নবকুমার নোংমৈকাপ্পম গী নোক্নীং ৱারী মচা পিকত্রু – ০১
[মণিপুরী লিটরেরি সোসাইটি ‘না ২০১৮দা ফোংখিবা মণিপুরগী শক্নাইরবা অইবা ওজা নবকুমার নোংমৈকাপ্পমগী ”তূম্লমদাইদা অমমমদং (নোক্নীং ৱারী মচা পিকত্রু)” কৌবা লাইরিক অদুদগী নোক্নীং ৱারী মচা পিকত্রু খরা অইবগি অয়াবা লৌজরগা মণিপুরী মিররগী অপাবাশিংগীদমক অমুক ওয়েবসাইট অসিদা আপলোড তৌজবনি। লাইরিক অসিগী মতাংদা ৱাহৌদোক ওইনা ওজা ইবোহল সিংহ কাঙজম (প্রসিদেন্ট, মণিপুরী সাহিত্য পরিষদ, ইম্ফাল)না অসুম্না ফোংদোকপিরম্মী – ” ইনৌ নৌবা মচন অমা ওইনা ”নোক্নীং ৱারী মচা পিকত্রু” হায়বা অমসু মরূ হুল্লক্লি । নবকুমার নোংমৈকাপ্পমগী অনৌবা খূৎথানি। ৱারী মচন অসিগী পান্দমদি মপূংদা ফাগিনি, অপাববু নোকহনবনি।”
চহী খরগী মাংদা ফোংখিবা ওইরবসু মণিপুর অমসুং মপান মণিপুরগী অপাবাশিংদা নৌহৌননা অনৌবা মখলগী সাহিত্যগী মচল অমা ওইরিবা নোক্নীং ৱারী মচা পিকত্রু খরা ময়ামদা পাহননিংদুনা, তাহননিংদুনা থমজবনি। ময়াম পাবিয়ু অমসুং নৈনবিয়ু। – ইদিতর, আর্টস, মণিপুরী মিরর। ]
চেক্তি তৌবিরব্রা?
হায় ফায়দা হৌরকপীশিংদি ময়ূম পাল্লফাও অদুম মাগী মাগী হৈনবীদু থাদোকপা ঙম্লদে। মমান্নবীশিংগদা প্রোগ্রাম থা থাদুনা অমগীদা অমুক চৎ, অমগীদা অমুক চৎ, তৌদুনা আমেরিকান লাইফ স্তাইলদা লৈনবা হোৎননৈ।
মমান্নবী খরা লাক্কনি হায়দুনা হোটেলদগী লৈহল্লুবা নিমকিদু চিংনবদগী অমুক ওন্দুনা য়েংবদা কেজি মখায়রোমদং ওইরম্লবদা চাউবী শাউবনা মৈ হৌরে।
খুদক্তা হোটেল মেনেজরদুদা ফোন তৌই, “তাদনা ঐগী ইচানুপাদা পীরক্লিবা নিমিকিসি কয়ানো?”
মেনেজরদুনা ফোন্দা খুম্লকই, “কে জি অমা।”
“কে জি মখায়রোমখকসিবো? ৱেট শুদনা পীবগী ঐ কনজুমর ক্লবতা ৱাকৎচবা তারে। ৱারৌনরোইসিকো।”
হন্দমুক্তী মেনেজরদু শাউরপ তৌনা হায়রকই, “ইবেম্মা, ঐগী নিমকীগী অরূম্বদমক চেক তৌরগা ৱাকৎপিরক্লিবা করিগীনো? নচানুপাদুগী মবূক অমদি অরূম্বদুদি চেক তৌবিরব্রা?” (0৩/১১/২০১৫)
কপ্পগী মরম
“ইচে, নঙনা তুক নথম্মোয় শোক্না তেংথাতুনকা কৈদৌরিতুবু করিগীনো?” উনদবা কুইরে হায়দুনা কোয়থোরকপা মৌপ্বাদুনা হায়রকপনি।
কপ্পদু খংলেপ লেপথোক্লগা শাউঙাঙদ খুম্লকই, “ঐনা হামেঙ অমতং লোইজবদু শিরিসে নঙ খঙদবা?”
“ইচে, নচা অনী শিখিবতুদদি নঙ তুক য়ৌনা কপখিদেকো? তুগা, হামেঙ শিবদনা তূ য়ৌনা কপ্লিবা?”
মচেদুনা ৱাখল তানা হায়রকই, “চুম্মে, ইচা অহল গারীনা তকজন্দুনা হাৎখিবগীনি হায়দুনা পীরকপা লুপা লাখ মঙাদুনা লৌ শঙম অমা লৈনহৌই; তূগা, গারী হূরানবগী ময়াম্না হাৎখিবা যায়মদুনা, কাঙলূপকী ঈরাং থোক্লকপা থিংনবা লৈঙাক্না পীরকপা লুপা লাখ নিপান্দুনা য়ূম কৈ শানখি। তূনঙ খঙলিবা নৎত্রা?”
“হোয়নে, তূবুদি ঐসু খঙঙে।”
“মখোয় অনী শিখ্রসু ইচা তরামাথোই লৈহৌরিদনা। তুগা অমখক্তং লোইজবা হমেঙদুদি থৌরীনা য়েৎশিল্লগা করিমত্তা কান্নহল্লমদনা কৈদৌখ্রে। সিতবু ঐনা থম্মোয় শোক্না কপ্লোইদৌবগী করি মরম লৈগে?” (১৩-৫-২০১৬)
খূৎকি
থোং শঙ্গানবা চিফ মিনিস্তর অমদি গভর্নরনা লাক্কদবা লম্বী ময়ায়সিদা, অয়ূক অঙনবদগী কূনশিন্দুনা লৈখিবা চাউরবা কৈথেল কাও অমা তানখৎনবা হোৎনবদা মথা শানরে সেক্যুরিতি। চৈনা ফূই, মমীৎ উইশিন্দুনা খাঙই; ময়াম চঙদুনা ইল্লি, ঙমদে; গারী থৌজিন্দুনা য়েংই, চত্তে। ৱাটর কেনন শীজিন্নদুনা ঈশিং কামশিল্লি, হৌগৎতে। অনাবরা? হৌগৎপা ঙমদ্রবজাৎলা? মখোঙ শরূ তেক্লবজাৎলা? করম তৌনি সিদি! জে সি বি অমা কৌরগা কোৎলগা থাংদোকহনবা নৎত্রদি পাম্বৈ লৈদৌ মান্দে।
মদুসু লাইগী কাওদুদা ক্রুয়েলটি টু এনিমেলনি হায়দুনা ৱা চাউথোক্নরক্কনি। অদুদি করি উপাই লৈরি?
মতমসিদা কোট সুট তাই শেৎপা মশা য়াম্না নানবা নহা অমা চঙশিল্লক্লগা হায়রকই, “ঐ অমুক্তা লাইবক য়েংজগে।”
সেক্যুরিতিশিংদুনা য়াম্না থাজদ-উৎশিত্তনা করেম-কথায়নরদুনা হায়রকই, “য়েংউ-য়েংউ। য়ারগদি নঙগী অনানবা বেগতুদা হাপ্লগা পুজখ্রো।”
মশা নানবা নহাদুনা কাওদুগী মনাকোং ময়াদা চঙশিল্লগা করিনো ৱাহৈ খরা হায়খিবগা কাওদো ফুক হৌগৎলগা মমৈ থেকৎলগা চেনখ্রে।
সেক্যুরিতিশিংদুনা ইঙক ঙক্না নহাদুদা হংজিল্লকই, “নঙসে, অফাওবা মাইবা পাঞ্জি শোয়দনা ওইরমগনি। করি লাইৱা মন্ত্র শোঞ্জিল্লুরিনো?”
