থোকচোমওংবী কৈনাহান দেবীগী শৈরেং অহুম
লাঙতক্নহল্লি পূক্নিংসে
নীংশিংহল্লি ঐবু মতমসিনা হেক্তা
মনারক্তা পোমশাৎনরিবা লৈরাং সিঙ্গারৈ
উরুবদা নীংশিংহল্লি খংহৌদনা
লাক্লে তাকলিদো শরৎ ঋতু।
নোংঙালমদাই হুম্লকপা মালংবগী শহুমদা
চোয়জায়ননা কেল্লিবা মালেমগী তম্পাক্তা।
শরৎ ঋতুনা লাকপদা লৈরাং সিঙ্গারৈ
ওকচরি তরাম্না ফিদা ওইনা থাদুনা,
থোইনা ফজহল্লি কূপশিল্লিবা লিক্লা মরী্কনা।
চরোৎনা শাৎলিবা পুংঙৌ ঙৌনা
তুরেলগী অওয়াংবা তোর্বান অনীদা।
কয়াদা ফজনা পূক্নিং হূখ্রবা
ঙাথূ-থেংথুনা হাইথরদুনা
মালংবনা লিরি হুমলকপদা
চরোৎনা নোম নোম জগোয় শাজবা
উরুবদা থম্মোয়দা হাই-হুমদুনা
ঈথক হৌজৈ নুঙাইজবনা ।
অতিয়াদা পাইরিবা লৈচিল মপৈনা
লশিং মফোলগুম্না ঙৌশোক ঙৌনা
য়েংলিঙৈ ফজবা অপেন্বা নাইদ্রবা
মতৌনা নীঙশিংহল্লি শরৎকী মতম,
মাল্লক্লে মতমসে ইমা দুর্গা লাকপগী
তাবগুমলে অথাপ্পদা-
ধোল, পুং য়ৈবগী মখোল।
নীংশিংহল্লি ঐবু মতমসিনা হেক্তা
শরৎনা লাকপদা লাংতক্নহল্লি পূক্নিংসে।
মাঙখ্রে নঙবু কদায়দা
ও লৈরাং নুংশিবী
শান্নমিন্নখিবা নঙগা অঙাং ওইরিঙৈদা
নঙগী শাংলা মহৈনা বাঁশিনি লৈনা শান্নখিবা।
ঐনা মপূং ফারকপদা
চীকমাঙনখ্রেদো নঙসু
কাওরুরেদো মতম কুইনা।
ঙসিদি খঙহৌদনা উরুবদা
কঙাওনরে ঐগী ৱাখল
চাংদম্নিংঙাই লৈতবা ফজবা শক্তম
নীংশিংহল্লে ঙসি অঙাং ওইরিঙৈ মতম।
হৌরম্বা নঙদো খরায় থোঙ্গানদা
পাম্বী অনী খমব্রাংননা,
নাপু মচুগী লৈরাংতনা
মথোল মথোল য়ান্থরদুনা
মশা লুম্না শাৎলম্বা
য়েংলিঙৈ পেন্বা নাইদ্রবা
নঙবু উরুবা পূম্নমক্না য়েংনা য়েংনা চৎখিবা।
ও পূক্নীং হূবি লৈরাং নঙবু
মালংবনা লিরি হুম্লকপদা
নঙনা নোকমি তৌজবা
কয়াগী মতিক নীংথিবা!
মাংখ্রে ঙসিদি কদায়দা ?
চৎখ্রে করম্বা লমদমদা ?
হল্লকখোনে অমুক্তা
ঐনা অদুদা লৈত্রবসু
তাহৌরি খোইরীদি ইপাম লমদমদা
মুৎলু য়াদ্রবা নীংশিং মমিনা
কৌরি ঐবু খুৎলাম তোইনা।
ইপাম লমদমদি নুংশিবী
কাওঙমদ্রবী নুংশিবী লৈরাংনি
অঙাং ওইরিঙৈ শান্নরোই নঙবু
মমিংদো করিনো কাওরুরেদো
অহল- লমন শিংনদি হায়নরম্মি
ফজনা শাৎলেদা 'চহূই'সে।
মনমদি নুংশিদে ফজবতনী
অতৈ মমিংনা করি কৌরিবা?
ওজা- গুরুনা থোনবিরশনু
নীংশিংলি ঙসিসু থোঙ্গানগী 'চহূই'
হল্লকখো অমুক্তা থোঙ্গানদুদা
ঐনা ইপামদা লৈত্রবসু।
মঙলানগী ৱারী
[পাবনা লৈখিদবা নুমিৎকী নোংমা মাঙগী অহিংদুদা ঐগী মংলান্দা উরম্বা পাবগী নুংশিরবা শক্তম ৱারীদগী ইজবনি ]
মীচীক মীরাউখোন তাদ্রবা
অহিংনা মতম অথেংবা,
নুঙাইনা তুমখুন তাল্লিবা
চৎলমদাই মতম মিকুপ্তা
তোইনা তোইনা কৌরিবা
অরোইবা মিৎলু পিরাংনা
পাউমেন ওয়াহৈ থম্বীরম্বা
কপহল্লি ঐগী থম্মোইবু।
শোন্থাংননা শোল্লম্বা -
লোইনরকপনি পূন্সিসিমা
ঙসিদি নদোম লৈহৌরকো,
তাইবং খোংচৎ লোইরে ঐগী।
ইচাশিং হৌরগা কপ্লনিদো
নথাদা নংনা কোনবীয়ু,
মতম ঐগী লোইরেদো
নখোইনা তুম্লিঙৈ খোঙশাল্লগে,
নুংঙাই য়াইফা লৈহৌরকো।
নাপদা য়ৈররি ওয়াহৈশিংদো
চিক্লবা অহিংগী মঙলান্দা,
নুংশিনা কৌরম্মি পাবনা ঐবু
ইবেম্মা, নোংঙাল্লে হৌগৎলু
হায়রম্লগা চৎখি ওন্থোক্তুনা।
মহাক্কী মায়থোংদো উবদা
কৌরম্মি ঐনা থম্মোই কায়না।
পাব ঙাইখো চৎখিনু ঙাইখো
কৌরমই ক্য়ারক খোঞ্জেল থানা।
হুমাংনা চোৎলবা ঐগী হকচাং
ওনথোইরম্মী ফমুংথক্তা;
মিৎকপ থোক্লকই খংহৌদনা
কংদ্রিবা মিৎলুগী পিরাংলক্তা
থিজখি অরোইবা মমিদু।।
0 কমেন্ট:
কমেন্ট তৌবিয়ু