পুন্সিগী মঙ, মহৌশা, মালেমগী মরাইবক অমসুং খুনাইগী শক্তম কয়া য়েক্লিবা শৈরেং লাইরিক “অতিয়াগী ময়া”- মীয়েং অমা
লৌউ শিংউ তৌদুনা চম্না হিংনরম্বা পুন্সি মরেল অদুগা ঙসিগী খূনাই অসিনা হৌজীক হিংনরিবা পুন্সি মহিং অসিগদি অঙকপা ফংনা খেন্নরে। সহর অমসুং খুঙ্গং হায়বগী খেন্নববু লৈশিল্লকত্রে। অদুনা অশেংবা মীওইবগী থম্মোয়গী মশক অদুদি থিবদা য়াম্না ৱানা থোকলরে। পুন্সিবু কবিনা শীনাং ওইনা চাংদম্নরি। লিৎলিবা ফুরিৎ অসিনা শক্তম অদুনি অদুবু মসি মতৎ মতৎ তৎলগা মাংখিবা অমদি মসিদা শিজিন্নরিবা অকায়বা চফু মচেৎকি ইমেজরি অসিনা পেন্তিং অমগুম্না উহল্লি লায়রবা মশাগী করিসু লৈত্রবা চাদৎনরবা মীওই অমগী মশক অমা।
অইবাঃ থৱান
লাইরিক্কী মমিং- অতিয়াগী ময়া(২০১৮)
অফোঙবা- বুক্স এন্দ কোফি
লাইরিক্কী মখলঃ শৈরেং
লমায় মশিং-৮৭/ লাইরিক্কী মমলঃ লুপা ২৫০/-
লাইরিক্কী মখূম অমদি দিজাইন্দ-তিংথৌনু অমসুং রহুল লাইশ্রম
পুন্সি হায়বসি অঙকপনা পিক থল্লি। কনা অমত্তনসু খঙবা ঙমদ্রি মীওইবনা মালেমসিদা পোক্লকলিবা হিংলিবা অদুগা অমুক শিরিবগী মরম। পোকপা শিবা অনীগী লাংদাইদা থেংনরিবা পুন্সিগী থৌদোকশিংনা মীওইবদা পারা কয়া তম্বীরি। অচৌবা অমদি অপিকপা পুন্সি খুদিংমকনা মঙ মঙলি। লোয়বসু নাইদে মীওইবগী অনীংবা অপাম্বদি। পান্দম অমা ফংনবা হোৎনবদা পাম্বৈ অমা শিজিন্নদুনা থবক কয়া পাঙথোক্লি। খ্বাইদগী অফবদগী হৌরগা খ্বাইদগী ফত্তবা মাং তাকনিংঙাই ওইবা থৌশিল থৌরাং ফাওবা তৌনরি। লৈবাক অমগা লৈবাক অমগা, য়ুম্লোন্নবশিং, নুংশিরবা মচিল মনাও ফাওবা তাইবঙ য়ুম্বাল লম্বীদা খোঙদারবা মতুংদা মাগী মাগী হায়দুনা শম্বল খানবা মিৎনা উরি নাকোংনা তানরি। শক্তি লৈবা লৈবাক মসেল মরক্তা ন্যুক্লিয়ার খুৎলাই পৈশিন্নবা তান্নবা, মহৌশাগী খোনি কয়া মুন্নবা, কেপিতাল্লিস্ট ইকোনোমিদা হেন্না লুপশিন্দুনা লায়রবনা অসুম্না হৌগৎপা ঙমদনা লৈহৌবা অদুগা ইনাকখুনবনা অসুম চীংগুম্না ৱাংখিবা। অসিগুম্বা হৌজীক মতমগী পুন্সি মরেল অসিদা থেংনরুবা থৌদোকশিংনা ইথিল পিদুনা থাৱানসু শৈরেং কয়া ইরক্লি। মহাক্কী শৈরেংশিং অয়াম্বদা তারিবা মমি অসিমক মতমগী খুনাই অসিনা পীবা ইথিলশিংননি। পুন্সি লম্বীদা খুদি থিদ্রিবশিংনদি ৱাহং হংনদে অদুবু মৈশা মৈরিলক্তা হীংলীবা পুন্সি কয়ানদি পাউখুমদি ৱানা ফংলগদবা ৱাহংশিং হংলি। তোরৈ তুথেক নাইবা পুন্সি ঈচেলদি চেন্থদুনা অদুম চৎলি। ৱারবসু অৱাবগী ঈচেল অদুগা নুংঙাইবসু নুংঙাইবগী ঈচেল অমদা পুম্নমক তাউথমিন্নরি। অসিগুম্বা ফিভম অসিবু কবিনা মহাক্কি শৈরেং “তাউথমিন্নরি শীংনাং ওইনা খুৎশম্নদুনা” হায়বসিদা অসুম্না ইরি, “মচু কয়াগী কুরাকশিং পাইথোকরকই/ মতৎ মতৎ তৎলবা ঐগী ফুরিৎ মাঙখি/ অকায়বা চফু মচেৎশিংগী মরক্তা/ মপুং ফাদ্রবা ঐগী শক্তম/ মচেৎ মচেৎ/ মচেৎ মচেৎ…/ অসুক থীনা মম্লবা কা মনুংসিদা ইমি থিরি/ লংত্রিক লংলবা হৌদোং অমুবীগী মমিৎনা চিংশিল্লকই/ তাউথমিন্নরি শীংনাং ওইনা খূৎশম্নদুনা” (লাঃ ৩)