নহাদুনা লেম্না খুম্লকই, “নশা চাউখত্তুনা লুম্লিদু ময়েং তানবা ঐখোয়গী নেটৱার্ক কম্পেনিগী হারবেলগী হীদাক খজিক্তা চাবিয়ু, হায়রুবনি।” (১১/0১/২০১৬)
থিজরম্লোইদৌবনি
গারী মচা তোংবা য়াম্না শাজনীংবা নুংওনবা, নুমিদাংগী অমম্বদুদা হেলমেট অমা উপশীল্লগা থাবল চোংফম য়ৌরক্লে। মাগী সাইকল মরু কোকপদু মরুম অমদা ইনশিল্লগা, “ঐগী চিকোকপসিবু কনানা হূরানবিরনি হায়গে,” হায়দুনা শো-ককা লোন্দনা থাবল চোংবা য়াওখ্রে, হেলমেটতুগা।
থাবল চোংবা লোইদৌরবদুদা, নুংওনবনা ময়ূমদা হল্লগে হায়দুনা থোরকপদদি মাগী সাইকলদো লৈরমদ্রে। মকোক্তা ঊপ্লিবা হেলমেটতুগা, সাইকল মাঙখ্রে হায়দুনা হায়দৌদু, মপু মানা হেন্না ইকাইরক্তুনা হেলমেটতু মচী অমদা লোৎশীল্লগা সাইকলদু ফংনবা থিবা হৌরক্লে।
হংলুবদা মনাক নক্না পোৎফম ফম্বী অমনা হায়রকই, “য়ু ঙাওবা অমা মনীং মমাঙ চিং-চিংদুনা লাক্লগা, ‘মসিগী চিকোকপসিবু কনানা তান্নবিরক্কনি হায়গে,’ হায়রম্লগা সাইকলদু ইন্থোক্লগা থৌদুনা অদুম চৎখ্রবনি।”
নুংওনবা, ফংলরোই খন্দুনা ময়ূমদা হন্নবা তৌরকপদা, মানা হৌজিক্তা মচি অমদা লোৎলগা থমখিবা হেলমেটতু থিরুবদসু লৈরমদ্রে। উংদুনা লৈ। মাগী মওংদুদা, ভোলুন্তিয়ার অমা চঙশিল্লক্লগা হংলবদা নুংওনবনা চিন্তা তৌরগা তপ্না খুম্মী, “থিজরমদবনা হেন্না ফরম্বা জাৎনি।”
“ইপোৎ মাঙখ্রদা থিরমদবনা হেন্না ফরম্বজাৎনি হায়রিসিবু করিনো “
নুংওনবনা মকোক্তু হোৎলগা তপ্না হায়রকই, “ঐগী সাইকলদুদগীদি অমদুনা হেন্না মমল য়াম্বনে।” (১৬/0১/২০১৬)
অমা নৎত্রগা অনীনা ওক্লসি
চহী মীয়ায় হেঞ্জিল্লক্লবা চাউতোন্না ৱাকিং অসুম লাকপদা মতম অমদা মাগা য়াম্না নকশিন্ননা তিন্নরম্বা তোঞ্জাউদো কোক থেংনরে।
চাউতোন্না হংলকই ”তা তোঞ্জাউ, নঙবু অঙাং কয়া শুরবগে? করি করিদি তৌহল্লি?”
তোঞ্জাউনা মায়থোঙ মকা লাম্না খুম্মী, “ইবুংঙো, অঙাং নিপান্নি। অনীনা ডাক্তার, অমনা প্রোফেসার, অনীনা ইঞ্জিনিয়ার, অমনা কোলেজগী ওজা, অমনা আই এ এস ওফিসার। লায়ররমখ্রবা ঐঙোন্দা লাইনা পঙপীদা পীবিরি। ইচা ইমৌ ময়ামদুগী গারী ময়াম্না শূমাঙদো খোঙ থাংফমককা লৈত্রৈ। য়ূম কৈদুসু কোনুংদৌনা ইচাশিংনা পংশাদা শাগৎলি। হিংবগী মরেক মহাও হায়দো ফজনা থোক্লে। ইনাওগীদি অঙাং কয়ানো, করি-করি তৌরি?”
চাউতোম্না খুম্মী, “তাদা, অমা নৎত্রগা অনীনা ওক্লসি হায়দুনা ফেমিলি ওয়েলফেয়ার দিপার্টমেন্টনা হেক-হেক লাউবদুদা ঐগীদি ইচা অনীদনি।”
“অদুদি ঐগীদগী য়াম্না হেল্লমদৌ মাল্লিবু। করি করিদি তৌরি?”
“তাদা, ইচা অনীখক পোকপদো অমনা ক্রেক চুরি, অমনা দ্রগ চারি। মখোয় লায়েংনবা হোৎনবদা লৌ ইংখোলদগী হেন্দোক্লদুনা য়ূমদুফাও লোইনা য়োনখ্রে। অদুনা, ফেমিলি ৱেলফেযার দিপার্টমেন্টদো মৈ থারুরসিরা নৎত্রগা কেশ থাংগৎলগা ক্ষেত্রিপুরোন তানসিরা হায়দুনা খল্লক্লিবসে ফনা কুইরে। করম্বা ওইন তৌজৌগে, সজেসন অমতা পীবিরম্মু।” (১২/৬/১৯৮৪)
কৌহৈদবা মিং
পাখং অমগা লৈশাবী অমগা তোংমিন্নরগা লাকপা গারীদু লম্বীদা শৎ ফৈজিন্দুনা থম্লম্লগা নুপাদু দুকান্দা পোৎ লৈবা চঙখ্রে।
গারী থম্ফম চাদবদুদা মথৌ তৌরিবা, মমীৎতা ঈ কাখৎলক্লবা ত্রাফিক পুলিস কনস্টেবল অমা শাউনা চঙশিল্লক্লগা লৈশাবীদুদা হংই, “ইবেম্মা, মসি কনাগী গারীনো?”
লৈশাবীদুনা ঈংনা চীক্না খুম্মী, “ইতৈ ইনাওগীনি, সার।”
পুলিসতুনা ঈংথবা তৌদনা হংজিল্লকই, “নতৈ-ননাওগী গারীসিনা ফৈগাক ফৈনা লম্বী ময়ায়সিদা খামজিন্দ্রবদি খাম্ফম অমত্তা লৈত্রবরা? গারী ময়াম জাম থোক্লিবসি নমীৎতু উদ্র? ঐনা হায়রিবসি নঙোন্দনিনে মৌনা লৈশাবী শাবি। ”
দুকান্দা পোৎ লৈবা লোইরগা থোরকপদা, কনস্তেবলদুনা তোয়না তোয়না হেক হেক শীজিন্নরিবা ৱাহৈদু নুপাদুনা তাবদা মনাকোংদা এলারজি থোক্লদুনা চঙশিল্লগা হায়রকই, “সার ঐগী মিং ইনাও কৌই, লৈশাবীসিনা ঐগী নুপীগী মনাওনুপীনি। ইতৈ-ইনাও নৎচদে।”
পুলিসতুনা ইঙক-ঙক্না হংজিল্লকই, “অদুগা, লৈশাবীসিনদি করিগী ইতৈ-ইনাও, ইতৈ-ইনাও হায়রিবা?”
“ঐগী মিংসিদি ইমা ইপানা থোনবিরম্বনে।”
পুলিসতুনা শাউনা হায়রকই, “কৌহৈদবা মিংদুদি নঙদি করিগী কৌরুরিবা?” (০৯-০৯-২০১৬)
0 কমেন্ট:
কমেন্ট তৌবিয়ু