দাঃ হামোম নবদা এৱার্দ পীরগনি : অম্মিক
ইম্ফাল, সেপ্টেম্বর ২৭ :থা অসিগী ৩০ দা মণিপুরী মতম ঈশৈ নুমিৎ-২০২২ পাঙথোকপগা লোয়ননা ঈশৈগী লমদা কত্থোক্তুনা অচৌবা কন্ত্রিব্যুসন তৌরক্লবশিংবু ইকায়খুম্নদুনা পীবা লাইফটাইম এচিবমেন্ট এৱার্দ চৎলিবা চহী ২০২২ গী ওইনা শক্নাইরবা শৈশকপা অমসুং শৈবানবা দাঃ হামোম নব (নবচন্দ্র) দা লান্থোক্লগনি হায়না অম্মিক্কী জেনারেল সেক্রেটারি এম ধনঞ্জয়না ফোঙদোকখ্রে।
ঙসি য়াইস্কুল জন্মস্থানদা লৈবা অম্মিক (অপূনবা মণিপুর মতম ঈশৈ কাঙলূপ) ওফিসতা পাউমীশিং গা উনবদা ধনঞ্জয়না হায়, মণিপুর গভর্ণমেন্তনা সেপ্টেম্বর ৩০ অসি মণিপুর মতম ঈশৈগী নুমিৎ ওইনা ইং ২০০৪গী মার্চ ১৮ দা লাউথোকপীখি।
হায়রিবা চহী অসিমক্তদগী অম্মিক্না মণিপুর মতম ঈশৈ নুমিৎ অসি চহী খুদীংগী পাঙথোরক্লি। হন্দক্কী ৪৫ শুবা মণিপুর মতম ঈশৈ নুমিৎ থৌরম ইম্ফালগী জৱাহরলাল নেহেরু মণিপুর দান্স একাদেমিগী ওদিতোরিয়ামদা পাঙথোক্নবা থৌরাং তৌরি। নুমিৎ অসিদা ঈশৈ-নোংমাইগী থৌরম কয়াসু পাঙথোক্নবা শেম-শারি।
মহাক্না হায়, চীং অমসুং তমগী আর্টিষ্টশিংনা পূন্না শরুক য়ামিন্নদুনা পাঙথোক্কদবা থৌরম অসিদা লান্থোক্কদৌরিবা লাইফটাইম এচিবমেন্ত এৱার্দ-২০২২ অসিদা শেল ওইনা লুপা ২০,০০০, কোকয়েৎ, লেংয়ান ফি, সাইতেসন অমসুং মেমেন্তো য়াওরি।
পাঙথোক্কদৌরিবা মণিপুর মতম ঈশৈ নুমিৎ থৌরম অসিদা লমদম অসিগী ঈশৈ-নোংমাইগী আর্তিস্ত খুদীংমক্না শরুক য়াবীয়ু, আর্তিস্তশিংনা নুমিৎ অসিদা লন্নাই ঈশৈ কন্সার্ট অমত্তা লৌবীগনু। থৌরম অসি মণিপুর মতম ঈশৈবু নুংশিবীবশিংনসু শরুক য়াবীদুনা মণিপুর মতম ঈশৈবু শৌগৎপীদুনা মালেমগী খোঙজেলদা য়াওবা ঙম্নবা আর্তিস্তশিংবু পূক্নিং থৌগৎপীয়ু হায়ন ধনঞ্জয়না ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু