বগী ৱাখল্লোন অদু ঙসিগী মীরোল অসিনা শাগৎমিন্নরসি হায়খি।
মহাক্লা মখা তানা হায়খিবদা, লময়ানবা হিজম ইরাবত ফারগা জেলদা থমখিবা মফমসি বংলাদেসকী সিলেট সেন্ট্রেল জেলদনি। লোয়ননা মহাক্না জোন্সতোন স্কুলদগী ক্লাস ৫ তন্নম্নগা মখা লাইরিক তমথখিবা স্কুল অসিসু বংলাদেসকী ঢাকাদা লৈবা পোগোস স্কুলদনি। লময়ানবা হিজম ইরাবতকী পুন্সিগা বংলাদেশকা তৎনা থানবা য়াদ্রবা মরি অমা লৈনরি। বংলাদেশকী মীতৈ খুল কয়াদা লময়ানবা হিজম ইরাবতনা লৈরম্বগী পুৱারিসু লৈরি। তশেংনমক বংলাদেশকী পুৱারি য়াওদনা লময়ানবা ইন হিজম ইরাতবকী পুন্সি ৱারি শাগৎপদা মপুং খক ফারোই। মরম অসিনা ঙসি সেপ্টেম্বরগী চৈচৎ ১ লময়ানবা ইরাবত নিংশিং থাবুম্না লাকপা অসিদা বাংলাদেশকী ভানুবিলদা খিল্লিবা লময়ানবা হিজম ইরাতবকী মীতমদা হৈকৎ লৈকৎ তমদুনা লময়ানবা অসিগী মফমদা ইকায় খুম্নবা উৎপনি হায়খি।
সোর্স - পান্দম
0 কমেন্ট:
কমেন্ট তৌবিয়ু