নোর্থ ত্রিপুরাগী মলায়া খুলদা খুন্দারিবা মৈতৈ পাঙলশিংগী মনাক্তা চৎতুনা উনখ্রে
ইম্ফাল, দিসেম্বর ১৬ :ওল মণিপুর য়ুনাইটেদ ক্লাবস ওর্গানাইজেসন (অমুকো) না মণিপুরদগী হৌখিবা অমদি মণিপুরী লোলনা মমালোল ওইবা মপান লমদা খুন্দারিবা মণিপুরীশিংগী খোঙ্গুল লিদুনা হৌখ্রবা পুৱারীগী তাঙ্ককশিং নীংশিংমিন্নদুনা অমদি ঐখৈায়গী ওইবা হৌরকফম তিন্নবশিংগী অপুনবা পাঙ্গল অমা শাগৎমিন্নবগী পান্দমদা চহি খরগী মমাংদগী মণিপুরগী ৱাংমদা খুন্দ্রখ্রবা মণিপুরীনি হায়দুনা মতম পুম্নমক্তা মণিপুরবু অদুম নুংশিদুনা লৈরিবা মীওইশিং অদুগা মনাক্তা চৎতুনা পুকমেন পাউমেন্নবা অমদি নুংশিংনবগী লিপুন অমা শাগৎতুনা লাকখিবা অদুগী মখা চত্থরকপা ওইনা ইন্দো-বাংলাদেশকী খম থেংবা বোর্ডার অমা ওইরিবা নোর্থ ত্রিপুরাগী মলায়া খুলদা খুন্দারিবা মৈতৈ পাঙলশিং অদুগী মনাক্তা চৎতুনা উনখ্রে হায়রি।
খোঙচৎ অদুদা অমুকোগী প্রেসিদেন্ট ফৈরোইজম নন্দো লুৱাং, এদভাইজর য়াংসোসোং কোইরেং, ভাইস প্রেসিদেন্ট এমএম থম্বৌ অমদি এসিষ্টেন্ট সেক্রেটারি নিংথৌজম লোকেন মঙাংনা শরুক য়াখি। বাংলাদেশকী বোর্ডার ওইরিবা নোর্থ ত্রিপুরাগী মলায়া খুলদা চৎতুনা খুলগী মরু ওইবা অহল অমসু ওইরিবা মতম অমগী মোহনপুর গ্রাম পঞ্চায়েটকী প্রধান ওইরম্বদা নত্তনা গবর্ণমেন্ট সেলেক্টেদ চিয়ারমেন ওফ মোহনপুর পঞ্চায়েত, কমলপুর সাব-দিবিজন (ব্লোক সালমা), দোল্লাই দিষ্ট্রিক্ট অমদি ৱাকফ বোর্ড, কমলপুর সাব দিবিজনগী চিয়ারমেনসু ওইরম্বা হৌজিক্না মশাগী চহি ৮৬ রোম শুরবা কৈনৌময়ুম মোহাম্মুদিনগা উনদুনা ৱারী শান্নখি। মলয়া খুলগী মৈতৈ পাঙলশিংগা উনদুনা নুংশিনবগী অপুনবা লিচিং অমা শাগৎনবা হোৎনবা অদুদা সজাবম ইসমাইল, কমলপুরনা মতেং পাংখি।
মণিপুরগী মপানা লমদা খুন্দারিবা মৈতৈ পাঙলশিং অসি মতম কুইরবগী মমাংদগী তোঙান তোঙানবা ফিবম কয়াদগী মমা লৈবাক মণিপুর থাদোক্তুনা চৎখ্রবসু মমালোল ওইরিবা মৈতৈলোল অসি য়াম্না ময়েক শেংনা ঙাংলি, খঙলি অমদি পাঙল নুপীশিংনা মৈতৈগী ফিজোল অদুম শিজিন্নরি। নোর্থ ত্রিপুরাগী দোল্লাই দিষ্ট্রিক্টকী মলায়া হায়রিবা পাঙলগী খুল অসি পুন্না য়ুম ২০০ মুক লৈবগা লোয়ননা মী মশিং লিশিং ১ হেন্না খুন্দাবা মফমনি। কৈনৌময়ুম মোহামুদ্দিন মলায়া খুলগী পাঙলশিং অদুনা মফমদুদা খুন্দারকখিবা অশিদি থেংখাং অনিরক্তা লানগী চৈথেং নংদুনা লাঞ্জেন্নরুরবা মতুঙদা অমুক হল্লক্তুনা খুন্দাবনি হায়। ইন্দিয়া অমদি বাংলাদেশকী বোর্ডার খারিবা মফম অসি মহাক্কী শুমাং মতোন্দনি। মণিপুরদগী অমুকোগী টিম অমা লাক্কনি হায়বগী পাউ তাবদা খুল অদুগী মীওই কয়ানা মতম শাংনা ঙাইদুনা লৈরমখি।
অমুকোগী টিম অসিনা অহল ওইরবা খুল অদুগী লুচিংবা কৈনৌময়ুম মোহামুদ্দিনদা পাঙলশিংগী নাৎকী ফি ওইরিবা দোলাইফি পীদুনা ইকাই খুম্নবা অমদি নুংশিবা উৎখি। কুইনা অৱা-নুংঙাই অমদি হৌখ্রবা মৈতৈ অমদি মৈতৈ পাঙলগী ৱারী কয়াসু শান্নখি। মণিপুরগী খুল্লং ঈশৈ খুল অসিদা চহি কয়াগী মমাংদা শক্লম্মী। অদুবু হৌজিক্তি মদু শকখিদ্রে হায়। অদুগীসু মথক্তা মণিপুরীশিং শৈথাবগী ঈশৈসু তাখিদবা কুইরে হায়না মথ্বাই নুংঙাইতবা অদু অমুকোগী টিম অদুদা ফোঙদোরকখি হায়রি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু