পান্থোই চনুনা ইন্দিয়াগী অহানবা ফুটবোল্লর ওইনা ওষ্ট্রেলিয়ন লীগতা শরুক য়ারগনি
ইম্ফাল, মার্চ ৩০ : ওষ্ট্রেলিয়ানা য়ূম্বু ওইদুনা পাঙথোক্কদৌরিবা সাউথ ওষ্ট্রেলিয়ন উইমেন্স নেসনেল প্লেয়ার লীগকী ফ্রেঞ্চাইস অমা ওইরিবা মেট্রো য়ুনাইটেদ দব্লিয়ু এফ সীগা ইন্দিয়ান নেসনেল টিমগী হৌজিক-হৌজিক গোলকীপর ওইরিবী মণিপুরগী পান্থোই চনুগা খূৎয়েক পীনখিবগা লোয়ননা ওষ্ট্রেলিয়ন লীগতা শরুক য়াবা অহানবা ইন্দিয়ন ফুটবোল্লর পান্থোই চনুনা ওইরে।
পান্থোই চনু হৌজিক-হৌজক ইন্দিয়ন নেসনেল টিমগী গোলকীপর ওইনা লৈরি। হন্দক্তা টর্কিদা কোসোভো অমসুং হোংকোংগী মায়োক্তা ইন্দিয়ানা শান্নখিবা টেচশিংদা গোলকীপর ওইনা পান্থোইনা মহাক্কী হৈ-শিংবশিং মালেমগী মীয়াম মমাংদা উত্থোকপা ঙমখি। মহাক্কী হৈ-শিংবশিং অদু উরুবদা ওষ্ট্রেলিয়াগী মেট্রো য়ুনাইটেদ দব্লিয়ু এফ সীনা হন্দক্কী সিজন অসিগী ওইনা মখোয়গী ক্লাবতা শান্ননবা খঙহল্লকখ্রবা মতুং ক্লব অসিগা পান্থোইগা খূৎয়েক পীনখিবনি।
খূৎয়েক পীনখিবা অদুগা মরী লৈননা পান্থোই চনুনা ফোঙদোকখিবদা, মেট্রো য়ুনাইটেদ দব্লিয়ু এফ সীদা শান্ননবগীদমক খূৎয়েক অমনি। ক্লব অসিগী মেনেজমেন্ট অমসুং হেদ কোচ পোল মোরিসনা মঙোন্দা থম্লিবা থাজবা অদু মাঙহন্দনবা হোৎনগনি অমদি ঐনা ঐগী লৈবাকসু চাওথোক্নবা হোৎনগনি। মপান লমগী অপবা ক্লাবশিংদা শান্নবা হায়বসি মহাক্কী মঙলান অমা ওইদুনা লাকখিবনি। অদুবু মহাক্কী মঙলান অদু খরদা ওইরবসু হৌজিক্তি মঙফাওনরে হায়খি।
অমরোমদা, ক্লাব অসিগী হেদ কোচ পোল মোরিসনা ফোঙদোকখিবদা, দব্লিয়ু এন পি এল ২০২৪ সিজন অসিগী ওইনা পান্থোইগা পীনখিবা অসি নুংঙাই। পান্থোইন ইন্টারনেসনেল একপেরিয়েন্স লৈরবা অৱাংবা থাকী গোলকীপার অমনি। গোলকীপর অমদা ঐখোযনা পাম্লিবশিং অদু পান্থোইদা য়াওই। মহাকপু ক্লবা অসিদা স্কৱাদ লিষ্টতা হাপচিনখিবা অসিনা মরম ওইরগা ক্লাব অসিগী মপাঙ্গল হান্নদগী হেন্না কনখৎহল্লগনি অমদি পান্থোইদা মপূং ফানা থাজবা থম্মী হায়খি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু