অয়েকপম অঞ্জুগী শৈরেং
করোনা
করোনা কৌবি তৌঙম্বী
নশক্তি উদে, নওঙসু শেংদে
মালেম লৈমাইদদি
অখাবা মিৎয়েঙ থম্লিবি
কনাগি খুৎশিন থৌরাঙনা'
করম্বা ৱাশক লৈবন'
তাইবং মীওইগি য়াইবিদা
তুমিন তুমিন, লোৎনা লোৎনা
লমল খুম্লিবা।
সিএম, পিএম, প্রেসিডেন্ট
কনামত্তগি মতিক লৈত্রে
অৱাং-অনেম খায়দনা
অমত্তা ওইবা মিৎয়েংনা
তমথিবা মিশি থোকহল্লিবা।
ওইজবতা থিরিবা মীওইবা
মহিক্না মরু থেংলক্লবনিনা
মালেম ইমা কাইননিংদ্রে
লকডাউন লাওথোক্লে
হোম কোয়ারেন্টাইন থম্বিরে
নোংমা শুজরা চারা তানবা
নপারি নমোম খুদিংদি
চারা চাশিৎলে, হিংবগি মহাও খঙলক্ত্রে।
পুকচেল চাওবা মবুঙো
থৱাই মচামা পাল্লি
থম্মোয় য়াম্না চাওথোক্লি
মশানা অহাওবা চাবা তাঙাই
নুপী-অঙাং ফিজেৎ থোনবা লেপ্পি
খুলক-লৈরক্কি ইচিল ইনাওদা
অঙম্বা মতেঙ পাঙলকখি।
মরলদা হিমালোয় চিংজাওনা নোনজরিবি
থৱাইদি পানবা থম্মোয়না কেকু লোৎপা
কল্লক মিহৌদি কঞ্জবা
অমগি থৌদাংদা করেম্নবা
মশানা থৌদাংদি পাইখৎতবা
করম্বা মপুগি হুইজাওনো
থৌজল্লিঙৈ খোংঙি, পিজরিঙৈ চায়
পিথকলিঙৈ থকয়ি
অদুগা, থিগং উরদি ফন চোংথৈ।
ঐসু লাইভ তৌরগে
ঐসু লাইভ তৌরগে
পেইজ ভিউয়ার মশিংসে
খংহেন হেক হেলহল্লগে।
লম্বী লমহাং চৎপদা
শনবিনা শানাও লেক্লবা
শনাও মখোম থক্লবা
লাইভ হেক্তা থাদোক্কে।
কোম হেক শিৎলবা
ঙা ফাগেরা ফারোইরা
লাইভ হেক্তা তৌরগে।
লৈকাই মৌ নহানা
ভান্দ্রা হেক চান্নরবা
অয়ুক ঙন্তাই ৱাকিংদা
পান য়োনবী থেংনরবা
ৱারী খিতং চিকথরবা
লাইভ হেক তৌথোক্কে।
আঙাং নৱা ক'নানা
লমজেল হেক চেল্লবা
মৌ নহা অমনা
মথৌ হেক কল্লবা
লৈকাইগি ইবেন-ইধৌনা
ৱারী খিতং পুল্লবা
খুল্লক-লৈরক, কোনা-কাচিন্দা
আঙাং নৱা চাকয়ুম্লবা
নিঙোল মচা লুহোংলবা
বোর লোইননা চৎলবা
খোঙতেক মিতাং কনাগি
ফাংশন'মতা ওইরবা
ঐদি লাইভতা লাক্কনি।
নোক্নরসু ইকাইবিরোই
করেম্লবসু নাচুংবিরোই
ইশাগি পুঙ ইশানা থিন্নি
মীৱা শিকি লৌবিরোই
লাইভ হেক্তা চংগনি।
শন শেনগেরা শন হুগেরা
ঈশৈ পাগেরা, ৱারী শক্কেরা
শৈরেং ওইগেরা ওইরোইগেরা
খোন্থোক চুমগেরা চুম্মোইগেরা
ৱাহন্থোক শোইগেরা লানগেরা
লাইভতি শুংতোক তোকওই।
ঐগী অহান্বা ফাল্গুন ৩
ঐগী ফোঙদোক্ত্রবা নুংশিবগী ফোংঙমদ্রবা নুংশিবনি নঙসে
নুংশি লৈকোলদা কনা খঙদা পোমজরিবি লৈরাং
মিংথোল নাইদ্রবা শৈরেং চা'মগী অমত্তা ওইবা মিং
খোয়গোইনরবা পুন্সি খোঙচৎকি ৱারৌ চাওরবা লমায়
অঙাওবা থম্মোইগী নুংশি চোইরোল
তুম্বা য়াদ্রবা অহিংগী অমত্তা ওইবা মরম
তনৌরবী নুংশি চেংলৌদসু
চূদুনা লৈরবা কলঙ্কগী মমি।
ঙসিগী ইংলবা শনগারকপসে নঙগী পুন্সিগী য়েন্নিংথানি
ইফমদা (ফনা) তমথিরবা বসন্ত ওইজরসু ।
থম্মোই অসে অমুক্তং য়াকাইশনু
হৌখিবা পুন্সিগী নিংশিংবগা লোইননা
হুল্লশনু নুংশিগী য়েন্নিং বসন্ত'মদা
মথং মপোক্তা হঞ্জিন হঞ্জিন, মপোক খুদিং।
শংবানরবা মহৌশাগী নুংশি তান্থাদা
নোমহৌ নোমহৌ থেংনসি ইবানি মপোক মপোক খুদিংদা।
- ট্যাগ:
- শৈরেং
0 কমেন্ট:
কমেন্ট তৌবিয়ু