লৌউ শিংউ তৌদুনা চম্না হিংনরম্বা পুন্সি মরেল অদুগা ঙসিগী খূনাই অসিনা হৌজীক হিংনরিবা পুন্সি মহিং অসিগদি অঙকপা ফংনা খেন্নরে। সহর অমসুং খুঙ্গং হায়বগী খেন্নববু লৈশিল্লকত্রে। অদুনা অশেংবা মীওইবগী থম্মোয়গী মশক অদুদি থিবদা য়াম্না ৱানা থোকলরে। পুন্সিবু কবিনা শীনাং ওইনা চাংদম্নরি। লিৎলিবা ফুরিৎ অসিনা শক্তম অদুনি অদুবু মসি মতৎ মতৎ তৎলগা মাংখিবা অমদি মসিদা শিজিন্নরিবা অকায়বা চফু মচেৎকি ইমেজরি অসিনা পেন্তিং অমগুম্না উহল্লি লায়রবা মশাগী করিসু লৈত্রবা চাদৎনরবা মীওই অমগী মশক অমা। শুকনা মম্লবা কা অমদা কবিনা মহাক মশাগী মমি থিনবা হোৎনরি। মসিদা শিজিন্নরিবা অমম্বগী ইমেজরি অসিনা ফোঙদোকনিংলিবসি হীরম খুদিংদা অমোৎপনা থল্লবা, রাজনিতিগী অখুবা শারৌ লাংদা ইমা লৈবাকনা হঞ্জিন হঞ্জিন অৱাফমদা তাদুনা লৈরিবা শক্তম অদু য়েকনবা হোৎনবনি হায়না খল্লি। অদুগা হৌদোক অমুবীগী লংত্রিক লংবা মমিৎনা চিংশিল্লকই হায়না কবিনা হায়নিংলিবসি লৈরিবা লৈঙাক্কি চৎনরিবা সিস্তেম অসিনা ফনা অফবা তৌনিংলবসু খ্বাইদগী অম্বা কাদা অমুক হৌদোং অমুবীগী মমিৎনা চিংশিল্লি হায়বসিদা ফোংদোকলিবসি ৱাহন্থোক কয়া লৈখ্রে। চংখোল্লবা ইমেজরি অমনি হায়না লৌদবা ঙমদে। অসিগুম্বা ইমেজরিশিং অসি ওইরিবা মীওইবগী হৌজীক্কি খুনাই অসিনা হীংলিবা ঙসিগী মীরোলদা মরু ওইনা য়াম্না সেন্সিতিভ ওইবা কবি, আর্তিস্ট অমদি লাই য়েকপশিংদা পীবা ইথিল অদুনি। মালেমগী অনীশুবা লাঞ্জাও মতুংদগীদি মীওইবগী সাভ্যতাদা চাওরবা শাফু কয়া পীবা হৌখি। কোল্ড ৱারগী মুকনবা, খুৎলাই অমদি ময়াই কাবা নিশাদা লাইচূবা হেনগৎলকপা, ইন্দস্ত্রেলাইজেসনগী লাক্লিবা অঙকপা অহোংবশিং, কেমিকেল ৱারফেয়ারগী অকিবা, তেরোরিস্তশিংগী অকিবা, ক্লাইমেট চেঞ্জনা পীরিবা অকিবা ফংবা অহোংবশিং অসিদা নে তানা হিংবদি ঙম্নরকতে মসিদা য়াম্না চনৈনবা উফুল থাংবা শক্তম অদু মঙ হাগুম্না কবিনা য়েক্লি। তেংথারি।
হকচাংসি শিন্দোকনীংবা ফাওরকই-১
“লাপ্না উবা লম্বী মচাশিংগী মপান্দা হৌবা লফু পাম্বীগী মনা নুংশিৎ শিৎপদা তৎপগী মখোল তারি…অমনবা য়ূমশিংনা নুংশিৎ কন্না শিৎপদা থোকপা মখোলনা য়ূমদা তূমদুনা লৈবা অহলশিং হৌদোকই…ষণনাওশিংনা পৈদুনা লৈবা চরুদা ৱাইশিন্দুনা শান্নরগা খোত্তুনা চরু চারি। অহল অমা থোরক্লগা চৈনা কন্দুনা তাল্লি” (লাঃ৭১)
পেন পিকচর য়েকপদা অমদি প্রোজ পোইত্রিদা হেন্না খুৎলোইবা অমদি কবি অসিগী শৈরেং উরি। মিংথোল পিবা অমদি শিজিন্নরিবা মৈতৈলোন অসি ফোংদোকনিংলিবা অসিগা চাশিন্নদুনা চৎপা থেংনৈ। করিগুম্বদা হেক হেক খল্লি মীওইবনা অমুক শিরুগা হল্লকপা য়ারদি হায়না। অদুগা অমুকসু লাপ্না তাম্না মী তাদবা লমদম অমদা চৎতুনা লৈনিংবা ফাওরকই। মরমদি হৌজীক হিংনরিবা পুন্সি মহিং অসি হিংবদা য়াম্না তনবা ফাওরকপা মতাং অদু লাক্লে হায়না কবিনা খল্লি। হেন্না খঙজিন উশিল্লিবগী মতিক হেন্না ৱাখল থোক্তবা মতাং কয়া ফাওরক্লি। মরক অসিদা মহৌশা মালেমদি মহাক্কি লেংফদ্রবা খোঙচৎ অমদা অদুমক চৎলি। মসিদা অকায়বা পীরিবা খোঙচৎ অসিবু খুদোংচাদবা কয়া থোকহল্লিবা মীওইবদা ৱাহং হংনিংলি। পাউখুম লৈতবা চমম্নবা তাংককশিংনা অনৌবা হকচাং অমা শিন্দোকপা পাম্লক্লি কবিনা। অসিগুম্বা লৈতাফম খঙদবা, তৌফম খঙদবা ফিভম অসিমকসু হীংলিবা পুন্সি মহিং অসিনা পিবা শাফূ অদুননি হায়বদা লাল্লোই।
“লাইথি, লায়রবা, শেম্ফু”
“লাইথিনা শাবা লায়রবগী পুন্সি
লাইথিনা শাবা শেম্ফু কয়া কৈথেলদা য়োল্লি। লায়রবশিংনা/ লৈশিল্লি শেল তুংশিন্নবা অনৌবা পুন্সি অমা শানবা সনাগী।/ নুংশা মঙালনা সনা মতুম অমদা য়ৈবদা থক্তোরকপা মঙালশিংনা মীৎলু মনুংদা মকোল শানবা হোৎনরি মীৎকুপ খরগী। নোং মংবদা মঙালশিংনা মাঙখি সনাগী মচুসু অমুবনা কুপশিল্লি। সনাগা অচোৎপা নূং অসিগা করিসু খেন্নদনা উরি।/ মখোল থোকনা চেন্থরকপা ঈচেলনা ঈশং কারবা তূমদুনা লৈবা নূংজাও মতুমশিংবু হৌদোকই নোমদুনা নপশিন্দুনা মশা পূম্বদা।/ অয়ূক নুংথিল নুমিদাং লেপ্তনা।/ লম্বীদা কোয়চায় চায়দুনা লৈবা নূংদুম মচা কয়া খুল্লি। খাও অমমম পায়দুনা অঙাং মচা মফী শেৎতবা কয়ানা। মখোয়না শান্নরি চাকথেক্লবা কালেনগী মৈশা মরকসিদা নূং খুনবা য়াম্বা তান্নবা। অঙাংশিংসিগী মমাশিংনা হরাউনা য়েংলি মচাশিংনা চাক লাম্বা খঙদনা নুংঙাইনা শান্নমিন্নবা” (লাঃ ৫৯)
শৈরেং অসিদা কবিনা ইরিবা খুৎই অসি প্রোজনি। মসি শৈরেং ওইনা পাবসু য়াগনি অদুগা প্রোজ অমগুম্না লৌবসু। শৈরেংগী লৈশি লৈথোনা অদুগা থোৎপা মেংবা খ্বাইদগী ফজবা ৱাহৈশিংনা ৱাহন্থোক কয়া ফুমদুনা ইবগী খূৎই মখল অদুদি নত্তে। তৌইগুম্বসু ইরিবা অসিনা অপাবশিংদা অয়েকপা লাই অমা য়েংবদা মচু মখল কয়াগী কম্পোজিসন্না শক্তম অমা থোকলকপদুনি। পেন্তিং অমসুং আর্টকি ওইবা ইহৌশিং খোঙচৎশিংগা ইরোইনদুনা কবিশিংসু ৱাহৈগী মেদিয়মদা অসিগুম্বা মখলগী শৈরেং ইনরক্লি।
শৈরেং অসিগী মিংথোল অমদি কন্তেন্ট অসি পাবদা অদুমক ফাওগনি। লায়রবা হায়বসে লাইথি অমগুম্না। শেনফু অদু য়াওদ্রবদি হংলাই ওই পুন্সি হায়বসি। য়েংবীয়ু ঙসি ঐখোয়গী লৈঙাক। হংলাই অমদি লাইথি ময়াম্না চেল্লিবা চোংলীবা। শেম্ফূসি কৈথেলদা য়োল্লিবসিগী ইমেজরিসিনি য়াম্না ফজরিবসি। অদুসু লাইথীনা শাবা। নূং খুনবা য়াম্বা তান্নরিবা শক্তম, চাক লাম্বা খঙদনা শান্নরিবা অঙাংশিংগী সিম্বোল। ৱাখল য়াম্না খলহল্লি।
অতিয়াগী ময়া
“অশংবা ফক্লাংদগী অকংবা উনা কয়া কেল্লকই। পুপ পুপ। অদুগা নূংদুম ওল্লি।/ কা অসিগী মনুংদগী উখি নুমিৎ থা থৱান্মীচাক অচোৎপা লৈচিলগী ফিজঙ ফাওদোক্তুনা। মুসুক মুরম্বা মমি খূদিংমক ঙৌথোরকই। লংখৎলকই মীৎ থকহল্লি।/ মীৎ উইশিন্দুনা চীং কাখি খূৎশম্নরগা। মীৎ পাঙথোরকপদা লম্মৈণা চাকথেকখ্রবা কাথেক্লবা চীংদোন অমদা লৈরম্মী। খূৎনা লামদুনা কাথেক্লবা অতিয়াবু শেগায়রুবদা খঙচিক চিক্লকই”
মঙ হাগুম্না মহৌশা মালেম অমসুং মীওইবগী হৌজীক ওইরিবা হীংলিবা ফিভম অমা সরেলিজমগী খূফোঙদোক্তা য়েক্লি শৈরেং অসি। হেক পাবদা করি হায়রিবনো হায়বা চপা চানাদি খঙলোই অদুবু ৱাহৈশিং অসি অমা অনী চিংথোক্লগা তোঙান্না য়েংবদদি থোক্লক্কনি কবিনা করি হায়নিংলিবা হায়বদু। শৈরেং অসিদা শিজিন্নরিবা অশংবা ফক্লাং অসিমক মালেম অমদি মহৌশা অসি ওইগনি। অদুগা কেল্লিবা উনা অকংবা অমদি মসিনা অমুক নূং ওল্লিবা অসি নেচরেল সাইকল অদুনি হায়না লৌবা য়াই। মরমদি পুম্নমক মালেম অসিদগী হৌদুনা মালেম অসিদা অমুক তিনখিবা ঙাক্তনি। অসিগুম্বা সাইকল অসিদা কবিনা পুকনি লুপশিন্না মঙ অমদা হিহোল্লূরি। মসিদা লম্মৈনা চাকপদা কাথেক্লবা চীং অসি মীওইবগী ফজরবা সভ্যতা অমদি নীংথিজরবা মালেম অসি খুৎশেম্না ওইহল্লিবা অমাং অতা কয়া অসিনা মালেম অসি খাঙবা ঙমদ্রবা অদুগা পুবা ৱারবা ফিভম অদু য়েকপনি অদুগা অতিয়াগী ময়ানা খংচিক চিক্লকপা অসিদা মিকপ খঙথোক থোকপবু সিম্বোলাইজ তৌবনি হায়না লৌবা য়াই।
থৱান, শিংজামৈদা পোকখি। মনিপুর য়ুনিভর্সিতিদগী এমঃ এঃ ফিলোসোফি লোয়শিনখি। কেক্রু হায়বা শৈরেং থৌরম অমা হৌদোকপদা মাংজিল থানা থবক তৌদুনা লাক্লি। নহা কবি কয়া অসিগুম্বা প্লেটফোর্ম অমদা পুকনিং চিংশিল্লি। অতিংকোক অমসুং নূং-পান হায়না খঙনবা ঈশৈগী লূপ অসিদসু ঈশৈ অমদি ম্যুজিক খুদোল তমদুনা লাক্লি। লাইরিক অসিদা পুন্না শৈরেং ৫০ য়াওরি। পাবদা নুংঙাইরবা অমদি ফজরবা মখলগী শৈরেং অমদি ওইরি। মতুংদা শৈরেং কয়াসু ইরক্কনি হায়না থাজবা লৈ।
0 কমেন্ট:
কমেন্ট তৌবিয়ু