ত্রিপুরাদা লাইশ্রম সমরেন্দ্রগী ১০০ শুবা মপোক কুমওন থৌরম পাঙথোকখ্রে
ত্রিপুরাদা লাইশ্রম সমরেন্দ্রগী নীংশিং থৌরম পাঙথোকপনা মণিপুর অমদি ত্রিপুরাগী ইরৈচাশিং হেন্না অচেৎপা মরী লৈরগনিঃ শরৎচান্দ থিয়াম
আগরতলা, জুলাই ০১ : লাইশ্রম সমরেন্দ্র বর্থ সেন্টেনরী সেলব্রেশন কমিটি, ইম্ফাল, মণিপুর অমদি পেট্রিওটিক রাইটার্স ফোরাম (PAWF), ত্রিপুরা অনীনা খুৎশম্নরগা ঙরাং জুনগী তাং ৩০গী নুংথিল পুং ৫ তাবা মতমদা আগরতলা প্রেস ক্লাবকী অডিটোরিয়ামদা লাইশ্রম সমরেন্দ্রগী চহী চামশুবা মপোক কুমওন থৌরম পাংথোকখ্রে।
থৌরম অদুদা সেলব্রেশন কমিটিগী কনভেনরসু ওইরিবা সাহিত্য একাদেমী এৱার্ডি শরৎচান্দ থিয়ামনা অথোইবা মীথুংলেন, পিএ দরিয়ু এফ ত্রিপুরাগী প্রসিদেস্ট ক্ষেত্রিময়ুম মাধবীনা থৌরম মপু অমদি মণিপুরী সাহিত্য পরিষদ ত্রিপুরাগী জেনরেল সেক্রেটরী শেলৈবম খেলামোহননা অখন্নবা মীথুংলেন ওইনা শরুক য়াখি।
লাইশ্রম সমরেন্দ্রগী মশুনুপী শিজা য়েংখোম অমদি ইসি মার্চ অখাম অনীনা কবি সমরেন্দ্রনা ইরম্বা শৈরেংশিং 'চীং কাসি ঙসিদি' অমদি 'বারুনিগী অহিং' পাথোক্তুনা হৌদোকখিবা থৌরম অদুগী তরাম্না ওকপগী ৱারোল পি এ দরিয়ু এফ ত্রিপুরাগী এসিষ্টেন্ট সেক্রেটরী অহোংশাংবম সরিতনা পীখি। থৌরম অসিগী নুংগী ওইবা ৱারোলনা সেলেব্রেসন কমিটিগী মেম্বর রাকেস নাওরেম্না থমখি।
থৌরম অদুগী মনুং চন্না `লাইফ এন্দ ৱার্ক ওফ লাইশ্রম সমরেন্দ্র ' হায়বা হিরমদা সারদা লাইশ্রম, ডা. নন্দো নিঙোম্বম, ৱাংখেম বিরমঙ্গল অমদি তোংব্রম অমরজিৎনা নৈনদুনা ৱা ঙাংখি । থৌরমগী অনিশুবা তাঙ্কক্তা ত্রিপুরাগী শক্নাইরবা কবি থাংজম রথিন্দ্রনা থৌরম মপু ওইদুনা ত্রিপুরা অমসুং মণিপুরগী কবি ১৮না শরুক য়াবা পোইটস মীটকী থৌরম অমসু পাঙথোকখি।
থৌরম অদুগী অথোইবা মীথুংলেন ওইনা শরুক য়াখিবা সাহিত্য একাদমী এৱার্ডি শরৎচান্দ থিয়ামনা ফোঙদোকখিবদা, ঐখোয়না ঐখোয়গী লাইওইখ্রবা শক্নাইরবা অইবা অইবীশিংবু নীংশিংবা হায়বসি ইথৌদাং অমনি খন্না পাঙথোকপনি। ঙসি ত্রিপুরাদা লাইশ্রম সমরেন্দ্রগী ১০০শুবা মপোক কুমওন থৌরম পাংথোকপা ঙম্বসি থোইদোক্না অপেনবা অমদি নুংডাইবা ফাওই। মরমদি অসিগুম্বা থৌরম অসিনা ত্রিপুরা অমদি মণিপুরদা খুন্দারিবা মণিপুরী ইচিল ইনাওশিংগী মরক্তা হেন্না নকশিন্নবা, নুংশিন্নবা অমদি অপুনবর্গী শক্তম শাগৎপদা চাওনা মতেং পাঙলগনি। অসিগুম্বা থৌরম অসি খরা তোইনা পাঙথোকমিন্নবা য়াম্নমক তঙাইফদে হায়খি।
অথোইবা মীথুংলেন সাহিত্য একাদমী এৱার্ডি শরৎচান্দ থিয়ামনা ৱাহৈ খরা থম্বগী মতাং অমা
থৌরমগী নুংগী ওইবা ৱারোল পীরদুনা সেলেব্রেসন কমিটিগী মেম্বর রাকেস নাওরেম্না ফোঙদোকখিবদা, মণিপুরী লোন, ময়েক, লিটরেচর অমদি চোইজাইনখ্রবা ইরৈচাশিংগী মরক্তা অপুনবর্গী শক্তম শাগৎপা পামজরম্বা তাংলবা অইবা অমনি কবি লাইশ্রম সমরেন্দ্র। মহাক্কী ৱাখল্লোন অসিবু মালেমগী মফম কয়াদা চোইজাইননা খুন্দারিবা মণিপুরী ইচিল ইনাওশিংগী মরক্তা শন্দোক্নবগী ৱাখল্লোন্দা কুমজা ২০২৫গী জুলাই ২০দগী চহী অমা চুপ্পা চথরকপা অইবা অসিগী মপোক কুমওন থৌরমগী শরুক অমা ওইনা ঙসি সেলেব্রেসন কমিটি অমদি পেত্রিওটিক রাইটর্স ফোরম ত্রিপুরা অনীনা খুৎশম্নরগা পাঙথোকচবনি। কুমজা২০২৫গী মে ১৫দা বাংলাদেশ মণিপুরী সাহিত্য সংসদকা খুৎশমুরগা সিলেটতা অইবা অসিগী - নীংশিং থৌরম ইন্টরনেসনেল লেবেলদা পাঙথোকখি। ঙসি অসিনা নেসনেল লেবেলদা পাঙথোকপা থৌরমনি। লাক্লিবা জুলাই ২০দা চহী অমা চুপ্পা চত্থরকপা কবি লাইশ্রম সমরেন্দ্র বার্থ সেন্টেনরি সেলেব্রেসন লোইশিনবগী মপুং ওইবা থৌরম ইম্ফালদা পাঙথোক্কনি হায়খি।
লাইশ্রম সমরেন্দ্রগী মচানুপী সরদা লাইশ্রমনা কবি অসিগী পূন্সিগী - মতাংদা ৱাফম কয়া ফোঙদোক্লদুনা হায়, ঐখোয়গী পাবুং সমরেন্দ্র তশেংনা অইবগী তাইবংদা ঙাওজখিবা মীশকনি। মহাক্না ইরিঙৈ মতমদা মচা ওইবা ঐখোয়না নোংমতা অয়েৎপা পীখিদে। মহাক্কী হায়ববু মণিপুরী খুন্নাইগী ঙরাং, ঙসি অমদি হয়েংগী ওইরক্কদবা ফিভমশিং অসি মহাক্কী কলমনা ইথোক্তুনা ফোঙদোকপা অসিনি। মহাক্কী পূন্সিদা মীয়াম্না শকখঙবিবা, শকখঙবিদবগী নুংনাংবা খক লৈখিদে। পাবুংগী পূন্সিগী পান্দমদি মহাক্না ইরিবা শৈরেং অমদি ৱারেংশিং মীয়ামদা য়ৌহন্নবা হোৎনবা অসিখক্তনি হায়খি।
ডা. নন্দো নিঙোম্বম্না লাইশ্রম সমরেন্দ্রগী পূন্সি অমদি থবক্কী মরমদা ৱাফম কয়া ফোঙদোক্লদুনা হায়খিবদা, মণিপুরগী তুংগী ফিভম করি ওইরকপা - য়াই হায়বসি ঙসিদগীনা চহী ৫০ রোমগী মতমদা কবি সমরেন্দ্রগী শৈরেং - অমদি ৱারেং খরদা ইরমখিবা অসিমক্লা কবি সমরেন্দ্র অসি পোক্নফম লমদমবু য়াম্না নুংশিজবা, লোং ভিজনরি কবি অমনি হায়না লৌই। কবি অসিগী ৱাহৈশিং ঙসিদি মণিপুরগী হৌজিক্কী অশেংবা খুন্নাই অসিদা ময়েক শেংনা মমি তারক্লি। কবি অসিগী ৱাখল্লোন অমদি মীৎয়েং অসি থোইদোক্না অঙকপা অমনি। মহাক্কীদমক চাওথোকচবা পোকই হায়খি।
ত্রিপুরা লমদমগী শক্লাইরবা রাইটর অমদি স্কোলার ৱাংখেম বিরমঙ্গলনা কবি লাইশ্রম সমরেন্দ্রগী মরমদা হায়খিবদা, মণিপুরী সাহিত্যদা শিংথানিংঙাই ওইরবা কবি লাইশ্রম সমরেন্দ্রনা লাইরিক মশিং য়াম্না ইদুনা ফোঙলমদ্রবসু ফোংলম্লিবা লাইরিকশিংগী মগুন লৈবা লাইরিকশিং ইরম্বা অইবা অসিবু কুইরা কুইরগা মগুন লৈবা অসুম হেনগৎলক্লিবনি। সমরেন্দ্রগী খুৎইশিংদা মতমগী শাফু ময়েক শেংনা মমি তাই। খুন্নাইগী ফ্যুচর ভিজন উবা ঙম্বা তাংলবা কবিনি।
ৱাঙাংলোই ওইনা শরুক য়াখিবা তোংব্রম অমরজিৎনা ফোঙদোকখিবদা, ওজা লাইশ্রম সমরেন্দ্র মশক নাইবা কবি অমা ওইবদা নত্তনা থোইদোক্না - শক্নাইরবা লাই য়েকপা অমসুনি। ওজাগী অয়েকপা লাইশিং অমদি শৈরেংশিংনা মতম চুপ্পদা খুন্নাইগী মীয়ামগী পূক্নিংদা হংনিংদুনা লৈবা ৱাহংশিংগী মমি চাওনা তাই। ওজা সমরেন্দ্রগী শৈরেংশিং অমদি ৱারেংশিং পাবা মতমদা ইথন্তা নোক্নিংবা ফাওহনবা ঙম্বদা নত্তনা অরুবা ৱাখল খলহনবা ঙম্বগী থোইদোকপা মগুন অমদি লোইনদুনা চৎলি। মসিমক ওজা অসিগী থোইদোকপা অৱাংবা মগুন অমনি।
নীংশিংবা য়াই, লাইশ্রম সমরেন্দ্র বার্থ সেন্টেনরি সেলেব্রেসন কমিটি অমদি পেত্রিওটিক রাইটর্স ফোরম ত্রিপুরা অনীনা শিনখিবা থৌরম অদুদা শরুক য়াখিবা কবিশিং অমদি রিছোর্স পার্সনশিংগী মফমদা ইকাই খুম্নবা উৎতুনা সার্টিফিকেটশিং খুৎশিন্নখি হায়রি।
সোর্স : পাউনিলখোন ন্যুজ সার্ভিস
0 কমেন্ট:
কমেন্ট তৌবিয়ু