নোংমাইথেম পাহারীগী ১৬ শুবা দেথ এনিভার্সারি থৌরম পাঙথোকখ্রে
ইম্ফাল, অক্টোবর ১৮ : মণিপুরী মতম ঈশৈনা ঙসি ওইরিবা ফীভম অসি য়ৌরক্লবা হোৎনবদা লৈখিদ্রবা লমদম অসিগী শক্নাইরবা শৈশকপা নোংমাইথেম পাহারীনা লৌরম্বা থৌদাং য়াম্না চাওই মরম অদুনা নোংমাইথেম পাহারি অমসুং মণিপুর মতম ঈশেগা তৎন থানবা য়াদ্রবা মরী অমা মতম পুম্বদা লেঙদনা লৈহৌরগনি হায়না মণিপুরী লেঙ্গুয়েজ এদভাইজরি বোর্দ (সাহিত্য একাদেমী) নিউ দিল্লীগী কনভিনার নোংমাইথেম কিরন কুমারনা ফোঙদোকখ্রে।
নোংমাইথেম পাহারী মেমোরিয়েল ট্রাষ্ট ইম্ফালনা শীন্দুনা লময়ানবা শঙলেন্দা পাঙথোকখিবা ১৬ শুবা দেথ এনিভার্সারি ওফ নোংমাইথেশ পাহারীগী থৌরমদা অথোইবা মীথুংলেনগী ৱারোল পীরদুনা এন কিরনকুমারনা মখা তানা হায়, লৈখিদ্রবা নোংমাইথেম পাহারী ঈশৈগী লমদা থৱায় য়াওজবগা লোয়ননা মরৈবাকপু থম্মোয় শেঙনা নুংশিজবা মীওই অমনি। মহাক্না হিংলিঙৈ মতমদা ঈশৈ ৪০০ গী মথক্তা শক্লমখি। মহাক্না শক্লমখিবা ঈশৈশিং ঙসি ফাওবা মীয়াম্না নুংঙাইনা তানরি। হেন্না নুংঙাইরবদি শক্নাইরবা শৈশকপা অসিনা মরৈবাক নুংশিবদা শৈথাবা ঈশৈ কয়া শক্লমখিবা অদুনি হায়খি।
থৌরমদুদা ৱা ঙাংলদুনা ওল ইন্দিয়া রেদিও ইম্ফালগী রিটয়ার্দ জোইন্ট দিরেক্টর বি বি শর্ম্মানা ফোঙদোকখিবদা লৈখিদ্রবা নোংমাইথেম পাহারীনা ঙসি রেদিওদা শন্দোক্লিবা প্রোগ্রাম কয়াগী মতাংদসু অওনবা কয়া পুরক্লমখি। হৌজিক হৌজিক রেদিওদা শীজিন্নরিবা থৌর পরেং অমদি বারো লিলা হায়রিবা ৱাহৈ অসিমকসু মহাক্না হিন্দিগী হন্দোক্তুনা ঐখোয়গী ওইবা লোন শীজিন্নহমখি। মহাক্কুম্বা মরৈবাক্কীদমক খঞ্জবা মীওই অমগা মতম খরা লোয়নবা ফংজহৌবা অসি লাইবক ফবনি হায়খি।
ঙসিগী থৌরমদুদা থৌরম মপু ওইনা শরুক য়াখিবা নোংমাইথেম পাহারী মেমোরিয়েল ট্রাষ্টকী প্রেসিদেন্ট চোংথাম কমলা নসু লৈখিদ্রবা মমিং লৈরবা শৈশকপা অসিগী মতাংদা ৱাফম কয়া ফোঙদোকখি। ঙসিগী থৌরম অদুগা মরী লৈননা নোংমাইথেম পাহারী মেমোরিয়েল ট্রাষ্টনা শৈশকপী আরম্বম যমুনাদা লাইফটাইম এচিভমেন্ট এৱার্দ খুৎশিন্নখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু